Ŋicwofuŋ I 21:10-26

¹⁰Eme ere ŋifecnao ine ŋic repicne jajahec ejactepie ŋehuc ʒiŋuc muhuc fuŋne‐ticne muzepirec: ‘Go Anutu â ŋicwofuŋ musoriŋ‐jofameŋ.’ Iŋuc mupire jowa rarâ qânâzi hehâmonʒepieŋ.”

¹¹Eme soŋaŋ â ŋic fekicne Nabotihec hae ira jumbiŋ jaŋe Isebezi dâŋ râewec irec sâc embiŋ. Dâŋ i papia râe‐jarewec ira qâreŋke‐fârewec.

¹²Eme jaŋe ʒoaŋ moc bâtirirâ Naboti ecnepie ŋic ŋokac jaŋere ŋondeŋko mai jaha ŋewec.

¹³Ehame ŋic repicne jajahec jahe fisirâ Nabotire ŋifecnao waha ŋepic. Ehuc ŋic ŋokac jaŋere ʒâŋe faio Nabotire fuŋne ʒiŋuc mupic: “Naboti e Anutu â ŋicwofuŋ musoriŋ‐jofawec.” Jahe iŋuc mupire rorâ hae sahao bahurâ qânâzi hehâmombiŋ.

¹⁴Iŋuc erâ Iseberao dâŋ ʒiŋuc râepie rawec: “Naboti e qânâzi hehâmokicne.”

¹⁵Eme Isebe e Naboti qânâzi hehâmokicne dâŋ i manarâ izia Ahaba ʒiŋuc âzâcnewec: “Ajoc, go Jesere ŋic Naboti ere waiŋ gie moneŋzi furine bazo mutec qatarawec i ro rauc ec. E mi jukac, e hâmojec hâcne.”

¹⁶Eme Ahaba e Nabotizi hâmowec irec biŋe manarâ izia Jesere ŋic Nabotire waiŋ gie i hurâ ro rauc eocte faharewec.

¹⁷Ehame Wofuŋte dâŋzi Tisibe ŋic Elia erao ʒiŋuc fuawec:

¹⁸“Ajoc, go faharerâ hu Israe ŋicwofuŋ Ahaba Samaria haeo jukac e iqickec. Manakic, e Nabotire waiŋ gie ro rauc eocte ira rajec jukac.

¹⁹Erâ ʒiŋuc âzâcnezemec: ‘Wofuŋ e ʒiŋuc mukac: “Go mâreŋ rune qâhâmohuc mâreŋ‐ticne wâc mâmâc romeŋ me?” ’ Erâ ʒuhuckerâ ʒiŋuc âzâcnezemec: ‘Wofuŋ e ʒiŋuc mukac: “Nabotire soc wahame qâto jaŋe apurumbiŋkoa juku gore soc wahame apurunʒepieŋ wâc.” ’”

²⁰Iŋuc mume Ahabazi Elia dâŋ ʒiŋuc âzâcnewec: “O râsi‐nane, goki bâfuacnukomec me?” Mume dâŋ ʒiŋuc bâtikiecnewec: “Go gahac Wofuŋte ʒâŋe faio wiac mamakâcne ecmurâ irec feŋeŋko femeŋte bâfuacgukopac.

²¹Manakic, no wiac repicne bâfua‐garepemu. Ehuc ofaŋgurâ ŋicfâcge rambaŋko me niŋgiŋko jujune jaŋe Israe guruonec bârârâŋ‐jopa‐fârepemu.

²²Erâ no aaric bâfua‐narehuc Israe ŋic ejaretec hehesic bâfuambiŋ irec erâ kikefuŋfâcge jaŋe Nebatere ŋokâ Jeroboamte kikefuŋ â Ahia ŋokâ‐ticne Basare kikefuŋ ejarepo irec sâc jaha ejarepemu hâcne.

²³Erâ Wofuŋzi Isebere wâc ʒiŋuc muwec: ‘Qâto jaŋe Jesere hae maŋnaoa Isebe nâfâreniŋmu.’

²⁴Erâ ŋicfâcge jaŋeraonec i me i haeo hâmopie qâto jaŋe nâcjopaniŋmu â ŋicfâcge i me i kâteo hâmopie wipe jaŋe nâcjopaniŋmu.”

²⁵Ahaba e ŋonâŋ‐ticne Isebezi qafeŋkeme Wofuŋte ʒâŋe faio wiac mamakâcne eocte irec feŋeŋko fewec e iŋucne moc mi juwec.

²⁶E Wofuŋzi Israe ŋic jaŋere ʒâŋe faio Amori ŋic jopa jâpec ejarewec jaŋe ehuc jumbiŋ irec sâc wiac repic qapicne ehuc ɋâŋ qâqâtâc jaŋerao siŋke‐jâmbâŋkewec.