1 Hadì 18:13-29

¹³Wazè nu ve mezineg is mibeelan ku zuen te ebpenhimetayan ni Jezebel he menge ebpeneuven te Nengazen? In-eles ku is 100 he ebpeneuven te Nengazen diyà te zezuwa he surung, 50 is diyà te kada surung, ne mibeǥayan ku sikandan te keenen wey wahig.

¹⁴Ne ǥuntaan edsuǥuen a kenikew te kedhendiyà te egalen ku te kegkaǥi he kayi ka? Siguradu edhimetayan e zin!”

¹⁵Migkaǥi si Elias te, “Ebpenangdù a ziyà te uuyag he Nengazen he Mekeǥeǥehem, he edsilbiyan ku, he ebpaahà a ki Ahab guntaan he andew.”

¹⁶Umbe, midhendiyà si Obadias te ki Ahab ne migkeǥiyan din he zutun si Elias, ne migenat si Ahab te kedhinguma ki Elias.

¹⁷Ne hein neuma ni Ahab si Elias, ke sikandin te, “Iyan ke ves iyan heeyan is ebpendezaat te Israel.”

¹⁸Midtavak si Elias te, “Kenà a iyan ebpendezaat te Israel, kekenà, iyan ka wey is pemilya te amey nu. Su wazè niw tumana is menge suǥù te Nengazen wey mid-azap niw is menge ledawan ni Baal.

¹⁹Ne ǥuntaan, ipetiǥum nu is langun he menge etew te Israel kayi te kedì diyà te Buntud he Carmel. Ne ipehendiyè nu zaan sikan is 450 he ebpeneuven ni Baal wey is 400 he ebpeneuven ni Ashera, he ibpemekaan ni Jezebel.”

²⁰Umbe, midtiǥum ni Ahab is langun he menge etew ziyà te Israel wey sikan is ebpemeneuven diyà te Buntud he Carmel.

²¹Mid-uvey si Elias diyà te menge etew is migkaǥi te, “Sengemenu keluǥayad is kedsunud niw te zezuwa he tuluuwen? Emun iyan Megbevayà is Nengazen ne sunuza niw sikandin piru emun iyan Megbevayà si Baal ne iyan niw sunuza.” Piru wazà medtavak is menge etew.

²²Mid-uman megkaǥi si Elias te, “Iyan e zà nesamà te menge ebpeneuven te Nengazen, piru si Baal 450 is kandin he ebpeneuven.

²³Ne ǥuntaan uwiti key te zezuwa he tudu he vaka. Ne mebpilì dutun is menge ebpeneuven ni Baal te kandan he edlepaan ne penggetaza zan ne id-untud dan haazà diyà te kayu he idtavun, piru kenà haazà edreteman te hapuy is ed-em-emuren he tavun. Ne iyan daan haazà ebeelan ku ziyà te sevaha he vaka; idsavuk ku zaan haazà diyà te tavun he ed-em-emuren ne kenè ku zaan haazà edreteman te hapuy is tavun.

²⁴Ne pengemuyù kew ziyà te keniyu he ed-ezapen he iyan medretem te hapuy, ne ebpengemuyù a zaan diyà te Nengazen. Ne sikan is edretem te hapuy ziyà te tavun, ne iyan tutuu he Megbevayà.” Ne nekeuyun dutun is menge etew.

²⁵Dutun migkeǥiyan ni Elias is menge ebpeneuven ni Baal te, “Iyan kew huna su mahabet kew. Pilì kew te sevaha he tudu he vaka ne endama niw heini. Ampù kew ziyà te ed-ezapen niw piru kenè niw retemi te hapuy is tavun niw.”

²⁶Umbe, migkuwa zuen te menge ebpeneuven ni Baal is tudu he vaka he mid-uwit diyà te kandan, ne mid-andam dan heini. Ne nengemuyù dan diyà te ki Baal puun te meselem taman te meudtu. Igkulahì dan en is lalag te, “He Baal, tevaka key kenikew!” Edsayewsayew en sikandan is edlingutlingut duen te pemuhatà he mibeelan dan. Piru wazà mibeǥey te hangyù dan.

²⁷Ne hein meudtu en ne ed-un-undahan en sikandan ni Elias he ke sikandin te, “Sigudu kew en pengulahì, su megbevayè man buwa sikandin! Kela ke mezalem is ked-isip-isip din etawa midhimeley, etawa zuen din nehipenawan, etawa nekelipezeng ne kinahanglan he ebpukawen.”

²⁸Umbe, midsigudu en sikandan megkulahì ne mibpemelian dan en is menge lawa zan te ubpit wey ispada, su iyan haazà neleyaman dan te ebaal, ne nenuravid en is lengesa zan.

²⁹Midlavey en is meudtu ne edsigudu ǥihapun sikandan ebpengulahì taman te neuma is uras te mahapun he kebpemuhat, piru wazà mibeǥey te hangyù dan.