1ᤜᤧᤰᤁᤣ ᤔᤧᤳᤋᤢᤛᤡᤒᤠ ᤋᤢᤰᤛᤡ (᥌) ᤕᤧᤴ ᤀᤣᤃᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤠᤁᤢᤒ ᤏᤢ ᤁᤢᤴᤛᤠ᤹ ᤕᤢᤜᤢᤴᤏᤠ᤺ᤴ ᤂᤢᤏᤧ᤹ᤏᤢ ᤌᤥ ᤁᤣ᤺ᤶᤒᤠ ᤁᤥ᤺ᤰᤔᤠᤀᤥ ᤋᤣ᤹ᤖᤢᤛᤡ॥
2ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤖ ᤔᤧᤒᤳᤇᤧᤸᤗᤧᤀᤣ ᤕᤧᤛᤢᤖᤧ ᤁᤢᤏᤠᤀᤡᤒᤣ᤺ᤰ ᤗᤧᤱᤛᤡᤱᤗ ᤐᤣ. ᤜᤧᤰᤁᤩᤠᤱ ᤁᤢᤏᤠᤖᤠ᤺ᤴ ᤏᤠᤶᤔᤡᤴ ᤁᤢᤀᤡᤛᤡ᤺ᤰ ᤗᤧᤰᤋᤧ ᤜᤧᤰᤁᤩᤠᤱ ᤁᤢᤍᤣ᤺ᤳᤋᤡᤴᤏᤠᤱ ᤔᤡᤰᤁᤡᤴ ᤆᤧᤔᤢᤖ ᤀᤥ᤺ᤳᤋᤧᤖᤥ॥
3ᤜᤰᤆᤄᤳ ᤂᤧᤵᤔᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤔᤥᤛᤠ᤺ᤴ ᤏᤢ ᤀᤣᤗᤡᤕᤠ᤺ᤴᤏᤠᤱ ᤌᤠ᤺ᤶᤏᤧᤳᤇᤡᤀᤠᤱ ᤕᤧᤛᤢ᤺ᤴᤏᤢ ᤋᤠ᤹ᤈᤧᤰᤂᤧᤳᤇᤡ॥
4ᤐᤋᤪᤢᤛᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤍᤠᤱᤒᤣ. ᤀᤠᤏᤡ᤹ ᤁᤵᤔᤥᤀᤣ ᤘᤠ᤹ᤔᤠ ᤏᤢ᤺ᤒᤠ ᤐᤥ᤺ᤱᤗᤥ॥ ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤛᤢᤶᤛᤡ ᤕᤠᤰᤛᤠᤜᤠ᤹ ᤆᤥᤃᤢᤱ. ᤌᤡᤰ ᤂᤧᤏᤧ᤹ᤀᤡᤴ ᤜᤧᤰᤁᤩᤠᤱ ᤔᤥᤛᤠ᤺ᤴ ᤏᤢ ᤀᤣᤗᤡᤕᤠᤖᤧ ᤂᤢᤴᤇᤡ᤹ ᤗᤠᤃᤡᤀᤠᤱ ᤌᤡᤰ ᤌᤡᤰ ᤆᤥᤃᤢᤱᤗᤥ॥”
5ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤀᤣ ᤑ᤺ ᤗ᤹ᤖᤡᤰ ᤁᤧᤀᤥ᤺ᤵᤐᤠ ᤂᤠᤵᤔᤡ᤺ᤳᤋᤡᤸᤗᤧ ᤆᤡᤍᤧᤵ ᤋᤧᤵᤋᤢᤛᤡᤀᤠᤱ ᤂᤠᤵᤔᤡ᤺ᤳᤋᤥᤗᤠᤶ ᤀᤰᤋᤱᤒᤠ ᤀᤡᤰᤗᤠ ᤔᤧᤄᤧᤵᤛᤢ. “ᤁᤴ ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤖᤥ. ᤂᤢᤏᤧ᤹ᤏᤢ ᤀᤡᤱᤃᤠ᤹ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥”
6ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤸᤗᤧ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤂᤠᤶᤔᤥ ᤛᤠᤶᤒᤥ᤺ᤴ ᤜᤒᤳ ᤔᤧᤓᤴᤇᤡᤱᤗᤥ॥
7ᤁᤖ ᤕᤧᤛᤢ᤺ᤴ ᤂᤧᤵᤔᤥ ᤋᤩᤧᤀᤠᤱ ᤂᤧᤱᤜᤠ᤹ ᤛᤢᤛ᤻ᤛᤢᤛᤡᤖ ᤔᤧᤳᤋᤢᤛᤡ. “ᤐᤥᤃᤧᤶᤔᤧ᤹. ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥”
8ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤸᤗᤧ ᤂᤧᤵᤔᤥ ᤕᤧᤛᤢ᤺ᤴᤏᤢ᤺ᤴᤗᤰ ᤘᤕᤧ ᤁᤖ ᤘᤣ᤹ ᤜᤠ᤺ᤳᤋᤠᤱ ᤜᤥ᤺ᤵᤋᤧᤖᤥ॥
9ᤂᤧᤱᤜᤠ᤹ ᤁᤥ᤺ᤰᤔᤠᤗᤠᤶ ᤕᤥ ᤔᤧᤎᤩᤧᤖ ᤔᤧᤒᤳᤇᤧᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤀᤡᤱᤈᤠ᤺ᤱ ᤐᤡᤖᤢᤛᤡ. “ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤴᤜᤡᤱᤅᤣ ᤌᤠᤖᤡᤰ ᤁᤴ ᤁᤧᤏᤡ᤺ᤛᤢᤶᤒᤠ ᤐᤠ᤺ᤴᤜᤠ᤹ ᤀᤠᤳᤋᤡᤴᤏᤠᤱ ᤔᤧᤈᤧᤰᤋᤧᤶᤔᤡᤴᤏᤧ᤹ᤀᤥ॥”
10ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤠ᤺ᤔᤠᤏᤢ᤺ᤸᤗᤧ ᤋᤃᤡ ᤀᤣᤗᤡᤕᤠ᤺ᤱᤃ ᤕᤢ᤺ᤔᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤒᤠᤒᤣ᥅”
11ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤛᤧᤰᤂᤠᤀᤣᤖᤥ. ᤀᤣᤗᤡᤕᤠ᤺ᤱᤃ ᤕᤢ᤹᤺ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤍᤠ᤺ᤔᤠᤴ ᤁᤧᤖᤧᤰ ᤕᤠᤖᤡᤵ ᤆᤥᤃᤢ᤹ᤖᤥ॥
12ᤁᤖ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤣᤗᤡᤕᤠ᤺ᤴ ᤋᤩᤧ ᤆᤢᤖᤧᤀᤠᤱ ᤘᤠ᤹. ᤁᤖ ᤔᤏᤠᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤏᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤡᤱᤘᤠ᤹ ᤌᤠᤵᤌᤠᤵ ᤔᤧᤔᤧᤳᤋᤢᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤔᤧᤴᤇᤠᤶᤛᤠ᤺ᤴᤏᤠᤱ ᤂᤢᤏᤡ᤹ ᤜᤢᤰᤁᤥ ᤌᤠᤀᤠᤱ ᤋᤢᤰᤂᤣ ᤆᤠᤖᤥ॥”
13ᤜᤧᤰᤁᤩᤠᤱᤗᤰ ᤕᤧᤛᤢᤖᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤳᤋᤢᤛᤡᤒᤠ ᤑᤠ᤹ᤀᤠᤱ ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ॥
14ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤠᤶᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤔᤧᤃᤧᤖᤧᤸᤗᤧ ᤂᤧᤵᤔᤥ ᤔᤏᤠᤎᤡᤰ ᤕᤧᤛᤢᤖᤥ ᤋᤩᤧᤀᤠᤱ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗ
15ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤀᤠᤛ᤻ᤛᤠ᤺ᤴ ᤗᤢᤱᤔᤠ᤹ ᤋᤢᤰᤋᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤂᤧᤴᤏᤡᤴ ᤌᤵᤔᤠᤔ᤺ᤔᤧᤸᤗᤧ ᤕᤠᤱᤄᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤠᤖᤥ॥ ᤀᤧᤳᤗᤧᤱ ᤂᤧᤴ ᤆᤫᤠ᤺ᤳᤋᤥ ᤏᤢ ᤔᤡᤀᤥ ᤌᤠ᤺ᤖᤥ॥
16ᤂᤧᤴ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤥ ᤔᤧᤘᤣ᤺ᤴᤍᤢᤖ ᤑᤠ᤹ᤀᤠᤱ ᤋᤠᤖᤢᤱ. ᤁᤖ ᤂᤧᤱᤜᤠ᤹ᤖᤧ ᤘᤣ᤺ᤶᤔᤠ ᤔᤧᤴᤇᤢᤰᤋᤢᤴᤗᤥ॥”
17ᤕᤧᤛᤢᤖᤧ ᤔᤧᤳᤋᤢᤛᤡ. “ᤏᤛᤠ᤺ᤴ ᤁᤧᤜᤥ᤺ᤵᤐᤠ ᤏᤢ ᤋᤠᤰᤁᤧᤓᤧ᤹ᤒᤠ ᤔᤏᤠᤛᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤒᤠᤒᤣ᥅ ᤀᤠᤵᤑᤠᤸᤗᤧ ᤌᤠᤖᤡᤰ ᤏᤠᤛᤡ ᤌ᤺ᤳᤏᤡᤱᤒᤠᤒᤣ᥅ ᤂᤧᤴ ᤆᤢᤰᤐᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥”
18ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤑᤧ᤺ᤰᤋᤢᤀᤠᤱ ᤂᤧᤴ ᤆᤢᤰᤐᤧᤸᤗᤥᤗᤠᤶ ᤗ᤺ᤴᤍᤧ ᤐᤣᤖᤥ॥ ᤒᤠ ᤂᤧᤴ ᤕᤧᤶᤔᤥᤀᤣ ᤂᤧᤴ ᤆᤢᤰᤐᤧᤴ ᤘᤣ᤺ᤳᤋᤧᤖᤥ॥
19ᤕᤠᤱᤛᤡ ᤜᤢ᤹ᤛᤠᤶᤒᤠᤜᤠ᤹ ᤛᤫᤠ᤺ᤳᤋᤠᤱ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤀᤠᤏᤡᤃᤧ ᤂᤧᤴ ᤑᤧᤴᤛᤠᤶᤔᤡᤴ ᤏᤠ᤺ᤵᤔᤠ ᤗ᤺ᤵᤔᤠ ᤔᤧᤛᤢᤰᤋᤢᤶᤒᤧᤴᤒᤠᤒᤣ᥅”
20ᤕᤧᤛᤢᤖᤧ ᤔᤧᤳᤋᤢᤛᤡ. “ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤛᤢ᤺ᤴᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤏᤛᤠ᤺ᤴᤏᤡᤴ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤎᤡᤰ ᤕᤠ᤺ᤳᤇᤠᤱ ᤁᤴ ᤁᤥ᤺ᤰᤔᤠᤴ ‘ᤂᤧᤵᤔᤥᤗᤠᤶ ᤂᤧᤳᤇᤡᤱᤅᤧ᤹’ ᤁᤧᤔᤧᤳᤋᤢᤶᤔᤡᤸᤗᤧ. ᤂᤧᤴ ᤂᤧᤳᤇᤡᤱ ᤐᤣ᤺ᤰᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ᤗᤠᤶᤒᤠ ᤐᤥ᤺ᤱᤔᤠ ᤔᤧᤴᤇᤢᤰᤔᤏᤠ ᤌᤣᤀᤠᤱ ᤜᤥ᤺ᤵᤗᤥ॥”
21((ᤁᤖ ᤀᤰᤋᤱᤒᤠ ᤑᤧᤴᤛᤠᤶᤔᤡᤱᤃ ᤋᤢᤘᤠ ᤏᤢ ᤆᤠ᤺ᤏᤧᤳ ᤔᤧ᤺ᤴᤏᤣ ᤗ᤺ᤵᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥))
22ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤃᤠᤗᤡᤗ ᤌᤢᤶᤔᤥ ᤔᤧᤍᤩᤧᤸᤗᤧ ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤸᤗ ᤔᤧᤴᤇᤠᤶᤛᤠ᤺ᤴ ᤀᤡᤱᤔᤧᤗᤧᤰᤋᤢ᤹ᤀᤠᤱ ᤔᤏᤠᤜᤠ᤹ᤖᤥ ᤜᤢᤰ ᤔᤧᤛᤢᤵᤋᤢ᤹.
23ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤛᤧᤖᤢ᤹. ᤁᤖ ᤛᤢᤶ ᤕᤧᤴ ᤀᤣᤃᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥ᤺ᤱᤗᤥ॥” ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤥ᤺ᤶ ᤐᤢ᤹ᤖᤧᤖᤥ॥
24ᤕᤠᤱᤛᤡ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤐᤷᤏᤜᤢᤶᤔᤥ ᤔᤧᤍᤩᤧ. ᤜᤧᤰᤁᤩᤠᤱ ᤔᤠᤱᤜᤡᤶ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ᤀᤠᤱ ᤐᤋᤪᤢᤛᤖᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤁᤧᤛᤡᤰᤛᤠᤶᤒᤠᤸᤗᤧ ᤔᤠᤱᤜᤡᤶ ᤀᤣ᤺ᤱᤕᤠᤱ ᤔᤧᤜᤢᤅᤢᤴᤒᤡ᥅”
25ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤌᤣᤀᤠᤱ ᤔᤧᤜᤢᤅᤢᤴᤒᤣ᥅ ᤜᤢᤅᤢ᤹ᤖᤥ॥” ᤜᤧᤰᤁᤩᤠᤱ ᤐᤋᤪᤢᤛᤧᤴ ᤜᤡᤶᤔᤥ ᤗᤠ᤺ᤛᤧᤏᤠᤔᤧ᤺ᤴᤏᤧ ᤕᤧᤛᤢᤖᤧ ᤛᤣ᤺ᤴᤍᤥᤛᤢ. “ᤛᤡᤔᤥᤏᤣ. ᤌᤣ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤣ᥅ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ᤖᤧ ᤀᤣ᤺ᤱᤕᤠᤱ ᤀᤠᤳᤋᤡᤸᤗᤥᤗᤠᤶ ᤔᤧᤓᤥ᤺ᤰᤂᤢᤒᤣ᥅ ᤂᤢᤏᤡ᤹ ᤀᤠᤒᤠᤅᤣ ᤔᤏᤠᤗᤠᤶᤒᤠ ᤔᤧᤓᤥ᤺ᤰᤂᤢᤒᤡ. ᤀᤡ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤗᤠᤶ ᤔᤧᤓᤥ᤺ᤰᤂᤢᤒᤡ᥅”
26ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤘᤣ᤹ ᤗᤠᤈᤣ᤹ᤒᤠ ᤔᤏᤠᤗᤠᤶ ᤔᤧᤓᤥ᤺ᤰᤂᤢᤖᤥ॥” ᤕᤧᤛᤢᤖᤧ ᤔᤧᤳᤋᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤢᤏᤡ᤹ ᤀᤠᤒᤠᤅᤣ ᤔᤏᤠᤜᤠ᤹ᤖᤧ ᤜᤢᤱᤔᤠ ᤔᤧᤒᤥ᤺ᤱᤏᤧᤸᤗᤥ॥
27ᤜᤧᤰᤁᤣᤛᤠᤱ ᤀᤠᤏᤡ᤹ᤏᤢ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤔᤧᤒᤥ᤺ᤰᤏᤧᤴᤗ ᤑᤠ᤹ᤀᤠᤱ ᤃᤠᤗᤡᤗ ᤘᤖᤰᤁᤥ ᤐᤣᤃᤧ᤹ᤀᤠᤱ ᤂᤣ᤺ᤱ ᤋᤣᤛᤧ᤹ᤀᤥ॥ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤧᤍᤧᤶᤛᤢᤒᤠ ᤅᤠ᤺ᤸᤗᤧ ᤁᤢᤔᤢᤖᤠᤀᤥ ᤕᤠᤱᤀᤡᤳᤇᤡᤎᤡᤰ ᤁᤧᤄᤥ᤺ᤛᤢ᤹ᤖᤥ॥ ᤂᤧᤴ ᤋᤣ᤹ᤖᤧ᤹ᤀᤠᤱ ᤀᤠᤴᤇᤡ᤹ ᤔᤠᤱᤜᤡᤶ ᤀᤣ᤺ᤱᤕᤠᤱᤅᤡᤴ ᤜᤢᤅᤧ᤹ᤀᤥ॥”
