1. King 16:4-17

⁴Iwe, iteiten eman me eman me lein chon leimwom mi mäla me lon ewe telinimw kolak repwe ochei. Nge iteiten eman me eman mi mäla lemäl machang repwe ochei.”

⁵Nge lusun pworausen än Paasa föför meinisin, pwal an föförün pwora a mak lon puken uruwon ekewe kingen Israel.

⁶Iwe, Paasa a mäla, nge ra peiaseni lon Tirsa. Nge Ela nöün we mwän a siwili lon wisan wisen king.

⁷Iwe, ewe Samol mi Lapalap a kapas ngeni ewe soufos Jehu nöün Hanani we mwän fän iten Paasa me chon leimwan, pokiten än Paasa kewe föföringau meinisin a föriir me fän mesen ewe Samol mi Lapalap. A asonga ewe Samol mi Lapalap ren an föföringau a usun chök än chon leimwen Jeropoam föföringau, pwal ren an arosala chon leimwen Jeropoam.

⁸Iwe, lon rüe me wonuen ierin mwün Asa ewe kingen Juta, Ela nöün Paasa we mwän a tolong lon wisan wisen king o nemeni Israel. A nom lon Tirsa o nemenem lon ükükün ruu ier.

⁹Nge eman nöün kewe nöüwis itan Simri, i meilapen esopun waan Ela kewe woken, a rawangauei. Lon eu rän, lupwen Ela a nom Tirsa, a sakau me lon imwen Arsa, ätei ewe mi wisen tümwünü imwen ewe king me lon Tirsa.

¹⁰Iwe, Simri a tolong lon ewe imw, a awata Ela o niela. Ei a fis lon rüe me fisuen ierin än Asa nemenem lon Juta. Iwe, Simri a siwili Ela lon wisan wisen king.

¹¹Iwe, lon ewe otun Simri a tolong lon wisan wisen king o nemenem, a niela chon leimwen Paasa meinisin. Esap amanaua mwo nge eman mwän me lein märärin Paasa ika me lein chienan kewe.

¹²Iei usun Simri a arosala chon leimwen Paasa meinisin, usun ewe soufos Jehu a apasa fän iten Paasa fän alon ewe Samol mi Lapalap.

¹³Ei a fis pokiten än Paasa me än Ela nöün we mwän tipis, pwal pokiten ar emweni chon Israel ngeni tipis. Iwe, ra asonga ewe Samol mi Lapalap ewe Koten Israel ren ar kewe uluulun anümwäl.

¹⁴Nge lusun pworausen än Ela föför meinisin a mak lon puken uruwon ekewe kingen Israel.

¹⁵Lon rüe me fisuen ierin mwün Asa ewe kingen Juta, Simri a nom lon Tirsa o nemeni Israel lon ükükün fisu rän. Lon ena fansoun ekewe sounfiun Israel ra pwelifeili ewe telinimw Kipeton mi nom lon fanüen chon Filistia, pwe repwe maun ngeni.

¹⁶Lupwen ekei sounfiu ra rong pwe Simri a rawangaei ewe king o niela, ir meinisin ra seikätä Omri nöür we meilapen mwichen sounfiu, pwe epwe king lon Israel, lon ewe chök ränin me lon lenier we.

¹⁷Mürin, Omri me nöün kewe sounfiu meinisin ra feila seni Kipeton o pwelifeili Tirsa fän pisekin maun.