1 HANUA PAVAPAVADIA 16:4-17

⁴Baasa ena iduhu tauna ta hanua ai bema mase, sisia ese bae ania; eiava ta ma tano paka ai bema mase, atai manudia ese bae ania.

⁵Baasa ena kara oredia, ede ede e kara tomava, bona ena siahu herevadia, na Israel Pavapavadia Sisigadia Bukana ai vada e hetore, ani?

⁶Bena Baasa na tubu tama dekediai e mahuta; Tirisa ai e guria. Ia gabuna ai, ia natuna Elaha e lohia.

⁷Iehova ena hereva na peroveta tauna lehu Hanani ena amo ma e kau, Baasa mai ena iduhu taudia ida latadiai, ena kara dika iboudiai Iehova vairanai e karava ḡaudia ai, ia imana gaukaradia amo e habadua, Ieroboam ena iduhu ida vada e heḡereḡere bona e habuaia tari dainai.

⁸Asa, Iuda pavapavana, ena laḡani iharuahui-tauratoina ai, Elaha Baasa ese Israel e lohiaia matama, Tirisa ai; laḡani rua hona e lohiaia.

⁹A ena hesiai tauna Simiri, ena kariota oreana kahana biaguna, ese ia ihadikana dalana e tahua. Elaha na Tirisa ai, Arasa ena ruma ai e inuinu ela bona e kekero. Hari Arasa na pavapava ena ruma igimana tauna, Tirisa ai.

¹⁰Una negana ai Simiri e raka vareai, e rahua mase, e alaia; bena gabuna ai e lohia. Unu na Asa, Iuda pavapavana, ena laḡani iharuahui-hituna lalonai.

¹¹Ia e lohia matama negana ai, ena terono ai e helai kau dinana ai, ia ese Baasa ena iduhu taudia iboudiai e aladia ore; varavarana maruanena ta eiava turana maruanena ta se roho mauri.

¹²Taunabunai, Simiri ese Baasa ena iduhu idoinai e habuaia tari, Iehova ese ena peroveta tauna Iehu uduna amo Baasa latanai e gwauraia herevana heḡereḡerena;

¹³Baasa bona natuna Elaha edia kara dika daidiai, bona idia raruosi ese Israel besena e hakaraia dika dainai, bona edia kaivakuku amo Iehova, Israel Diravana, e habadua dainai.

¹⁴Elaha ena kara orena, ede ede e kara tomava, sivaraidia na Israel Pavapavadia Sisigadia Bukana ai vada e hetore, ani?

¹⁵Asa, Iuda pavapavana, ena laḡani iharuahui-hituna ai, Simiri na dina hitu Tirisa ai e lohia. Una negana ai tuari taudia na Gibeton, Filistia taudia edia hanua ta, ituari-henina ela, e koua heḡeḡe.

¹⁶Tuari oreana na edia taruha ai harina e kamonai, Simiri ese hanua pavapavana ihadikana dalana e tahua, bona vada e alaia mase. Taunabunai, una dina ai Israel idoinai ese Omri, tuari oreana biaguna, e abia, Israel pavapavana ai e halaoa, taruha ai.

¹⁷Taunabunai, hari Omri na Gibeton amo e dae ela, bona Israel idoinai ia ida; bena Tirisa e koua heḡeḡe.