1Rih gur nohnong Got ohe nita hat pati kuu han dir ma gosdaripti oh yahda da na gosdaripti oh yaha napor nohnong ma dahanahatiri meng oh noh gin it gurnong napotiprohmur. Han gur kuu na dar pon han hat ayahanoh yahmur.
2Yah orhora; ti da ti da apris bisei saw hat sashen ohe danong oh isip hat sasipririm nitat kuu han guragur gosdar patenmur napor mama brak mat nasar ohmur.
3Ihat gosdat pati gamin gutagut kuu uhdapat Gin ditadit saw hatper naporhanhe han gomdapat baso poripra. Han ohdapat kuu gonong Gin ditadit saw hatper naporhanhe kuu gomdapat baso poripra. Gutagut tit dawi ham da gosat patenmur.
4Kuu go gorhe ina oh gorhe hrepnong mat na papatmur. Han orhe hrepnong mat papat ohoh ihan oh Dit ihtiper naporhanhe Yahwa porinmur. Han go gorhe ina oh gorhe hrepnong mat na papatmur. Kuu urhe hrepnong mat papat ohoh ihan uh Dit ihtiper naporhanhe Yahwa porinmur. Ihama tit inawi gosham patenmur.
5Kuu go Gin mama dik moh noh na saw hat indipramur. Got ohsi mengir indipramur dahahhanoh iman ohnong dahamtinmur. Dahamara oh Es. Saw hatin oh mama dik moh na mandam ihat orhorwi indeprimur naporhanoh ohe napor danong hatinmur. Han go Gin mama dik moh na saw hat indipramur. Got ohsi mengir indipramur dahahhanoh inan uhnong dahamtinmur. Dahamara uh Es. Saw hatin oh mama dik moh na mandam ihat orhorwi indiprimur naporhanoh uhe danong hatinmur. Gutagut tap mengwi ham Gin dit mama dik moh na saw ham Got ohe danong ham indiprohemur goshayahanoh ama gosporiya danong hatinmur. Ihat trun indipri. Trun ayahanoh gut saw hatinoh kakun awammur ritiri tei ohoh ihan Satan oh kis naham han go kuu wansi saw hah kuu go han wansi saw hah hatiprohe ohoh ihan ihat trun patepri. Kakun ihat patem gutagute dahapti danong hatinmur.
6Gur nuhur kinhat indipri napor nohnong ma dahanahatiri meng oh gin noh mama napor ohmur. Mama napor meng moh Guragur kuu daripti ditadit gamin inpera dahayahanhe yahmur. Gur ihat patenmur na naporpatmur. Be yahwi naporpatmur.
7Noh yahwimur naporpat orhor norhe ma dahat patnong oh Nohe mama pon han ham yah hat patru hat patepera daham ihat ayahanhe oh yahnapmur dahapatmur. Ihtin orhor Got oh nitat da napin patmur. Ma napripat oh nohe mama hat pat da hatin nahahhanhe gurhe nohe mama hat pat da hatin hat orhor patenmur. Ihat paten dasi na nahama kuusi hansi gosdatin da napin pathanhe gutagut gosdara gutagut gamin taham patenmur.
8Kuu pono han pono kuu tahemo hat pati gurnonghe gin noh mama meng oh napotiprohmur. Gur nohe tan hat patepera dahayahanhe yahwimur.
9Gur nohe tan hat ayahanoh yaho dahapat orhora; eit a har hat son inasi naham er nahatiprohkin dahayahanoh ama ihat dahat pati gur er hat sapririm guragur gosdar gamder patenmur.
10Gin kuu gamder gure paten meng oh napotiprohmur. Kuu han inap gur imanir ihirnong mandapri. Kuusi han gurhe inanir ihirnong mandapri. Guragur gamder gosdat orhorwi patenmur. Kuu han dat patdapat Gin noh ohnong mandam sapora dahahhanoh wan han ihirnong it daripra. It apris gorhe han mandam pip han ohnong it gutagut da gosapris gosdar patenmur. It iman ohnong na datin dasi hat pathanhe ihan gorhap be patenmur. Nohe mama Gur ihat patenmur naporpat sawa meng moh norhe sawa meng basmur. Hanipyah orhe sawa meng oh gurnong naporpatmur.
12Gin Got ohe danong hat patsi; Got ohe danong na hat patsi gosdat pati gamder gurnong mama meng moh napotiprohmur. Ma napotiproh meng oh Hanipyah ohe ritip sawa meng na napotiprohmur. Norhe dahat pat sawa meng oh napotiprohmur. Got ohe danong hat pat han go Got ohe danong na hat pat kuu dat pathanhe uhnong mandapra. Uh Noh Got ohe danong na hat pat orhor gosi patepramur rihanhe yahwa daham dat orhorwi patenmur.
13Amaru hat orhor Got ohe danong hat pat kuu go Got ohe danong na hat pat han tit dat pathanhe ohnonghe mandapra. Ohdapat Noh gosi patepramur rihanhe kuu gomdapathe yahwa daham gutagut gamin patenmur.
14Nohe gutagut gamin ihat patenmur ma napor meng oh noh mohnong daham ginapormur. Kuu uh Got ohe danong hat patin han oh Got ohe danong na hat patin itait gosdat patin Got oh kuu uh nohe danong hat pat ohe pe oh han nohe danong na hat pat han ohnong Han moh norhe gon mat papat hanmur porpatmur. Han oh Got ohe danong hat patina kuu uh Got ohe danong na hat patina itait gosdat patin Got oh Han oh norhe danong hat pat ohe pe oh kuu nohe danong na hat pat kuu uhnong Kuu moh norhe gon mat papat kuumur porpatmur. Got oh supir itapir ihirnong orhe gon mat ma papat ohe pe oh brer ihirnonghe Got oh orhe gon mat papten brer mat papatmur. Got oh supir itapir ihirnong imat na papatneng brer ihirnonghe dasei mar bisei mat papatnengmur. Supir itapir ihirnong imat yah mat papat ohoh ihan brer ihirnongsi yah mat orhor papatmur.
15Kuu uh Got ohe danong hat patina han oh Got ohe danong na hat patdapat Gin noh gosi dit na pateprimur. Namdamur naporhanoh kuu gomdapat Yahwa. Gorhe dawimur porinmur. Han oh Got ohe danong hat patina kuu uh Got ohe danong na hat patdapat Gin noh han gosi dit na pateprimur. Namdamur naporhanoh han gomdapathe Yahwa. Gorhe dawimur porinmur. Got oh dirnong manap gosham yah hat paten da napin pat tei ohoh ihan patem inggoshatipririm Yahwa porinmur.
16Got ohe danong hat pat kuu gomdapat Got ohe danong na hat pat han iman ohnong Gwe Got ohe danong hat pat da oh pinggit pisapatin oh am hatiprohde da na am hatiproh dirhe hanhan hat patimur. Got ohe danong hat pat han gomdapat Got ohe danong na hat pat kuu inan uhnong gwe Got ohe danong hat pat da oh pinggit pisapatin uh am hatiprohde da na am hatiproh dirhe hanhan hat patimur.
17Gin gur mohnong dahenmur. Hanip dir ihat pati dus orhor Got oh dirnong Gonong gin norhe han nahahmur napor nambur napapatmur. Ihat pat dus orhor nambur napapat moh Hanipyah Krais orhor Mihat ha patenoh rim kis nahat napapat ma hapat daham ihat sashenmur. Ihat sashenmur ma napor meng moh noh sios aptei aptei ma pati ihirnong gonsi tap meng mohwi pot pisapatmur.
18Gur ihat pati dus orhor gur ihat sashenmur ma napor meng moh mamaru hat patmur. Eit watah gatmat pati teihe Got oh Gin noh gonong norhe han nahahmur napor namburhanhe ama han gur Nuhur eit watah na gatmat pati han hatin hatpora dahapri. Eit watah na gat mat patimdapathe Got oh Gin noh gonong norhe han nahahmur napor namburhanhe ama han gur Gin eit watah gatmatpera dahapri. Guragure ma hat patiru hat patin Got oh namburpat ohoh ihan gur ihat orhorwi patenmur.
19Got oh eit watah gatdeiptio na gatdeiptio ohnong dahapat handa. Basra. Ama ihaptinong oh ina teimdapat ihaptio rim oh na dahapatmur. Da mutuhdapat ma Got orhe sawa mengnong amram dimat ayanong asohwi yaho dahapatmur.
20Gur Nuhur ihat pati dus orhor Got oh Gin gur norhe han nahahmur napor ma nambutir oh ihat orhorwi patepera daham ihat orhorwi patenmur.
21Gur ihat orhorwi hat patenmur ma napor meng oh mamaru hat patmur. Gur ire hrepdapat nang tatpat pati hatin hat patim ire be atamreiptin Got oh Gin gur norhe han nahahmur napor namburhanoh gur ire hrepnong hat pati da oh mandatpera daham mandapri. Mandatpera na dahat patin orhor narpit namdahanoh Wes nohnong narpit namda daham tarpir mandam sashenmur.
22It nang tatpat pati danonghe hapri ma napor oh mama danong ham ginapormur. Gur ire hrepdapat nang tatpat pati hatin hat patim ire be atamreiptin Got oh Gin gur norhe han nahahmur napor nambur orhe hrepnong nahahhanoh ama inahah han bap guroh ire hrepdapat tatpat patin orhor Hanipyah orhorsi pati ohoh ihan nang tarpir be han bap hat patimur. Nang tatpat pati ohe hrepdapat hat na patin orhor namburhanhe ama inahah han bap gur Krais orhe hrepdapat nang tatpat pati han bap gurmur.
23Got oh orhe yan isip ohsi dirnong namohoma yah teinong naham napapat ohoh ihan hanip diradire dahapti ohe hrepdapat hathe patepri. Got orhe dahapat da ohe hrepdapat hatwi patenmur.
24Got orhe nita taptem bap gur Nuhur ihat pati dus orhor Got oh Gin gur norhe han nahahmur napor nambutir ma hapat. Ihan dir Got oh ihat pati dus orhor ma nambutirru hat orhor patepera. Ihat orhorwi ma patepri oh Got orhorsi tap hat patim ihat orhorwi pateprimur daham ihat orhorwi patenmur.
25Gin na gosdat pati bap gure paten meng oh napotiprohmur. Ma napotiproh meng oh Hanipyah ohe ritip meng oh na napotiprohmur. Norhe dahat pat meng tit napotiprohmur. Norhe dahat pat meng ma napotiproh oh gure damdapat oh Hanipyah oh Por ohnong hinhina mar ohsi pat ohoh ihan oh amram am hatin ohe meng tit napotiproh ma hapat daham nohe ma napotiproh mengnong moh amratinmur.
26Norhe da oh Gin mama ina ruumsup dat pati dus moh guragure ma hat pati da hatin hat orhorwi patenmur.
27Kuu dat patihanhe kuu mandatin ohe danong hapri. Dat orhorwi patenmur. Kuu na dat patihanhe Noh kuu datpora dahapri. Guragure ma ihat patiru hat orhorwi patenmur.
28Gosdatper gosham gosdariyahanhe oh erda. Oh yahmur. Kuu horhor ihir han dariyahan erda. Oh yahmur. Yah orhora; guragure brer manhem brersi ham aya dus asoh ruumsup oh namkatipra rim mameng moh naporpatmur.
29Nohe taptema. Nohe ma naporpat meng moh mohnong daham naporpatmur. Gin mong moh timbas hatin dikhe kakduup hat patmur. Kakduup hat pat ohoh ihan gar dik mama indiprohe dik moh kuusi han gurhe kuu timbas han hatin hat indinmur.
30Saheih ham ma yimapti han gurhe Mong moh timbas hatin kakduup hah ma hapat. Ihan dir na saheih hapti han ire tan hat inpera dahat indinmur. Amam hapti han gurhe Mong moh timbas hatin kakduup hah ma hapat. Ihan dir na amam hapti han ire tan hat inper dahat indinmur. Erer ma daripti han gurhe Mong moh timbas hatin kakduup hah ma hapat. Ihan dirhe erer timbas hat pati han ire tan hat inper dahat indinmur.
31Kakdah mohe erer tamohotin danong hat sapti han bap gurhe Mong moh timbas hatin kakduup hah ma hapat. Ihan dir kakdah mohe erer marindin danong na hapti han ire tan hat inper daham indinmur.
32Kuuhan guragur gosdaripti brersi hama ama ohe ruumsup danong oh hat patepririm noh mameng moh gurnong naporpatmur. Mohnong dahenmur. Kuu timbas han ire ma pati oh kuu brersi han ire ruumsup oh amkat pat da hatin hat na patimur. Ihir Nuhur Got orhe amam hat pat danong hat patepera daham orhe dahat pat danongwi hat patimur.
33Oh kuu timbas hat pati han ire meng oha; kuusi hat ma pati bap ihirhe kuu uhe dahapat danong da ayah deipat da ohsi tap hat patim kakdah morhe tamreindin dasi haptimur.
34Ihat patima kakdah mohe ma dahapti da ohsi; Got ohnong dahapti da ohsi hat patimur. Kuu tahemo horhoro ihirhe Nuhur ina tei mohsi; da mutuh ohe da ohsi Hanipyah orhemur por ongeng mat apaptepera daham Hanipyah orhe atamreindin ohe danong ohwi hat patimur. Hansi kuu ihirhe han orhe ma dahah danong asoh ayah deipat da ohsi hat patim kakdah morhe tamreindin dasi haptimur.
35Noh mama napor meng moh gur Nure gosdatin mandap oh Por oh baso napor ma hapat dahapri. Basra. Noh gurnong napanggeit napapten meng oh napotporhan gur ama ohe pe oh yah hat sashen ohe danong ohwi hama Hanipyah orhe danongwi hat ha sashengwe rim mameng moh gurnong naporpatmur.
36Gin nuhut gosdatiprimur gosham kis goshat pati gure meng oh napotiprohmur. Kis goshat patimdapat na gosdat patin orhor han ohdapat Noh kuu moh na darpat moh noh uhnong er deipatkin dahayo oh datin ohe danong oh isip hat patin orhor Noh kot katdapat bisei saw deihan uhnong er matiprohkin dahayao ihat dahat patimdapat gosdatper dahayahanhe gutagute dahapti danongwi ham gosdarinmur. Ihat patimdapat ma gosdaripti oh erda. Oh yahmur.
37Kis goshat patimdapat orhor oh orhe da orhor Noh kuu moh na dara pon han patepramur daham na ihat sashen ohe da oh orhe hrepnong mat papatim uhnong na darhanoh oh erda. Oh yahmur.
38Ihat pat ohoh ihan kis goshat pati yot itait gosdariyahanoh yahmur. Oh uhnong na dara Noh pon han hat patepramur rim na darhanhe yahnapmur.
39Gin tahem gure paten meng oh napotiprohmur. Han oh da patin oh sawa meng oh Wan han datipra. Iman orhorsi patenmur napotip ohoh ihan orhornong dat patenmur. Han oh haputporhan Noh gin wan han tit datpora dahahhanhe yahwa. Gorhe dawimur. Yah orhora; kin wataham Got orhe nita hat pat han ohnong asohwi darinmur.
40Kuu gohe gorhe dawimur napor orhora; norhe dahapat oh han darhanoh ama han dar amam oh garpokmur. Han na darhanoh ama amam oh isipnap hat patepra ma hapat dahapatmur. Nohe ma dahapat oh Got orhe Yahsup oh nohe mutuh moh patin noh ihat dahat pat ma hapat dahapatmur.
