ܐ ܩܘܪ̈ܢܬܝܐ 7

1

2

3

4

5

6

7

8

9

10

11

12

13

14

15

16

¹ܒܘܼܬ ܡܸܢܕܝܼܵܢܹ̈ܐ ܕܟܬܝܼܒ݂ ܠܵܘܟ݂ܘܿܢ ܐܸܠܝܼ، ܒܹܐܡܵܪܵܐ ܝܘܸܢ، ܨܦܵܝܝܼ ܝܠܵܗ̇ ܕܐܢܵܫܵܐ ܠܵܐ ܕܵܩܹܪ ܒܒܲܟ݂ܬܵ‌ܐ.

²ܐܝܼܢܵܐ ܣܵܒܵܒ ܐܝܼܬ ܙܵܢܝܘܼܬܵ‌ܐ، ܟܠܔ ܓܲܒ݂ܪܵܐ ܗܵܘܹܐ ܠܹܗ ܒܲܟ݂ܬܵ‌ܐ ܕܓܵܢܹܗ ܘܟܠܔ ܒܲܟ݂ܬܵ‌ܐ ܓܲܒ݂ܪܵܐ ܕܓܵܢܘܼܗ̇.

³ܫܒ݂ܘܿܩ ܓܲܒ݂ܪܵܐ ܬܲܡܸܡ ܘܵܠܝܼܬܹܗ ܠܟܸܣ ܒܲܟ݂ܬܹܗ، ܘܗܵܕܟ݂ܵܐ ܐܘܼܦ ܒܲܟ݂ܬܵ‌ܐ ܬܲܡܸܡܵܐ ܘܵܠܝܼܬܘܼܗ̇ ܠܟܸܣ ܓܲܒ݂ܪܘܼܗ̇.

⁴ܒܲܟ݂ܬܵ‌ܐ ܠܲܝܬ ܠܵܗ̇ ܫܘܼܠܛܵܢܵܐ ܥܲܠܔ ܦܲܓ݂ܪܵܐ ܕܓܵܢܘܼܗ̇ ܐܸܠܵܐ ܓܲܒ݂ܪܘܼܗ̇، ܗܵܕܟ݂ܵܐ ܐܘܼܦ ܓܲܒ݂ܪܵܐ ܠܲܝܬ ܠܹܗ ܫܘܼܠܛܵܢܵܐ ܥܲܠܔ ܦܲܓ݂ܪܵܐ ܕܓܵܢܹܗ، ܐܸܠܵܐ ܒܲܟ݂ܬܹܗ.

⁵ܠܵܐ ܚܵܣܟ݂ܝܼܬܘܿܢ ܚܲܕ ܡ̣ܢ ܗ̇ܘ ܐܚܹܪܢܵܐ ܐܸܠܵܐ ܒܨܸܒ݂ܝܵܢܵܐ ܕܬܸܪܘܵܘܟ݂ܘܿܢ، ܘܩܵܐ ܚܲܕ ܡܸܬܚܵܐ ܟܸܪܝܵܐ، ܕܕܵܒ݂ܚܝܼܬܘܿܢ ܓܵܢܵܘܟ݂ܘܿܢ ܠܨܠܘܿܬܵ‌ܐ. ܗ̇ܝܓܵܗ ܡܸܢܕܪܸܫ ܬܹܝܡܘܼܢ ܠܥܘܼܕܵܠܹܐ ܕܠܵܐ ܓ̰ܲܪܸܒ ܠܵܘܟ݂ܘܿܢ ܣܵܛܵܢܵܐ ܟܲܕ ܠܵܐ ܡܵܨܹܝܬܘܿܢ ܚܵܡܠܝܼܬܘܿܢ.

⁶ܒܹܐܡܵܪܵܐ ܝܘܸܢ ܐܵܗܵܐ ܒܝܵܗܒ݂ܵܠܬܵ‌ܐ ܕܦܣܵܣܵܐ، ܠܵܐ ܒܝܵܗܒ݂ܵܠܬܵ‌ܐ ܕܦܘܼܩܕܵܢܵܐ.

⁷ܒܵܥܹܝܢ ܗܘܵܐ ܕܟܠܵܝܗ‌ܝ ܐܢܵܫܹ̈ܐ ܗܵܘܝܼ ܗܘܵܘ ܐܲܝܟ݂ ܕܝܼܝܼ، ܐܝܼܢܵܐ ܟܠܔ ܐܢܵܫܵܐ ܐܝܼܬ ܠܹܗ ܡܵܘܗܒ݂ܵܬܹ̈‌ܐ ܕܓܵܢܹܗ ܡ̣ܢ ܐܲܠܵܗܵܐ. ܚܲܕ ܐܝܼܬ ܠܹܗ ܡܵܘܗܲܒ݂ܬܵ‌ܐ ܕܓܵܢܹܗ، ܘܗ̇ܘ ܐܚܹܪܢܵܐ ܗ̇ܝ ܡܵܘܗܲܒ݂ܬܵ‌ܐ ܐܚܹܪܬܵ‌ܐ.

⁸ܒܹܐܡܵܪܵܐ ܝܘܸܢ ܠܐܢܵܫܹ̈ܐ ܕܠܹܐ ܝܢܵܐ ܓܒ݂ܝܼܪܹܐ ܘܠܐܲܪ̈ܡܸܠܝܵܬܹ‌ܐ، ܕܨܦܵܝܝܼ ܝܠܵܗ̇ ܕܗܵܘܝܼ ܐܲܝܟ݂ ܕܝܼܝܼ.

⁹ܐܝܼܢܵܐ ܐܸܢ ܠܹܐ ܡܵܨܝܼ ܕܵܒ݂ܩܝܼ ܠܵܗ̇ ܓܵܢܵܝܗ‌ܝ، ܫܒ݂ܘܿܩ ܓܵܒ݂ܪܝܼ. ܣܵܒܵܒ ܒܘܼܫ ܨܦܵܝܝܼ ܝܠܵܗ̇ ܠܸܓܒ݂ܵܪܵܐ ܡ̣ܢ ܠܸܩܝܵܕܵܐ ܒܫܲܗܘܲܬܬܵ‌ܐ.

¹⁰ܘܠܐܵܢܝܼ ܕܝܼܢܵܐ ܓܒ݂ܝܼܪܹܐ ܒܝܼܵܗܒ݂ܵܐ ܝܘܸܢ ܐܵܗܵܐ ܦܘܼܩܕܵܢܵܐ، ܐܝܼܢܵܐ ܠܹܐ ܝܘܸܢ ܐܵܢܵܐ ܒܝܼܵܗܒܹܗ ܐܸܠܵܐ ܡܵܪܲܢ، ܕܠܵܐ ܦܵܪܫܵܐ ܒܲܟ݂ܬܵ‌ܐ ܡ̣ܢ ܓܲܒ݂ܪܘܼܗ̇.

¹¹ܐܝܼܢܵܐ ܐܸܢ ܦܵܪܫܵܐ ܡܸܢܹܗ، ܠܵܐ ܓܵܒ݂ܪܵܐ، ܝܲܢ، ܣܲܙܓܸܪܵܐ ܥܲܡ ܓܲܒ݂ܪܘܼܗ̇. ܐܘܼܦ ܓܲܒ݂ܪܵܐ ܠܵܐ ܫܵܒܹܩ ܠܒܲܟ݂ܬܹܗ.

¹²ܠܐܵܢܝܼ ܐܚܹܪ̈ܢܹܐ ܒܹܐܡܵܪܵܐ ܝܘܸܢ، ܐܵܢܵܐ، ܠܵܐ ܡܵܪܲܢ، ܕܐܸܢ ܐܝܼܬ ܚܲܕ ܐܲܚܘܿܢܵܐ ܕܐܝܼܬ ܠܹܗ ܒܲܟ݂ܬܵ‌ܐ ܠܵܐ ܡܗܘܼܡܸܢܬܵ‌ܐ ܕܒܵܥܝܵܐ ܕܚܵܝܵܐ ܥܲܡܹܗ، ܠܵܐ ܪܲܦܹܐ ܠܵܗ̇.

¹³ܘܐܸܢ ܐܝܼܬ ܒܲܟ݂ܬܵ‌ܐ ܡܗܘܼܡܸܢܬܵ‌ܐ ܕܓܲܒ݂ܪܘܼܗ̇ ܠܹܐ ܝܠܹܗ ܡܗܘܼܡܢܵܐ، ܘܒܵܥܹܐ ܕܚܵܝܹܐ ܥܲܡܘܼܗ̇، ܠܵܐ ܪܲܦܝܵܐ ܠܹܗ.

¹⁴ܣܵܒܵܒ ܓܲܒ݂ܪܵܐ ܠܵܐ ܡܗܘܼܡܢܵܐ ܦܝܼܫܵܐ ܝܠܹܗ ܡܩܘܼܕܫܵܐ ܒܝܲܕ ܒܲܟ݂ܬܹܗ ܡܗܘܼܡܸܢܬܵ‌ܐ، ܘܒܲܟ݂ܬܵ‌ܐ ܠܵܐ ܡܗܘܼܡܸܢܬܵ‌ܐ ܦܝܼܫܬܵ‌ܐ ܝܠܵܗ̇ ܡܩܘܼܕܸܫܬܵ‌ܐ ܒܝܲܕ ܓܲܒ݂ܪܘܼܗ̇ ܡܗܘܼܡܢܵܐ. ܐܸܢ ܠܵܐ ܗܵܘܝܵܐ ܗܘܵܐ ܗܵܕܟ݂ܵܐ، ܝܵܠܵܕ݇ܘ̈ܟ݂ܘܿܢ ܛܲܡܐܹ̈ܐ ܒܸܬ ܗܵܘܝܼ ܗܘܵܘ، ܐܝܼܢܵܐ ܒܐܵܗܵܐ ܡܩܘܼܕܫܹܐ ܝܢܵܐ.

¹⁵ܐܝܼܢܵܐ ܐܸܢ ܚܲܕ ܕܠܹܐ ܝܠܹܗ ܡܗܘܼܡܢܵܐ ܘܒܵܥܹܐ ܫܵܒܹܩ، ܫܒ݂ܘܿܩ ܕܥܵܒܹܕ ܗܵܕܟ݂ܵܐ. ܓܲܒ݂ܪܵܐ ܡܗܘܼܡܢܵܐ ܝܲܢ ܒܲܟ݂ܬܵ‌ܐ ܡܗܘܼܡܸܢܬܵ‌ܐ ܠܹܐ ܝܢܵܐ ܐܣܝܼܪܹ̈ܐ ܒܐܲܢܹܐ. ܐܲܠܵܗܵܐ ܩܸܪܝܲܢ ܝܼܠܹܗ ܕܚܵܝܲܚ ܒܫܠܵܡܵܐ.

¹⁶ܕܵܐܟ݂ܝܼ ܝܵܕܥܲܬ‌ܝ، ܝܵܐ ܒܲܟ݂ܬܵ‌ܐ، ܐܸܢ ܒܸܬ ܦܲܪܩܲܬ‌ܝ ܠܓܲܒ݂ܪܵܟ݂ܝ؟ ܝܲܢ ܕܵܐܟ݂ܝܼ ܝܵܕܥܹܬ، ܝܵܐ ܓܲܒ݂ܪܵܐ، ܐܸܢ ܒܸܬ ܦܲܪܩܸܬ ܠܒܲܟ݂ܬܘܼܟ݂؟

¹⁷ܒܵܣ ܫܒ݂ܘܿܩ ܟܠܔ ܚܲܕ ܢܵܛܹܪ ܕܘܼܟܹܗ ܐܲܝܟܵܐ ܕܐܲܠܵܗܵܐ ܡܘܼܬܸܒ݂ ܠܹܗ ܐܸܠܹܗ، ܘܗܵܕܟ݂ܵܐ ܚܵܝܹܐ ܐܲܝܟ݂ ܕܐܲܠܵܗܵܐ ܩܪܹܐ ܠܹܗ ܐܸܠܹܗ. ܐܵܗܵܐ ܝܠܹܗ ܩܵܢܘܿܢܵܐ ܕܡܲܬܘܼܒܹܐ ܝܘܸܢ ܠܟܠܵܝܗ‌ܝ ܥܹܕܵܬܹ̈‌ܐ.

¹⁸ܐܸܢ ܐܢܵܫܵܐ ܓܙܝܼܪܵܐ ܝܗܘܵܐ ܡ̣ܢ ܩܲܕܡ ܕܦܵܐܹܫ ܗܘܵܐ ܩܸܪܝܵܐ، ܠܵܐ ܕܵܐܹܪ ܠܥܘܼܪܠܘܼܬܵ‌ܐ. ܘܐܸܢ ܒܥܘܼܪܠܘܼܬܵ‌ܐ ܝܗܘܵܐ ܡ̣ܢ ܩܲܕܡ ܕܦܵܐܹܫ ܗܘܵܐ ܩܸܪܝܵܐ، ܠܵܐ ܦܵܐܹܫ ܓܙܝܼܪܵܐ.

¹⁹ܓܙܘܼܪܬܵ‌ܐ ܠܹܐ ܝܠܵܗ̇ ܡܸܢܕܝܼ، ܘܥܘܼܪܠܘܼܬܵ‌ܐ ܠܹܐ ܝܠܵܗ̇ ܡܸܢܕܝܼ، ܐܸܠܵܐ ܢܛܵܪܬܵ‌ܐ ܕܦܘܼܩܕܵܢܹ̈ܐ ܕܐܲܠܵܗܵܐ.

²⁰ܟܠܔ ܚܲܕ ܦܵܐܹܫ ܕܵܐܟ݂ܝܼ ܕܝܼܗܘܵܐ ܐܝܼܡܲܢ ܕܦܝܼܫ ܠܹܗ ܩܸܪܝܵܐ.

²¹ܥܲܒ݂ܕܵܐ ܝܘܸܬ ܗܘܵܐ ܐܝܼܡܲܢ ܕܦܝܼܫ ܠܘܼܟ݂ ܩܸܪܝܵܐ؟ ܠܵܐ ܬܲܚܡܸܢܸܬ ܒܘܼܬ ܥܲܒ݂ܕܘܼܬܵ‌ܐ. ܐܝܼܢܵܐ ܐܸܢ ܡܵܨܹܝܬ ܩܵܢܹܝܬ ܚܹܐܪܘܼܬܵ‌ܐ، ܩܢܹܐ ܠܵܗ̇.

²²ܣܵܒܵܒ ܗ̇ܘ ܕܝܼܗܘܵܐ ܥܲܒ݂ܕܵܐ ܐܝܼܡܲܢ ܕܦܝܼܫ ܠܹܗ ܩܸܪܝܵܐ ܒܡܵܪܲܢ، ܚܹܐܪܵܐ ܕܡܵܪܝܵܐ ܝܠܹܗ، ܘܗ̇ܘ ܕܝܼܗܘܵܐ ܚܹܐܪܵܐ ܐܝܼܡܲܢ ܕܦܝܼܫ ܠܹܗ ܩܸܪܝܵܐ، ܥܲܒ݂ܕܵܐ ܕܡܫܝܼܚܵܐ ܝܠܹܗ.

²³ܦܝܼܫ ܠܵܘܟ݂ܘܿܢ ܙܒ݂ܝܼܢܹܐ ܒܛܝܼܡܵܐ؛ ܠܵܐ ܗܵܘܹܝܬܘܿܢ ܥܲܒ݂ܕܹ̈ܐ ܕܒܢܲܝ̈ܢܵܫܵܐ.

²⁴ܐܲܚܘܿܢܘܵܬܹ̈‌ܐ، ܟܠܔ ܐܢܵܫܵܐ ܓܵܘ ܗ̇ܝ ܐܲܗܘܵܠܔ ܕܝܼܗܘܵܐ ܐܝܼܡܲܢ ܕܦܝܼܫ ܠܹܗ ܩܸܪܝܵܐ، ܦܵܐܹܫ ܓܵܘܘܼܗ̇ ܠܟܸܣ ܐܲܠܵܗܵܐ.

²⁵ܐܵܕܝܼܵܐ ܠܒܬܘܼܠܵܬܹ̈‌ܐ، ܠܲܝܬ ܠܝܼ ܦܘܼܩܕܵܢܵܐ ܡ̣ܢ ܡܵܪܲܢ، ܐܝܼܢܵܐ ܒܝܼܵܗܒ݂ܵܐ ܝܘܸܢ ܪܸܥܝܵܢܝܼ ܐܲܝܟ݂ ܚܲܕ ܕܒܪ̈ܲܚܡܹܐ ܕܡܵܪܝܵܐ ܦܝܼܫ ܠܹܗ ܡܗܘܼܡܢܵܐ.

²⁶ܒܘܼܬ ܐܵܢܲܢܩܵܝܘܼܬܵ‌ܐ ܕܐܵܗܵܐ ܙܲܒ݂ܢܵܐ، ܒܸܚܫܵܒ݂ܵܐ ܝܘܸܢ ܨܦܵܝܝܼ ܝܠܵܗ̇ ܠܟܠܔ ܚܲܕ ܕܦܵܐܹܫ ܐܲܝܟ݂ ܕܝܼܠܹܗ.

²⁷ܓܒ݂ܝܼܪܵܐ ܝܘܸܬ؟ ܠܵܐ ܛܵܥܹܝܬ ܪܲܦܲܝܬܵ‌ܐ. ܪܘܼܦܝܵܐ ܝܘܸܬ ܒܲܟ݂ܬܵ‌ܐ؟ ܠܵܐ ܛܵܥܹܝܬ ܠܸܓܒ݂ܵܪܵܐ.

²⁸ܐܝܼܢܵܐ ܐܸܢ ܓܵܒ݂ܪܹܬ، ܠܹܐ ܝܘܸܬ ܒܸܚܛܵܝܵܐ. ܘܐܸܢ ܒܬܘܼܠܬܵ‌ܐ ܓܵܒ݂ܪܵܐ، ܠܹܐ ܝܠܵܗ̇ ܒܸܚܛܵܝܵܐ. ܐܝܼܢܵܐ ܐܝܼܬ ܐܘܼܠܨܵܢܹ̈ܐ ܐܲܪ̈ܥܵܢܵܝܹܐ ܩܵܐ ܐܵܢܝܼ ܕܓܵܒ݂ܪܝܼ. ܒܘܼܬ ܐܵܗܵܐ ܡܘܼܚܲܒܢܵܘܟ݂ܘܿܢ ܒܹܐܬܵܝܝܼ ܝܠܵܗ̇.

²⁹ܐܲܚܘܿܢܘܵܬܹ̈‌ܐ، ܒܹܐܡܵܪܵܐ ܝܘܸܢ ܐܵܗܵܐ: ܥܕܵܢܵܐ ܟܪܝܼܬܵ‌ܐ ܝܠܵܗ̇. ܡ̣ܢ ܐܵܕܝܼܵܐ ܐܵܢܝܼ ܕܐܝܼܬ ܠܗܘܿܢ ܒܲܟ݂ܬܵܬܹ̈‌ܐ ܗܵܕܟ݂ܵܐ ܚܵܝܝܼ ܐܲܝܟ݂ ܕܐܸܢ ܠܲܝܬ ܠܗܘܿܢ ܒܲܟ݂ܬܵܬܹ̈‌ܐ.

³⁰ܘܐܵܢܝܼ ܕܒܵܟ݂ܝܼ ܐܲܝܟ݂ ܕܐܸܢ ܠܹܐ ܝܢܵܐ ܒܸܒܟ݂ܵܝܵܐ، ܘܐܵܢܝܼ ܕܝܼܢܵܐ ܚܸܕܝܹܐ ܐܲܝܟ݂ ܕܐܸܢ ܠܹܐ ܝܢܵܐ ܚܸܕܝܹܐ، ܘܐܵܢܝܼ ܕܙܵܒ݂ܢܝܼ ܡܸܢܕܝܼ ܐܲܝܟ݂ ܕܐܸܢ ܠܹܐ ܝܠܹܗ ܕܝܼܵܝܗ‌ܝ ܕܚܲܡܝܼ ܠܹܗ.

³¹ܘܐܵܢܝܼ ܕܡܲܦܠܸܚܝܼ ܡܸܢܕܝܼܵܢܹ̈ܐ ܕܐܵܗܵܐ ܕܘܼܢܝܹܐ، ܐܲܝܟ݂ ܕܠܵܐ ܦܵܝܫܝܼ ܓ݂ܠܝܼܒܹܐ ܒܝܼܵܝܗ‌ܝ، ܣܵܒܵܒ ܐܸܣܟܝܼܡܵܐ ܕܐܵܗܵܐ ܕܘܼܢܝܹܐ ܥܵܒ݂ܪܵܢܵܐ ܝܠܹܗ.

³²ܗܵܕܟ݂ܵܐ ܒܵܥܹܝܢ ܕܠܵܐ ܬܲܚܡܸܢܝܼܬܘܿܢ. ܗ̇ܘ ܕܠܲܝܬ ܠܹܗ ܒܲܟ݂ܬܵ‌ܐ، ܟܹܐ ܗܵܘܹܐ ܒܹܐܟ݂ܵܠܵܐ ܚܲܡ ܕܫܘܼܠܵܢܹ̈ܐ ܕܡܵܪܝܵܐ، ܕܵܐܟ݂ܝܼ ܕܫܵܦܹܪ ܠܡܵܪܝܵܐ.

³³ܐܝܼܢܵܐ ܗ̇ܘ ܕܐܝܼܬ ܠܹܗ ܒܲܟ݂ܬܵ‌ܐ ܟܹܐ ܗܵܘܹܐ ܒܹܐܟ݂ܵܠܵܐ ܚܲܡ ܕܫܘܼܠܵܢܹ̈ܐ ܕܐܵܗܵܐ ܕܘܼܢܝܹܐ، ܕܵܐܟ݂ܝܼ ܕܫܵܦܹܪ ܠܒܲܟ݂ܬܹܗ.

³⁴ܗܵܕܟ݂ܵܐ ܐܢܵܫܵܐ ܦܠܝܼܥܵܐ ܝܠܹܗ ܒܚܝܼܵܠܹܗ. ܒܲܟ݂ܬܵ‌ܐ ܠܵܐ ܓܒ݂ܝܼܪܬܵ‌ܐ ܝܲܢ ܒܬܘܼܠܬܵ‌ܐ ܟܹܐ ܐܵܟ݂ܠܵܐ ܚܲܡ ܕܫܘܼܠܵܢܹ̈ܐ ܕܡܵܪܝܵܐ، ܕܗܵܘܝܵܐ ܡܩܘܼܕܸܫܬܵ‌ܐ ܒܦܲܓ݂ܪܵܐ ܘܒܪܘܼܚܵܐ. ܐܝܼܢܵܐ ܒܲܟ݂ܬܵ‌ܐ ܓܒ݂ܝܼܪܬܵ‌ܐ ܟܹܐ ܐܵܟ݂ܠܵܐ ܚܲܡ ܕܫܘܼܠܵܢܹ̈ܐ ܕܐܵܗܵܐ ܕܘܼܢܝܹܐ، ܕܵܐܟ݂ܝܼ ܫܵܦܪܵܐ ܠܓܲܒ݂ܪܘܼܗ̇.

³⁵ܐܵܗܵܐ ܒܹܐܡܵܪܵܐ ܝܘܸܢ ܠܛܵܒ݂ܬܵ‌ܐ ܕܓܵܢܵܘܟ݂ܘܿܢ، ܠܵܐ ܕܐܵܣܪܹܢܵܘܟ݂ܘܿܢ، ܐܝܼܢܵܐ ܕܚܵܝܹܝܬܘܿܢ ܒܐܘܼܪܚܵܐ ܕܫܪܵܪܵܐ، ܘܠܵܐ ܗܵܘܹܝܬܘܿܢ ܦܠܝܼܥܹܐ ܒܚܸܠܡܲܬܵܘܟ݂ܘܿܢ ܠܡܵܪܝܵܐ.

³⁶ܐܸܢ ܚܲܕ ܐܢܵܫܵܐ ܚܵܫܹܒ݂ ܕܠܹܐ ܝܠܹܗ ܡܝܲܩܘܼܪܹܐ ܠܒܬܘܼܠܬܵ‌ܐ ܕܛܠܝܼܒܘܼܗ̇ ܝܠܹܗ ܘܒܸܥܒ݂ܵܪܵܐ ܝܠܵܗ̇ ܒܫܸܢܹ̈ܐ، ܘܒܸܚܫܵܒ݂ܵܐ ܘܵܠܹܐ ܝܠܵܗ̇ ܕܓܵܒܹܪ، ܥܵܒܹܕ ܐܲܝܟ݂ ܕܒܵܥܹܐ، ܠܹܐ ܝܠܹܗ ܒܸܚܛܵܝܵܐ. ܫܒ݂ܘܿܩ ܓܵܒ݂ܪܝܼ.

³⁷ܐܝܼܢܵܐ ܗ̇ܘ ܕܩܛܝܼܥܵܐ ܝܠܹܗ ܒܚܝܼܵܠܹܗ ܒܘܼܬ ܐܵܗܵܐ ܫܘܼܠܵܐ، ܘܠܹܐ ܝܠܵܗ̇ ܐܵܢܲܢܩܵܝܬܵ‌ܐ، ܘܐܝܼܬ ܠܹܗ ܫܘܼܠܛܵܢܵܐ ܥܲܠܔ ܓܵܢܹܗ ܘܡܘܼܬܒ݂ܵܐ ܝܠܹܗ ܒܠܸܒܹܗ ܕܠܹܐ ܓܵܒܹܪ ܠܒܬܘܼܠܬܵ‌ܐ، ܐܘܼܦ ܐܵܗܵܐ ܨܦܵܝܝܼ ܒܸܥܒ݂ܵܕܵܐ ܝܠܹܗ.

³⁸ܗܵܕܟ݂ܵܐ، ܗ̇ܘ ܕܓܵܒܹܪ ܠܒܬܘܼܠܬܵ‌ܐ ܨܦܵܝܝܼ ܒܸܥܒ݂ܵܕܵܐ ܝܠܹܗ، ܘܗ̇ܘ ܕܠܹܐ ܝܠܹܗ ܒܸܓܒ݂ܵܪܘܼܗ̇ ܒܘܼܫ ܨܦܵܝܝܼ ܒܸܥܒ݂ܵܕܵܐ ܝܠܹܗ.

³⁹ܒܲܟ݂ܬܵ‌ܐ ܐܣܝܼܪܬܵ‌ܐ ܝܠܵܗ̇ ܒܓܲܒ݂ܪܘܼܗ̇ ܟܡܵܐ ܕܚܵܝܵܐ ܝܠܹܗ ܓܲܒ݂ܪܘܼܗ̇. ܐܝܼܢܵܐ ܐܸܢ ܡܵܐܹܬ ܓܲܒ݂ܪܘܼܗ̇، ܡܵܨܝܵܐ ܓܵܒ݂ܪܵܐ ܠܡ̇ܢ ܕܒܵܣܡܵܐ ܠܵܗ̇، ܐܝܼܢܵܐ ܒܡܵܪܲܢ.

⁴⁰ܐܝܼܢܵܐ ܒܚܝܼܵܠܝܼ، ܒܘܼܫ ܚܕܝܼܬܵ‌ܐ ܒܸܬ ܗܵܘܝܵܐ ܐܸܢ ܦܵܝܫܵܐ ܐܲܝܟ݂ ܕܝܼܠܵܗ̇. ܘܐܵܢܵܐ ܒܸܚܫܵܒ݂ܵܐ ܝܘܸܢ ܕܐܘܼܦ ܐܵܢܵܐ ܐܝܼܬ ܠܝܼ ܪܘܼܚܵܐ ܕܐܲܠܵܗܵܐ.