1 Utaáchich Kuraka 18:13-29

¹³¿Ndusha tputs shiyaa kamanirang? ¿Yuwaa sirútama Jesabel apanllpanee urkar ichingaru pacharangu anootsee? Anpur nuwshat apanllpanee 100 yamayaruri, piyam 50, piyam 50 sheeruri, wachush pishuyaruri, anoom nuwsha martakuri taarangina.

¹⁴¿Ashirangtaati anoo na shiysha, Kurakareetsish kamanishini yuwaa nuw nish kusarangi anootsi, átsha? Itaru, anoo kurakari mazinakchu, nuwaatsirishapari pachachiya, tárangiya.

¹⁵Elíyassha, Nuw zurampatari Apanllimun sur nuw shiyaa táchinllpa. Napari in zar nuw kurakash kuseeruri tsiyatchina, tárangiya.

¹⁶Abdiyassha anuritam kurakangaz kamankatu naataranu, kurakash kuseeru kamanirangiya, yuwaa Elíyasaa parangu anootsi. Kuraksha anuritam chamayangati átu, naatarangiya.

¹⁷Anushsha kurak Ajab Elíyasaa chamayangarangu, ¿Shiy watish nish Israelash tsap ichingaroo tayutaritarangush, kiyung kachiykusin taakana anish? tárangiya.

¹⁸Elíyassha, Nduni. ¿Antaatiya nuwaja tayutaritki? Shiyamandari chayarish, misha tputsirimandtamtish Apanll waana ashkiya, yuwamand waanaatsi kamachtamarini kasayarus, apanllputseetsimsha Baala ungirtakis anumanda, tárangiya.

¹⁹Ashiriya, anuritam Elíyas, Kurakaa, shiy naturi zar ichingaroo Israelchichee tputs mach Karmelup shaniyamaam kamachtangcha. Jesabel apanllpaneetsi urkari kizpur chinaku, anoo ichingaru shaniyamaam kamachtangcha. Apanllputseetstam urkar yuw 450 Baalaa ksutkana anootstam, misha 400 Asera ksutkana anootstam ichingaroo yushindangcha shaniyamaama, tárangiya. Ashiriya, na kamaneena yuwaa Elíyas kurakpa Ajabpa tsiyatarangu anootsi.

²⁰Ashiriya, kurak Ajab ichingaroo tputs Israelchichee, misha apanllputseetstam urkar ichingaroo machish Karmelush shaniyamaam kuruzarangu, ichingarusin shaniyaranganaya.

²¹Anushsha Elíyas chiyzayaru, ichingaroo tputs tsiyatarangu, ¿Ashinooja siy piyari tsimbun chinakis anoo kasachis? Apanllee chinakus, yusur apanllputseetssha chinat ashiksawa. Nda ashishtamaam yachayani. ¿Chakaja kizpur taak? Wandaya Apanll wamari kasiru taaku, anootsimari chinangtsa. Itaru, wandaya apanllputs Baal wamari kasiru taaku, anootsimaritam mangishish chinangtsa, tárangu, anoo ashparitssin tputs nda minumtiyam yámaranganaya.

²²Ashiriya, yusur Elíyastam tsiyatarangu, Nuwamari minamti apanllpantana. Nuwamaricha minumariti kamungarangi. Itaru, siysa apanllputsis kurakis Baalchichis 450 taaksa.

²³Ashiriya, na wakaraa wip tsimbun nish wayangints. Sheerus, minumtam tamamaatsimasaja saana zandaksa, anoo yáyarus, apusash taarayarus, sumas xanateerus, anumun wayangtsa. Itaru, musá tazurintspa. Nuwshat ambitam ashtachima. Wakaraa wip yáyaruri, sumasimun wayayaritamti, ichingaritam iwapayaruri, kasachima. Itaru, nduntam nuw sumasee tazuchima.

²⁴Ashiramchuni, siy apanllireetstamtis mashangtamtsa. Nuwshat Apanllireetsi mashchitamma. Ashkachuni, chakamasa apanllirini kanindamandari sumasee zanganchiya, an watacha zurampatari Apanlli, Elíyas tsiyatku tárangu, anoo tputs ichingarusin mazinarangusin, Wanasir tsiyataksha, táranganaya.

²⁵Ashiriya, Elíyas ichingaroo apanllputsee Baala urkar, Na siyma minum wakar wip ipusangints. Sheerus, ichtaru iwapangimasints. Ashiramchus, watam siy zapansawa, apanllireetsis wasina mashangtsa. Itaru, musá sumas tazurinllpa, tárangiya.

²⁶Ashiriya, uwshtisin anuritam wakaraa wip yáyarusin, sumasimun wayaranganaya. Sheersin, puturimandari zar chtayarusin, apanllirineetsi mashkusin, Baalaa, shiy iyaam istangcha. Yuwaa tsiyatkini anoo mazinangcha, ántarusin, michitkusin, iturpiptar ashiranganaya. Tárangitaatssin, anootssha apanllputsirini nda pakchiyam istarangiya.

²⁷Ántarusin zar wachamureetsitanu, anush Elíyassha tputsee ipazapi átu, Kapung kuruzungtsa, watam apanlliris kizpuriwa. ¿Tamasha nda kuska? Tarawazpapari mapeeriya. Nduniya ashiru, chkakatupari kureeriya. Nduniya ashiru, piyamazuwa arap naayanlliwa. Nduntaati ashiru, anshuripari maariya. Kapung kuruzungtsa ituyamamaama, tárangiya.

²⁸Uwshtisin aranginasha kapung zamangarangusin, waanaatsishtisin wanuts k'chirpat sirang sirang ashirangsin, ashchiri kuras xatambat ashiranganaya. Watam anchich tputs uru ambiri apanllputsee ungirtaksin ashtaranawa.

²⁹Ántarusin, zar wachamuree tushiyramchu, ashiritaa uwshtisin aranginasha miroosinll ashishtisin michichitarusin, iturpiptar ashiranganaya. Itaru, ashirangtaatssin, apanllputssha minamtiyam nda maachi wayarangana, anoo nda muchirangiya. Nda pakchiyam anush maachta paranganaya. Ashiriya, zar sírungutarattu, uru Apanlleem maachi muchimaam waritarangu.