1 Korinti 7

1

2

3

4

5

6

7

8

9

10

11

12

13

14

15

16

¹Aê gabe jajô biŋ, taŋ amac ato naŋ. Ŋac teŋ embe êmoasac awê atom, oc ŋajam.

²Mago kêtu biŋ mockaiŋoŋa tec ŋacwaga sênam awê êndêŋ-êndêŋgeŋ to lauo sênam ŋac êndêŋ-êndêŋgeŋ.

³Ŋac êŋgamiŋ tau êndêŋ nê awê atom, ma awê êŋgamiŋ tau êndêŋ nê akweŋ atom,

⁴gebe awê kêtu tau ôli ŋatauo atom, ŋac kêtu nê awênê ôli ŋatau, ma ŋac kêtu tau ôli atom, awê kêtu ŋatauo.

⁵Aŋgamiŋ taôm êndêŋ taôm atom. Embe taêm ênam gebe anam dabuŋ taôm êsêp ŋasawa êtu ateŋ mecŋa, go amansaŋ biŋ awiŋ taôm êmuŋ acgom ma ŋajam. Têm tau êmbacnê, go amoa awiŋ taôm êtiam, gebe Sadaŋ êlêtôm amac êtu nêm têmtac ŋakalacŋa atom.

⁶Biŋ tonaŋ aê kasôm amboac jatu atom, kasôm gebe jawa sageŋ êndêŋ amac.

⁷Aê gabe ŋamalac samob têtôm aêmaŋ. Tageŋ Anôtô gêjac sam moasiŋ gêdêŋ ŋamalac gêdêŋ-gêdêŋgeŋ, kêkêŋ teŋ gêdêŋ ŋac teŋ ma teŋ gêdêŋ teŋ.

⁸Aê jasôm ŋoc biŋ êndêŋ lau, taŋ sêjam awê to ŋac atom ma êndêŋ awê tuc. Êsêac embe sêmoa têtôm aê, go ŋajam.

⁹Mago êsêac embe sênam dabuŋ ôliŋ têtôm atom, go lauo sênam ŋac ma ŋacwaga sênam awê samaŋ. Sênam tauŋ tec ŋajam êlêlêc sêmoa toôliŋ ŋakalac su.

¹⁰Êndêŋ lauo to ŋac, taŋ sêjam tauŋ naŋ, aê jakêŋ biŋsu teŋ. Biŋsu tau aêŋoc atom, Apômtaunê gebe Awê êkac tau su aŋga nê akweŋnê atom.

¹¹Embe êkac tau su, naŋ êmoa nê tauŋa e taê ênam teŋ, go êmansaŋ bi ŋ êndêŋ nê akweŋ ma êmu êndêŋ eŋ êna êtiam. Ma ŋac tau êwi nê awê siŋ atom amboac tonaŋgeŋ.

¹²Êndêŋ lau ŋagêdô aêgeŋ tec jasôm biŋ tonec. Biŋ tau Apômtaunê biŋ atom. Ŋac buŋa teŋ embe ênam samuco teŋ ma awê tau embe têtac êwiŋ gebe êŋgôŋ êwiŋ ŋac tonaŋ, naŋ ŋac tau êwi eŋ siŋ atom.

¹³Ma awê buŋa teŋ embe ênam ŋac samuc teŋ, ma ŋac tau embe têtac êwiŋ gebe êŋgôŋ êwiŋ awê tonaŋ, naŋ awê tau êwi nê akweŋ tonaŋ siŋ atom,

¹⁴gebe ŋac samuc êtu Anôtônê gêŋ êtu ênê awêŋa, ma awê samuco êtu Anôtônê gêŋ êtu ênê akweŋŋa. Embe amboac tonaŋ atom, go nêm ŋapalê têtu gêŋ sec, mago êsêac têtu Anôtônê gêŋgac.

¹⁵Mago samuco to ŋac, taŋ sêjam lau buŋa naŋ, embe sêkac tauŋ su aŋga lau buŋa nêŋ, go sêŋgôm. Biŋ amboac tonaŋ êkôniŋ awê buŋa to ŋac buŋa tôŋ atom. Anôtô kêkalem amac gebe amoa tobiŋmalôgeŋ.

¹⁶O awê tau, aôm oc ônam nêm akweŋ kêsi. Kôjala biŋ tonaŋ me masi. O ŋac tau, aôm oc ônam nêm awê kêsi. Kôjala biŋ tonaŋ me masi.

¹⁷Aê kamasaŋ biŋ tonec gêdêŋ gôlôac dabuŋ samob gebe Lau samob sêsa nêŋ lêŋ êtôm taŋ Apômtau gêjac sam moasiŋ gêdêŋ êsêac gêdêŋ-gêdêŋgeŋ ma êtôm taŋ Anôtô kêkalem êsêac naŋ.

¹⁸Anôtô embe êkalem ŋac, taŋ sêsa eŋ su naŋ, go ŋac tau ênam tau auc atom. Embe êkalem ŋac samuc teŋ, go sêsa ŋac tau atom.

¹⁹Sêsa lau me sêmoa amboac lau samuc, biŋ tau tonaŋ ŋanô masi. Gêŋ ŋanô tau tonec gebe sêmansaŋ Anôtônê biŋsu.

²⁰Kôm taŋ lau sêjam gêdêŋ taŋ Anôtô kêkalem êsêac naŋ, sêsap tôŋmaŋ.

²¹Gêdêŋ taŋ Anôtô kêkalem aôm naŋ, aôm oc kôtu ŋac teŋ nê gêŋôma me. Embe amboac tonaŋ, go biŋ tau êkêŋ wapac aôm atom. Mago embe sêŋgamboac aôm su, naŋ ômoa nêm lêtêgeŋ.

²²Gêŋôma taŋ Apômtau kêkalem eŋ naŋ, kêtu Apômtaunê ŋac, taŋ kêgaboac eŋ su jagêmoa nê Iêtêgeŋ naŋ. Ma ŋac, taŋ gêmoa nê Iêtêgeŋ ma Apômtau kêkalem eŋ naŋ, jakêtu Kilisinê gêŋôma.

²³Anôtô gêjam ôli amac ŋa ŋaôli kapôêŋ, amboac tonaŋ atu ŋamalacnêŋ gêŋôma atom.

²⁴O lasitêwaac, kôm taŋ lau sêjam gêdêŋ Anôtô kêkalem êsêac sêmoa naŋ, sêsap tôŋ êndêŋ-êndêŋgeŋ sêwiŋ Anôtômaŋ.

²⁵Aê katap Apômtaunê biŋsu teŋ kêpi lau, taŋ sêjam awê to ŋac atom naŋ, sa atom. Mago Apômtau taê walô aê tec katu ŋac ŋaŋêŋ. Amboac tonaŋ jasôm ŋoc taêc gêjam lasê ma amac akêŋ êwiŋ ŋoc biŋ.

²⁶Aê taêc gêjam amboac tonec gebe galoc gêŋwapac tec gêc. Tec ŋamalac embe sêmoa amboac sêmoa, oc ŋajam.

²⁷Aôm gôjam awê sa su me. Tec ôŋgôm gêŋlêlôm gebe ôwi eŋ siŋŋa atom. Ma aôm tonaŋ gôjam awê atom me. Tec onsom awê atom.

²⁸Mago aôm embe ônam awê sa, oc ôŋgôm sec atom. Ma awêtakiŋ embe ênam ŋac, oc êŋgôm sec atom amboac tonaŋgeŋ. Mago gêŋwapac nom ŋa oc êtap lau amboac tonaŋ sa, tec aê gabe jambôc auc êndêŋ amac.

²⁹O lasitêwaac, aê jasôm ŋoc biŋ tonec gebe Têm kêtu dambê sugac, amboac tonaŋ êsêac, taŋ sêjam awê sa su naŋ, sêmoa amboac sêjam awê atom.

³⁰Êsêac taŋ têtaŋ naŋ, sêmoa amboac têtaŋ atom, ma êsêac taŋ têntac ŋajam naŋ, sêmoa amboac têntac ŋajam atom. Êsêac taŋ sêjam ôli gêŋ naŋ, sêmoa têtôm lau, taŋ nêŋ waba masi.

³¹Ma êsêac, taŋ sêjam kôm kêpi gêŋ nomŋa sêmoa naŋ, sêmoa têtôm lau, taŋ sêjam kôm tonaŋ atom, gebe nom tonec oc ê su ênaŋa.

³²Aê gabe amac apô sim taôm atom. Ŋac taŋ gêjam awê atom naŋ, kêpô sim tau kêtu Apômtauŋa, gebe Apômtau êlic eŋ ênac mataanô ŋajam.

³³Ŋac taŋ gêjam awê sa naŋ, kêpô sim tau kêtu gêŋ nomŋaŋa, gebe nê awê êlic eŋ ênac mataanô ŋajam.

³⁴Amboac tonaŋ nê ŋalêlôm gêja lu. Ma awê, taŋ gêjam ŋac sa atom to awêtakiŋ sêpô sim tauŋ kêtu Apômtauŋa gebe êsêac ôliŋ to nêŋ ŋalau têtu Apômtaunê gêŋ. Mago awê, taŋ gêjam ŋac sa naŋ, kêpô sim tau kêtu gêŋ nomŋaŋa, gebe nê akweŋ êlic eŋ ênac mataanô ŋajam.

³⁵Aê kasôm biŋ tonaŋ gebe ênam amac sa. Aê gabe jawa lakô amac atom, aê taêc gêjam gebe amac atu lau mansaŋ to ŋaŋêŋ asap Apômtau tôŋ totêmtac makeŋgeŋ.

³⁶Embe sê awê to ŋac gebe sênam tauŋ, mago sênam tauŋ sebeŋ atom, ma ŋac tau embe taê ênam gebe lêŋ tonaŋ keso, ma têtac êkac eŋ gebe sênam tauŋ ŋagaô, naŋgo sêŋgôm ŋanô êsa êtôm eŋ taê gêjam. Oc sêŋgôm sec atom, sênam tauŋmaŋ.

³⁷Ma ŋac embe taê ênam êtu tôŋ ma biŋ teŋ êkac eŋ atom, ma nê ŋaclai êtôm gebe ênam gôliŋ tau ma êmansaŋ nê ŋalêlôm gebe ênam awê atomgeŋ, oc ŋajam amboac tonaŋ.

³⁸Amboac tonaŋ ŋac teŋ embe ênam awê, oc ŋajam, ma teŋ embe ênam awê atom, oc ŋajam êlêlêc.

³⁹Sêmôcwalô gêbiŋ awê tamiŋ nê akweŋ kêtôm têm, taŋ nê akweŋ gêmoa mata jali. Embe nê akweŋ êmac êndu, go awêtuc êtôm gebe ênam ŋac teŋ sa êtôm têtac êwiŋ. Tageŋ ênam to Apômtaugeŋ.

⁴⁰Mago awêtuc embe êmoa amboac awêtuc, oc aoc êôc eŋ êlêlêc. Ŋoc taêc gêjam tau tonaŋ, ma aê gabe oc kakôc Anôtônê Ŋalau sa amboac tonaŋ.