Kiŋ 1 21:10-26

¹⁰Ma akêŋ kalomtêna luagêc sêŋgôŋ sêkanôŋ eŋ ma êsêagêc sêŋgôliŋ biŋ êpi Nabot gebe ‘Aôm kôpuc boa Anôtô to kiŋ.’ Go akôc eŋ asa awê ana ma atuc eŋ ŋa poc êndu.”

¹¹Gejobwaga to gôliŋwaga sêgôm Jesebelnê biŋ ŋanô kêsa kêtôm biŋ gêc papia, taŋ eŋ kêsakiŋ gêdêŋ êsêac naŋ.

¹²Êsêac sêmasaŋ noc sênam dabuŋ moŋa teŋ ma sêkêŋ Nabot gêŋgôŋ lau samob ŋamata.

¹³Ma kalomtêna luagêc sêsô jasêŋgôŋ sêkanôŋ eŋ. Ma êsêagêc sêgôliŋ biŋ kêpi Nabot sêmoa lau samob laŋôŋnêmŋa ma sêsôm gebe “Nabot kêpuc boa Anôtô to kiŋ.” Amboac tonaŋ sê eŋ aŋga malac sêsa jatêtuc eŋ ŋa poc êndu.

¹⁴Go êsêac sêsakiŋ biŋ gêdêŋ Jesebel gebe “Têtuc Nabot ŋa poc êndu ma gêmac êndu su.”

¹⁵Jesebel gêŋô biŋ tau gebe têtuc Nabot ŋa poc êndu ma gêmac êndu su, go sebeŋ kêsôm gêdêŋ Ahab gebe “Ôndi sa, ôkôc ŋac Jesrelŋa Nabot nê kôm wainŋa, taŋ eŋ gedec aôm ônam ôli naŋ, gebe Nabot gêmoa mata jaliŋa kêtiam atom, eŋ gêmac êndu sugac.”

¹⁶Ahab gêŋô Nabot gêmac êndu ŋawae, tec sebeŋ gêdi sa jakêsêp gêdêŋ Nabotnê kôm wainŋa gebe êkôc êtu ênê gêŋ.

¹⁷Go Apômtaunê biŋ gêdêŋ ŋac Tisbetŋa Elia amboac tonec gebe

¹⁸“Ôndi naôsêp ôndac kiŋ Israelŋa Ahab, taŋ gêŋgôŋ Samaria naŋ. Ma ôlic acgom, eŋ jagêmoa Nabotnê kôm wainŋa. Eŋ gêja gebe êkôc kôm tau su êtu ênê gêŋ.

¹⁹Ma aôm oc ôsôm êndêŋ eŋ gebe ‘Apômtau kêsôm amboac tonec gebe Aôm gôjac ŋamalac êndu ma kôjaŋgo launêŋ gêŋ su kêtu aômnêm me.’ Ma aôm oc ôsôm êndêŋ eŋ gebe ‘Apômtau kêsôm amboac tonec gebe Aŋga gamêŋ, naŋ kêam têdamôê Nabotnê dec naŋ, oc têndamôê aôm taômnêm dec amboac tonaŋgeŋ.’”

²⁰Ahab kêsôm gêdêŋ Elia gebe “Ŋoc o aôm, kôtap aê sa me.” Elia gêjô ênê biŋ gebe “Aê katap aôm sa. Aôm kôkêŋ taôm gêdêŋ gêŋ, taŋ gêjac Apômtaunê mataanô sec samucgeŋ naŋ.

²¹Ôlic acgom, aê oc jakêŋ gêŋwapac êpi aôm. Aê gabe janseŋ aômnêm gôlôac ŋac samucgeŋ ma oc jandim nêm lau wakuc to laŋgwa êŋgic tomalageŋ aŋga Israel.

²²Ma aê oc janseŋ aômnêm gôlôac êtôm gagôm gêdêŋ Nebat latu Jerobeam ma Ahija latu Basa nêŋ gôlôac naŋ, gebe aôm gôgôm aê têtac ŋandaŋ kêsa ma kôlêtôm lau Israel e sêgôm sec.’

²³Ma Apômtau kêsôm biŋ kêpi Jesebel gebe ‘Kêam oc sêniŋ eŋ aŋga gamêŋ Jesrel ŋalêlôm.’

²⁴Ahabnê teŋ embe êmac andu aŋga malac ŋalêlôm, naŋ kêam oc sêniŋ, ma teŋ embe êmac êndu aŋga awêŋa, naŋ moc umboŋ ŋalabuŋa oc sêniŋ.”

²⁵Ŋac sec teŋ kêtôm Ahab gêmoa atom. Nê awê Jesebel kêkêli eŋ e kêkêŋ tau-êŋgôm gêŋ, taŋ Apômtau gêlic sec naŋ,

²⁶Eŋ gêgôm gêŋ alôb-alôb gebe kadaguc anôtôi gwam kêtôm lau Amor, taŋ Apômtau geseŋ êsêac su aŋga Israel laŋônêmŋa naŋ.