1Nëbi mimbi dada uaboed isombi. Aid isun ëmbi tantiacpaden chiembique. Tantiata. Chido inquid dadatedida ictiad quequin mimbi tantiapec. Padnuen, Chido bedenquio iquembi, quesho chido inta cainda caimbi mibi.
2Esuquidistu tantiesa yec ambi chudtemaid chudquid Codinto yacno tabadquid utsibo dadpen iquec. Aidpadquid icmane quiash chido abentsëc inquid dada ictiad. Adecbidi dada abentsëcshun inaid chido ictiad.
3Con chido ëmbi inaid nec, quequin aiduidi chudquid icta. Adecbidi con bënë ëbi inquid nec, quequin aiduidi chudmequid chido nec.
4Chidon dada daëdash aton bënën dadabidi nec. Adecbidi dadan dada chidon dadabidi nec.
5Aid daëdi daëdabi yacbimboec, Padi, quenda. Adboedi, Nuquin Papa chuinuec nëidtedi ushquin padenquio nuqui iquec, queshun ënta. Aidtedec ushquin padenquiocshon, Ëmbi yuen ëntiapimbocsho isun Satanasën icsamenushe queshun padpiden nata.
6Ënta quenquio iquebi. Nëidtedi ushquin padenquio iquembi quiash mibi daëdi aidtedecuidi ushec ënëdta caimbi.
7Padnuen, chido inesa ëbi yacpadec dadatedi icpashun. Dada utsi-utsiec Nuquin Papan icmiacpaden chido inquid icnubi utsi-utsiec chido inesa iquec.
8Chido inesa ëbi tabadacpadec dada utsitedi tabadec bëdambo ictsiash. Adecbidi dadan inaidpen bëdambo ictsiash chido. Dada bënua adecbidi bëdambo ictsiash.
9Adquid icquin isuidtiapimbo yec comapenec chudte bunquin chido inta. Adecbidi chido bënua dada isuidtiapimbo iquec dadan inaid icta.
10Daëdash niamënenda. Ëmbibi chienquiocquin Nuquin Icbon aden chuinëdacpadembi chiembique. Tantia.
11Min bënë nianash utsin inaid iquenda. Dadan inaid icnu quec mimbi niamboedën inaid icoata. Adembidi chido inquid min chido bunenquiocquin abi icsaid dada uashun ismequin nidmenda.
12Nëbi Nuquin Icbon naden chuiban cainquiocnobi ëmbia Esuquidistu tantiaquid icquin Esuquidistu tantiaquid utsibo ëmbi chuibocpadembi mibitedi chuioaimbique. Tantia. Dada aton chidobëdi Esuquidistu tantiesa icboedi aton bënë Esuquidistu tantiaquid yanuc aton chido padenquio yec, Con bënë nianu, quenquio ictsiash. Adquid icsho isash. Con chido icsambocquid nec, quenquio yec abëdi tabadquid bënë.
13Adecbidi chido utsi aton bënëbëd Esuquidistu tantiesa icboedi aton chido Esuquidistu tantiaquid yantsiash. Aden Esuquidistu tantiash, Con bënë icsambocquid nec, quenquio yec bënë nianec nidesa chido.
14Esuquidistu tantiabi yec daëdacpadec aton chido Esuquidistu tantiaquid yanash aidbëd abentsëc yacbimboec tabadec bënë. Adec bëdamboec tabadsho isun Nuquin Papan chido bëdamboen tabadmequin bënëtsen bëdambo icmebampec. Chido Esuquidistu tantiaquid icquin aton bënë padenquiocnobi aton bacuëbo tantiec, Icsambocquidën bacuëbo nec, utsibo quenushe quiash bënëbëd abentsëc yacbimboec tabadquid chido. Adecbidi dada Esuquidistu tantiaquid icquin aton chido padenquiocnobi adomboembidi aton bacuëbo tantiec aton chido Esuquidistu tantiesabëd tabadquid dada. Adec abentsëc yacbimboec tabadsho isun, Bëdambocquidën bacuëbo nec, quequin utsibon ispec.
15Utsimbic ambi bedboedën aton chidon Esuquidistu tantiasho isun aton chido nidta catsiash. Adoaquien, Mibëd tabadte bunebique. Ëbi nidmenda, quetsiash chido bënë caic. Adoaqui, Nidec nid, cac cacuidenquio yec nidquid chido. Chido utsibic aton bënë Esuquidistu tantiaquid yansho isash, Mibi nianu, quetsiash. Adoaquien, Mibi unësquio iquec, quetsiash bënë.
16Adnubien dadan nidta caid aton chido Esuquidistu tantiaquid yec bëdambocquid icsho isash Esuquidistu tantiaquidtsen yantsiash bënë. ¿Adquid yantsiash, quequin tantienquioda mimbi icpe? Adecbidi, chidon nianu caid aton bënë bëdambocquid icsho isash Esuquidistu tantiaquid chidotsen yantsiash. Adecbidi ¿Adquidtsen yantsiash, quequin tantienquioda mimbi icpe?
17Mibi Esuquidistu tantiaquid yanash Nuquin Papan tantiacpadec tabadnu quiash adequi tabadta. Adomboembidi Esuquidistu tantiec iccuededquid utsibo chuibanombi.
18Esuquidistu tantiesa shui dëbid dëteshunaid yec Esuquidistu tantiaquid yanash ëbi shui dëbid dëteshunacmaidbimboecnuc nacnemenu quenquio yec tabadta. Adecbidi, Esuquidistu tantiesa shui dëbid dëteshunacmaid yec Esuquidistu tantiaquid yanash shui dëbid dëtemenu quenda.
19Shui dëbid dëteshunaidta nec, quenquio yec Nuquin Papa tsadec. Adecbidi, Shui dëbid dëteshunacmaidta nec, quenquio yec Nuquin Papa tsadec. Adquid nec quenquio yec, Ëmbi chiacpadomboen nadenequidta nec, quec Nuquin Papa tantiec tsadec.
20Adec Nuquin Papa tantiec tsadnuc yua Esuquidistu tantiaquid yanash yuapen icnu quenquio yec tabad. Adecbidi, utsin yuapenquio yec utsin yua icnu quenquio yec tabadoa.
22Yua Esuquidistu tantiesa icboedi Esuquidistu tantiaquid yansho isun, Yua nec, cainquio icquin Nuquin Icbon cuënendac. Adembidi, utsin yuapenquio Esuquidistu tantiesa icboedi Esuquidistu tantiaquid yanash Nuquin Icbon namiaidquio nendac.
23Matses icsaquid icsho cuidnushe quiash abided cuidadec unësquid Esuquidistu Nuquin Papan icmiac aid tantiaquid iquec, Con icbo nec, quiash utsin yuaid iquenda.
24Adembidi chuinu. Tantiata. Nuquin Papan mibi cuënuc matses yec Esuquidistu tantiaquid yanash, Ëbëd tabadquid con Icbo nec, quec matses yec bëdamboec tabadta.
25Chido inesabëdta dadan inacmaid chuita quequin mimbi dada uaid isun aidotsen chiembi. Aido tantiaquin naden chuita Nuquin Icbon cainquio yaqui Nuquin Icbon ëbi chuibeneta caid icquin naden mibitedi chiembique. Tantia.
26Natiatequid icnuc Esuquidistu tantiaquid chido inesa yec adequi tabad. Adecbidi, dadan inacmaid yec adequi tabadta chido.
27Chido inquid yec chido inesa icnu quenda. Adecbidi, chido inesa yec chido inu quenda.
28Chido inesa icboedi chido inquid yanash Nuquin Papan chiaid niaquesa nec. Adecbidi, dadan inacmaid icboedi dadan inaid yanash Nuquin Papan chiaid niaquesa chido nec. Natiaic cametequid icnuc, ¿Mitsipadentsimbi con chidobëdta con bacuëbo bëdambo icmepeba? quec chido inquid tabadec. Chido inesain aden tantienquio yec tabadec. Natiaic cametequid choec quec chido inesa yec adequi tabad. Adecbidi, dadan inacmaid yec adequi tabadta, quequin mibi chiembi ma natiamianquiec quenquio yec ma mibi tabadnueshun.
29Ëmbi chuiboed mibi bëdamboen tantiamembique. Tantia. Nidaidën yuec tabadnu, quetiapimbo nuqui iquec. Nuquin Papa chieshënte ushë chonoc abi tantiaquid dadpen mëyansho isash Esuquidistu chote anoentsëqui yaneque. Abi yacno utsibo puduedtiapimbo icnushe queshun min chido icnubi Nuquin Papa bunacpadomboen nabanec tabadta.
30Adecbidi, unësquio yec shubiquimbi Nuquin Papa bunacpadomboen nabanec tabadta. Adecbidi, bëdambo yequi Nuquin Papa bunacpadomboen nabanec tabadta. Adecbidi, mitsana icnubi aid tantienquio yec Nuquin Papa bunacpadomboen nabanec tabadta.
31Yuecshun ëmbi nidaidënshun bedaid Nuquin Papan ëmendac, quequin tantiaquin ambi chiacpadomboen nabanec tabadta.
32Natiatequid nibëdpashun, queshumbic natiamiantequid iquendac, quequin tantiembi. Aden tantiaquin chido inesa icta caombi. Chido inesa Esuquidistu tantiaquid icquin Nuquin Papan tantiacpadenuidi nanu queshun aden nabanec tabadpec.
33Chido inquidien, Nuquin Papan tantiacpadenuidi nanu quiash, ¿mitsipadentsimbi con chidobëdta con bacuëbo bëdambo iquebi camepeba? quec tabadec.
34Adquid Nuquin Papan tantiacpadenuidi nanu quetiapimbo iquec. Dadan inacmaidien Esuquidistu tantiaquid Nuquin Papan tantiacpadenuidi nanu quec adequi tabadpec. Dadan inaidien, Naden nashunacsho con bënën bëdamboen istsiashi, quec tabadec.
35Aden mibi chuibanquimbi chido inesa chido bednu quesho, Chën, caisa nebi. Nuquin Papan chiacpadomboen nabamboedëmbi utsi uain tantianushe queshun ëmbi tantiaid chuibanec nebi. Nuquin Papan tantiacpadomboen bëdamboen tabadmenuequin aden tantiaquin chuibanec nebi.
36Adembidi, Min champi bednu queboed chudte bunec mëmuntiapimbo icsho isun, Inec cho, cata. Min champi imec icsatiapimbo mibi iquec. Adecbidi, dadan inacmaid macho budsho isash, Bacuë tishtiapimbo yantsiash, quiash, Con champi inec cho, quiash icsatiapimbo adquid icoaic.
37Adecbidi, min champi inu queboedi, Bedenquio iquembi, quesho tantiashun menenda. Aden bedmenquio yec mibi bëdambo icpec.
38Con champi bedec cho, queshun bedmiash, Bëdambo iquebi, quenubi, Con champi dadan inacmaid iquec quec bëdamboshë utsi icpec.
39Dadan inaid icquin min bënë nianenda. Min bënë unësan utsin inaid icnu quiash adta. Esuquidistu tantiesan inaid iquenda.
40Bënua utsin inacmaid icnu quiash bëdamboshë iquec aid. Ëmbi tantiacpaden ëmbi chuiboed Nuquin Papan Mayanën tantiamiacpaden chiaid nec.
