1मुर नेल्ल आन परमप्रभु यावे, इस्राएली आन परमप्रभुमी मोआब आ पर्बम मार लोव़ पाप्तु देंशा हना “नेबो सहर मुर मबाक्तीके दुम्ब। किरयथ-थाइम मुने दोक्ब। मेको ब्रुत। मेको आ बोल्यो दरवार नेल्ल मुने तोक्शा प्रेश्शा ताइक्चा पुंइसाक्म।
2मुल रे मोआब कली ठेयब मसेल्नीम। मुरपुकीम हेश्बोनम लोव़ गारपाइक्तेक्म। मेकोपुकीमी ‘जाक्कीन, गो मेको कली रागी का मदुम्चा ङा सेल्य। ए मादमेन सहर, इ कली यो सिक्सी पपाइक्नीम। इ कली तरवार शेशा खेदा पाइनीम’ देंतेक्म।
3नेनीन, होरोनाइम रे वाइ ब्रेश्शो नेंसीब। खतम दुम्तीके नु क्याम्तीके आ पर्बम ङाक्शो नेंसीब।
4मोआब आ आलपुकीमी ‘मोआब खतम पोक्चा पुंइसाक्व’ दे वाइ ब्रेश्शा ङाक्नीम।
5मेकोपुकी लुहीथ ङा ग्येत्थ लांमी हिशेक पा ङाक्ना ङाक्न ङोइक्नीम। मारदे हना होरोनाइम ङा लुक्च लतीक लांमी श्येत जशा ङाक्शो नेंसीब।
6प्रोक्कीन, आंम कली प्रोंइचा कली दोरीन। गोरशो रागी ङा गधा खोदेंशो दुमीन। येरमीया १७:६
7गेपुकीम इन गेय नु इन शोंपोम थमा सुइक्तीनी। गेपुकी यो ग्याइश्शा लाइक्चा पुंइसीनीनी। केमोश देवता आ चढ़ेब नु आ नोले खोइक्ब मुरपुकी नु ग्याइश्शा लाइक्चा पुंइसीब। गन्ती २१:२९; न्यायाधीस ११:२४; १राजा ११:७
8खतम पोक्ब सहर नेल्लेम जाक्ब। मिनु सहर का यो मप्रोंइसीब। बेंसी क्याम्सीब। मिनु दिंम खतम दुम्ब। परमप्रभु यावे आ देंशो मोदेंशो बाक्त।
9मोआब कली फ्रां गेन। मारदे हना मेको थमा पा ब्रुइब। मेको आ सहर श्येत्थ दुम्शा, मुर मबाक्तीके दुम्नीम” देंत।
10सु सुमी परमप्रभु यावे आ गेय देश पा पाइनीमी, मेको सराप राइनीम। आंम तरवार कली हुश ख्राक्श पोक्तीके रे तेक्ब सराप राइनीमी।
11मोआब आ ठिटा रेन नांइसीशा बाक्शो बाक्ब। मेको गरमी कुर पा वोइश्शो अङगुर शांबु खोदेंशो बाक्ब। मेको ग्योंब का रे अर्को ग्योंबुम मलेशो बाक्ब। मेको ग्याइश्शा लाइक्चा मपुंइसीशो बाक्ब। मोपतीके मेको ङोंइती ङा खोदेंशोन बाक्ब। मेको आ ब्रोव़शो रिना मजाम्शो बाक्ब। सेफन्याह १:१२
12मोपतीके परमप्रभु यावेमी “गो गर रे मोइक्ब आन कली मेको आ बाक्तीके सोइक्नुङमी। मिनु मेकोपुकीमी मेको मोइश्शा, गर श्येत्थ सेल्शा प्रोल्नीम। मेको नाक्त थमा पा जाक्ना जाक्न बाक्ब।
13दोपा इस्राएल आ मुर आंम थमा सुइश्शो बेथेल रे पा मुने तोक्चा पुंइसमा, मोपा मोआब यो केमोश रे पा मुने तोक्चा पुंइसीब।
14गेपुकीम ‘गोपुकी बोल्यो नु सक्ति पाइश्शो लडाइ पाइब बाक्नीकी’ दे दोपा देंने चाप्नीनी?
15मोआब नु आ सहर आन कली खतम पोक्ब जाक्त। मेको आ नेल्ल क्येङा रिम्शो ठिटा मुर नेल्ल साइक्चा पुंइसीचा कली लाम्तेक्म” दे पिपम देंत। मेको आ नें मुर नेल्ल आन परमप्रभु यावे बाक्ब।
16मेकोमी “हिंचा ङा श्येत जतीक नाक्ती मोआब आ नेक्था जाक्शो बाक्ब। मेको आ श्येत जतीके रीब पा जाक्ब।
17मेको आ एर ओंथ बाक्ब नेल्ल नु मेको आ पशो तुइक्ब नेल्ल मेको आ पर्बम रोंका पने। मिनु ‘दोपा सक्ति पाइश्शो राज्य क्याम्चा पुंइसे। पिप आ कोक्के दोपा जिक्मे’ देनीन।
18ए दीबोन ङा तमी, गे ठेयब नित्तीके रे तोइश्शा, सोव़शो रागीम निस्सो। मारदे हना मोआब कली खतम पोक्ब इ कली लडाइ तोचा कली जाक्त। मेकोमी इ गारो हिरशो सहर नेल्ल खतम पोक्तु।
19आरोएर सहरम बाक्बपुकी लांमी राप्शा कोव़ङीन। प्रोक्शो वोंइश मुर नु मीश मुर आन कली ‘मार, दुम्मे’ दे हिल्लो पने।
20मोआब ब्रुत। मेको मुने दोक्त। रोंका पा ङाक्कीन। ‘मोआब मुर मबाक्तीक दुम्त’ दे अरनोन खोला आ शुंइचीम लशा देनीन।
21डांडा तार ङा दिंमम निसाफ पतीके नाक्ती जाक्शो बाक्ब। होलोन, याहसाह नु मेफा-आथ,
22दीबोन, नेबो नु बेथ-दिब्लाथाइम आन तारी,
23किरयथ-थाइम बेथ-गामुल नु बेथ-मेओन,
24केरयोथ, बोज्रा नु मोआब आ नेक्था नु ङोन ङा सहर नेल्ल आन तारी निसाफ पतीके जाक्शो बाक्ब।
25मोआब आ ग्रोव़ ख्रोइक्साक्व। मिनु मेको आ गुइ जिक्त” दे परमप्रभु यावेमी देंत।
26मिनु लेंशा “मेको कली दुक्पतीन। मारदे हना मेको ठेयब लेश्शो बाक्ब। मोआब आ मेशोमी दिङ दाङ गोल्ल। मिनु मेको शुक्शी पाइक्चा पुंइसीब दुम्ल। येरमीया २५:१५
27मार, गे इस्राएल कली शुक्शी पशो मनवे? मेको खुइ आन दातेमी ग्याइक्चा पुंइसे ङा, मेको आ पर्बम लोव़ पामेनु, इ पिया हिक्शा शुक्शी पवी?
28मोआबम बाक्बपुकी, इन सहर प्रोंइशा, फुल्लु मेर लशा बाक्कीन। रोंगु ङा ढोडोङगा आ शोव़म ग्योव़ सेल्ब ढुकुर खोदेंशो दुमीन।
29गो मोआब आ ठेयब लेश्शो आ पर्बम लोव़ नेंतक। मेको आ ठेयब दुम्तीके, बोरतीके, ठेयब लेत्तीके नु थुं ङा ठेयब दुम्तीके आ पर्बम नेंतक।
30गो मेको आ ठेयब लेश्शो तुइक्नुङ। तन्न मेको आ ठेयब लेश्शो मारेइ मबाक्ब। मिनु मेको आ गेय जाम्शा लाइब बाक्ब।
31मोपतीके गो मोआब आ पर्बम रोंका पाइनुङ। गो मोआब नेल्ल आन पर्बम ङाक्नुङ। गो कीर-हेरेस ङा मुर आन पर्बम हिशेक पाइनुङ।
32गो याजेर ङाक्शो क्येङा इ पर्बम शुश ङाक्नुङ। ए सिब्मा ङा अङगुर बोटपुकी, इन राशी समुन्द्र आ आइक्ची हांबु जाक्दीत्तेक्म। मेकोपुकी याजेर ङा समुन्द्र सम्म जाक्दीत्तेक्म। इ मीशो फल फुल नु इ अङगुर खतम पोक्ब जाक्तेक्म।
33मोआब ङा फल फुल रू रे ग्येरतीक नु थुं नाइश्शा बाक्तीके जाम्ने थुम्तु। गो अङगुर ख्राक्तीक तेक्ता। सुइमी ग्येरशा ग्रीशा, मख्राक्नीम। मेको आन वाइ ब्रेश्शो ग्येरशा वाइ ब्रेश्शो ममाइ।
34हेश्बोन नु एलेआले वाइ ब्रेत्नीस। मेको याहास सम्म नेंसीब। सोआर रे होरोनाइम, एग्लाथ-शेलीशीया सम्म वाइ ब्रेश्शो नेंसीब। मारदे हना निम्रीम ङा ब्वाक्कु यो सोव़ने थुम्शो बाक्ब।
35गो मोआब कली खतम सेल्नुङ। डांडा ङा थानम चढ़ेब नु देवी देवता आन कली धूप चोइब आन कली खतम सेल्नुङमी” दे परमप्रभु यावेमी देंत।
36मिनु परमप्रभु यावेमी “मोपतीके आं थुं बांसुरीम खोदेंशो पा मोआब आ पर्बम रोंका पाइब। आं थुं कीर-हेरेस ङा मुर आन पर्बम बांसुरीम खोदेंशो पा रोंका पाइब। मेको आन चेम्शो शोंप नेल्ल जाम्त। यसैया १५:७
37मेको नेल्लेम आन चां प्रेक्शो बाक्नीम। मिनु आन गल शोक्रे यो ख्रोइश्शो बाक्नीम। मेको नेल्ल आन गुइ चेश्शो बाक्नीम। मिनु आन क्रातो भाङग्रामी गिल्सीशो बाक्नीम। येरमीया १६:६
38मोआबी आन खिं तारी नु लां मेर रोंका पशो ङा लाक्शा अर्को मारेइ मनेंसीब। मारदे हना गो मोआब कली सुइम ममाल्चा ङा ग्योंब खोदेंशो पा प्रोल्ता” दे परमप्रभु यावेमी देंत।
39मेको दोपा ब्रोल्मे, मोपा रोंका पाइनीम। मोआब दोपा मुने दोक्शा आ कुल ख्रुइक्ता, मोपा मोआब आ एर ओंथ बाक्ब नेल्लेम मेको आन पर्बम शुक्शी पा हिंशा कोव़चा ङा दुम्शो बाक्ब।
40मिनु परमप्रभु यावेमी “कोव़ङीन, मेको ककाकुली खोदेंशो पा जुक्ब। मेको आ फ्रां हाम्शा, मोआब तारी जुक्ब। येरमीया ४९:२२
41केरयोथ नु अरु सहर ब्रुइनीम। आन जोरी सत्रुमी मेको आन हिरशो सहर आन के सेल्नीम। मेको नाक्ती मोआब ङा लडाइ पाइब आन थुं सुत्केरी रोइ पशो मीश मुर आन थुं खोदेंशो दुम्नीम।
42मोआब रागी का दुम्शा मलीचा ङा पा खतम दुम्त। मारदे हना मेको परमप्रभु यावे आ ङोंइती ठेयब लेश्शो बाक्त।
43मोआबम बाक्बपुकी इन ङोंइती हिंचा ङा बिक्तीके नु ब्वारद बाक्नीम। यसैया २४:१७-१८
44हिंचा ङा श्येत रे प्रोक्ब बिक्तीकेम बिक्नीम। मिनु बिक्तीके रे ङोइश्शा ग्रूब ब्वारदम रेत्चा पुंइसीनीम। मारदे हना गो मोआब कली आ सजाइ गेतीक बर्सम मोदेंशो पाइनुङ” दे परमप्रभु यावेमी देंत।
45परमप्रभु यावेमी “प्रोक्बपुकी हेश्बोन आ वांकुमी दिक्नीम। मारदे हना हेश्बोन रे मी का ग्रूत। सीहोन आ खिं रे मी ग्रूत। मेकोमी मोआब आ कुप्फ नु जीब नु मरिम्शो पाइब आन पिया जेप्ब। गन्ती २१:२८-२९
46आबी, आबी, मोआब, केमोश देवता आ मुर बेक्तेक्म। इ तौपुकी ग्याइश्शा लाइक्चा पुंइसाक्म। इ तमी ग्याइश्शा लाइक्चा पुंइसाक्म।
47मो हना यो गो नोले ङा नाक्ती मोआब आ शोंप लेश्शा गेनुङ। मोपा मोआब आ निसाफ नुप्त” दे परमप्रभु यावेमी देंत।
