1 Hadì 21:10-26

¹⁰Ne ipepinuu niw ziyà te etuvangan din is dezuwa he menge buguy para isumbung dan sikandin he mibpenrewakan din is Megbevayà wey is hadì. Ne uwita niw sikandin diyà te gawas te inged ne penulenga niw te vatu taman te ebpatey.”

¹¹Ne mibeelan te ebpemendumala wey zuma pa he menge upisyal is migkaǥi ni Jezebel ziyà te kandan dutun te surat.

¹²Midtiǥum dan is menge etew para mekepuasa ne impepinuu zan si Nabot diyà te egkehunaan dutun te menge etew.

¹³Ne zutun dutun duen nekeuma he dezuwa he menge buguy ne mibpinuu zan diyà te etuvangan ni Nabot, ne insumbung dan sikandin diyà te etuvangan te menge etew. Ke sikandan te, “Mibpenrewakan ni Nabot is Megbevayà wey is hadì.” Umbe mid-uwit dan si Nabot diyà te ǥawas te inged ne mibpenuleng dan te vatu taman te kebpatey zin.

¹⁴Ne mibpesuratan dan si Jezebel he mibpenuleng dan en te vatu si Nabot ne minatey en.

¹⁵Ne kegketueni ni Jezebel he minatey en si Nabot, migkeǥiyan din si Ahab te, “Minatey en si Nabot. Umbe genat ka ne engkena nu en sikan is pemuleey ni Nabot te paras he kenè din ibelegyà diyà te kenikew.”

¹⁶Kegkezineg ni Ahab he minatey en si Nabot, segugunà sikandin migenat is ed-angken te pemuleey ni Nabot te paras.

¹⁷Ne zutun migkaǥi is Nengazen diyà te ki Elias he tig-Tishbe te,

¹⁸“Genat ka, hendiyè ka te ki Hadì Ahab he hadì te Israel, he midhadì diyà te Samaria. Diyà sikandin te pemuleey ni Nabot te paras su egkesuatan din heini te ed-angken.

¹⁹Keǥiyi nu sikandin te iyan heini lalag ku: ‘Nepasad nu te edhimatey is etew, ne elin nu en egkuwaan is tanè din? Tenged te mibeelan nu ne edilaan te menge asu is lengesa nu ziyà te ǥawas te inged, iring te kedilai zan diyà te ǥawas te inged te lengesa ni Nabot.’ ”

²⁰Ne hein naahà ni Ahab si Elias ke sikandin te, “Neehè e ves te kuntada ku!” Midtavak si Elias te, “Uya, midhengkayi a te kenikew su geina te iyan nu zà layun egkesuatan is kebaal te mezaat diyà te etuvangan te Nengazen!

²¹Ne iyan heini egkeǥiyen te Nengazen diyà te kenikew: ‘Edezeetan ku sikew. Ebpenhimetayan ku is langun he kevuwazan nu he menge maama, uripen man etawa kenà.

²²Edezeetan ku is pemilya nu iring te mibeelan ku ziyà te pemilya ni Jeroboam he anak ni Nebat, wey te pemilya ni Baasha he anak ni Ahia, su ǥeina te midhimu nu he mepauk a, wey iyan ka nehimu he hinungdan te kebpekesalà te menge tig-Israel.’

²³“Ne vahin ki Jezebel, migkaǥi is Nengazen te egkeenen sikandin te menge asu ziyà te kutà te Jezreel.

²⁴Is sakup te pemilya nu he ebpemematey ziyà te inged ne egkeenen te menge asu, ne is diyà ebpematey te pemuleey ne egkeenen te menge tagbis.”

²⁵(Wazà etew he mibpeveyveyaan din is keugelingen din pinaaǥi te kebaal te mezaat diyà te etuvangan te Nengazen te iring kezaat te mibeelan ni Ahab, tenged te ked-iniyata kandin te esawa zin he si Jezebel.

²⁶Mid-ulaula sikandin te utew mezaat he vaal pinaaǥi te ked-azap te zuma he menge ed-ezapen, iring te mibeelan te menge Amorihanen he midsegseg te Nengazen puun kayi he tanà hein nekeuma is menge Israilihanen.)