Te Israel me Juda Hani Sigo Tuni Bidigo Po Elalubo Buku Deli 16:4-17

⁴“Tama tialima, te nago hani bidi dabe me badu te taun tomode isibaso da, teda te augwaligo tigi te yowigo tuaibao,” wali. “Tama tialima, me badu bidi dabe te taun bulu badu isibaso da, teda augwaligo tigi te ba kemodagego tuaibao,” Godigo te Basabolo te po wali.

⁵Te king Basa agai te tigidali haniani sę yali po da, te po gasa bukude elalubo, tama augwaligo e tama nogi ebo da, Israel Hani Dabego King Bidi Dabego Po Elalubo Buku Da wabo dao. Te bukugo te agai te tigidali dila pai sę yali po ola mabo buku dao.

⁶Tama nosali te king Basa isali, tama augwaligo te aga tigi te Tirsa taunde pubaligi pali. Tama aga ogwa nogi Ela, agai te aga ayago king bidi nigilama bidali silide aga ogwago selama, tama aga te king bidi nigilama bidali.

⁷Te king bidi Basa agai te Genuai Bidigo gedude sęgę sai, te king Jeroboam aga hani dali bidiyu, te augwaligo yali kolesaga tiwai mu yali, tama te king bidi Basa agai te dwai kolesaga ebaso, te Genuai Bidigo haliga sębę dwai mu yai. Tama me, te king Basa agai te king Jeroboamgo hani we bidi dabe tigidali ela muna silali. Tama tibaso, te Genuai Bidigo te profet bidi Jehu tagala palama, tama aga te king Basa pageba pelama, tama agai agabolo e tama tiwai po ola mani, “Genuai Bidigo nage dali, te naga hani dali si tigidali agai dolaibao po walio,” po wali.

⁸Te bidi Asa aga te Juda hani bidi dabego king bidi bidibadi, agai kibu be te 26 yia wagi solama kibu be yai, te side Ela, aga te king Basago ogwa da, aga te Israel hanigo king bidi pedelali. Tama te king bidi Ela aga te taun Tirsa bulude king bidi nigilama bidali kibu be si digi mu usu nama bidai.

⁹Tama te king Ela aga sę ebo ofisa bidi, agai nogi Simri, tama te bidi agai te king Ela ela muabo sunumi kegali. Te bidi Simrigo agai te king bidigo boi hwįbo nai karis me badu bugulama, te Simrigo tonalubo sę yai. Me sogo deli te king Ela aga te bidi Arsago beba pai, tama te bidi aga te kingo be tonalubo sę ebo bidi da. Tama agai suali, ma te king Ela aga te bomai wę tuyu bidibo suai, tama aga te wabo pabo gagalobo suali.

¹⁰Tama tibaso, te bidi Simri aga te be tomoba pelama, tama agai te king bidi Ela mu ela muani. Tama te Simri aga te king bidi pedelama bidali. Te tama sęgę pedelali, te Juda hanigo king bidi Asa aga kibu be te 27 wagi solama kibu be bidibadi te tama sęgę pedelali.

¹¹Te bidi Simri king bidi pedelai madigi, tialima, polo tama agai te king Basago hani bidi dabe tigidali ela muna silai. Tama me te aga deli kaneme me, te aga abagi dabe me, ela muna silai. Tama agai te bidigo hani bidi me deli me, me bidibo sula tagalobe.

¹²Tama te bidi Simri agai te king Basago hani bidi dabe ela silai. Tama tiali kolesaga, te Genuai Bidi Godigo sę ebo profet bidi Jehugo pedauwalidu ola mani poba usu nigi peyu tama tiali.

¹³Te king Basago hani tigide pedelali sęgę page e tama dao. Te king bidi Basa dali, te aga wai te king bidi Ela dali si, augwali sigo te Genuai Bidi Godigo gedude augwali sigo sęgę sai, Israel hanigo Genuai Bidi, tama augwali sigo te tibo godiba lotu po wali. Tama augwali sigo te Israel hani dabe augwali kegelama, sęgę sabo sę yali. Augwali sigo tama tiali sęgęde te Genuai Bidigo augwali dali agai haliga sębę mu yai, tama teyu, te Genuai Bidi agai te king Basago hani tigidali dolali.

¹⁴Te king Elago agai te tigidali haniani gasa sę yali po dabe da, te po dabe gasa bukude elalubaso, augwaligo e tama nogi wabo da, Israel Hanigo King Bidi Dabego Po Elalubo Buku Da wabo dao.

¹⁵Te Juda hanigo king bidi Asa aga te Juda dabe dali king bidi bidibadi, agai kibu be te 27 yia bidali, tama te bidi Simri aga te Israel hanigo king bidi pedelama bidai. Tama aga te Tirsa hanu taunde king bidi bidali, te 7 pela dei bidai, te Sadede deli tama usu nama bidali. Tama te sogo te Israel ami soldia bidi dabego te Filistia hanigo te Gibeton hanu bologobe yagaselama, tama augwaligo boi hwįbo sę eyu, tama augwaligo te hanu sabo homu eyu yai.

¹⁶Tama augwali te boi hwįbo sę eyu bidibadi, tama augwaligo e tama po odali, te bidi Simrigo agai te dwai kolesaga eyu, tama agai te king Ela ela muani. Tialima, te sogo tama te tigidali ami soldia bagego augwaligo te augwa tobolu ofisa bidi me deli augwaligo dąį ilali, te nogi te Omri, aga te Israel bagego king bidi pedelali.

¹⁷Tama tialima, te bidi Omri dali, te aga ami soldia bidi dabe tigidali, augwaligo te Gibeton hanu tagalama, tama augwaligo te Tirsa hanu bologobe egi pelama, tama augwaligo boi hwįnama, tama augwaligo te Tirsa taun sai.