1परमप्रभु यावे आ लोव़ पाइब येरमीयामी, यरूसलेम ङा ग्याइश्शा लाइक्चा पुंइसीशो आन दाते ङा ब्रोंइशा लीशो खाल्पा आन कली एको चिठी ब्रेक्शा सोइक्ताक्व। बेबीलोन ङा पिप नेबुकदनेसरम यरूसलेम रे चढ़ेब, परमप्रभु यावे आ लोव़ पाइब नु मुर नेल्ल आन कली ग्याइश्शा बेबीलोन लाइश्शो बाक्त।
2पिप येकोन्याह आ ममा, दरवार ङा ठेयब मुरपुकी, यहूदा नु यरूसलेम ङा सरकार आ गेय पाइब, रिम्शो पा मारेइ मारेइ सेल्स जोल्ब मुर नु तुप्तीलपुकी यरूसलेम रे ग्याइश्शा लाइक्चा पुंइसीमा नोले मेको चिठी ब्रेक्शो बाक्ब। येहो-याकीम आ नें २राजा २४:६ योयाकीन बाक्ब। तन्न येरमीया २२:२४ आ नें कोन्याह बाक्ब। मिनु येरमीया २४:१ येकोन्याह यो देंनीम।२राजा २४:१४-१५
3मेकोमी मेको चिठी शाफान आ तौ एलासाह नु हिल्कीयाह आ तौ गेमारयाह आस गुइम सोइक्ताक्व। मेको यहूदा ङा पिप सिदकीयाहम पिप नेबुकदनेसर कली गेन, दे बेबीलोनम सोइश्शो बाक्त। मेको चिठीम मार ब्रेक्शो बाक्त देंशा हना,
4मुर नेल्ल आन परमप्रभु यावे, इस्राएली आन परमप्रभुमी मार ब्रेक्पाइश्शो बाक्त, देंशा हना “यरूसलेम रे बेबीलोनम ग्याइश्शा लाइक्चा पुंइसीशो नेल्ल आन कली
5गेपुकी मेकेर खिं सेल्शा बाक्कीन। रूम मार मार शोक्शा जने।
6ग्युंबे पा, तमी तौ थिने। इन तौ आन कली चाइमी चाक्कीन। इन तमी आन कली ग्युंबे पा गेने। मिनु मेकोपुकीमी तमी तौ थीमेक्ल। मेकेर गेपुकी सोशा बोशा शुश दुमीन। जाम्शा मलने।
7गो इन कली ग्याइश्शा लाइक्पाइश्शो सहर कली रिम्शो मिम्तीन। मिनु मेको आ पर्बम परमप्रभु यावे कली पुनीन। मारदे हना मेको कली रिम्शो दुम्चा इन कली यो रिम्शो दुम्चा बाक्ब” देंशो बाक्त।
8मुर नेल्ल आन परमप्रभु यावे, इस्राएली आन परमप्रभुमी “इन दातेम बाक्ब परमप्रभु यावे आ लोव़ पाइबपुकी नु लिंक्यु कोव़बपुकीम इन कली जोल पा थमा मसुइक्पदमेक्ल। आन ङोमु ङा लोव़ मनेनीन। येरमीया १४:१४
9मेकोपुकीमी जोल पा आं नेंमी नोले दुम्ब लोव़ पाइनीम। मेको आन कली गो मसोइक्तुमी” दे परमप्रभु यावेम देंशो बाक्ब।
10परमप्रभु यावेमी “बेबीलोनम मो पशो ७० बर्स गाम नोले गो इन बाक्तीक जाक्नुङ। मिनु इन कली एको रागीम लेश्शा चाक्नुङ, दे आं शिशी पा देंशो लोव़ खाप्नुङ। येरमीया २५:११-१३
11मारदे हना गो इन पर्बम शुश मिम्शो बाक्नुङ। गो मेको मिम्शो तुइक्नुङ। आं मिम्शो इन कली रिम्शो दुम्चा कली बाक्ब। मरिम्शो दुम्पाइक्चा कली ममाइ।
12गेपुकीम आं नेक्था जाक्शा पुंइनीनु, गो इन पुंइशो नेंनुङ।
13गेपुकीम इन थुं नेल्लेमी आं कली माल्तीनी हना, थित्नीनी। येरमीया ३०:३; ब्यवस्था ४:२९; यसैया ५५:६
14मिनु गो इन कली थिप्पांइसीनुङ। इन जाम्शो शोंप इन कली गेनुङ। गो इन कली ग्याइश्शा लाइक्पाइश्शो रागी नेल्ल रे खुप्नुङ। तेको रागी रे इन कली ग्याइक्पदु, मेको रागीमी लेश्शा चाक्नन्नी” देंत। येरमीया ३०:३; येरमीया ३३:२६
15गेपुकीम “परमप्रभु यावेम आंइ पर्बम बेबीलोनमी आ लोव़ पाइबपुकी योव़तु” देंतीनी।
16परमप्रभु यावेमी दाऊद आ नित्तीकेम निप्ब पिप नु एको सहरम बाक्ब मुर नेल्ल, इन नेक्था ङा मुरपुकी नु ग्याइश्शा लाइक्चा मपुंइसीशो आन पर्बम मार देंत देंशा हना,
17मुर नेल्ल आन परमप्रभु यावेमी “गो मेको आन पर्बम तरवार, अन्काल नु मुर बेक्तीक रोइ सोइक्नुङ। मिनु गो मेको आन कली राक्शो फोव़शी गेडा खोदेंशो सेल्नुङमी। मिनु मेको थाम्पा राक्शा ब्वचा मदुम्चा ङा बाक्नीम। येरमीया २४:८-१०
18गो मेको आन कली तरवार, अन्काल नु बेक्चा ङा रोइमी खेदा पाइनुङमी। मिनु गो मेको आन कली राज्य नेल्लेमी शुश हिंचा ङा सेल्नुङमी। मेकोपुकी आं खेरशो रागी नेल्ल आन दातेमी, सराप पाइक्तीके, शुश हिंतीके, शुक्शी पाइक्तीके नु मुने तोक्तीके सेल्नुङमी। ब्यवस्था २८:३७
19मारदे हना मेकोपुकीमी आं लोव़ मनेनेम। गो आं गेय नु आं लोव़ पाइब आन कली सोइक्ना सोइक्न बाक्ती हना यो मेको आन लोव़ मनेनेम” दे परमप्रभु यावेमी देंत। येरमीया २५:४
20मोपतीके गे यरूसलेम रे बेबीलोनम सोइश्शो ग्याइश्शा लाइक्चा पुंइसीशो मुल परमप्रभु यावे आ लोव़ नेनीन।
21मुर नेल्ल आन परमप्रभु यावे, इस्राएली आन परमप्रभुमी “कोलायाह आ तौ आहाब नु मासेयाह आ तौ सिदकीयाहम आं नेंमी जोल पाम्ताक्स। ‘गो मेको आस कली बेबीलोन ङा पिप नेबुकदरेसर आ गुइमी गेनुङसी। मिनु मेकोमी इन ङोंइती मेको आस कली साइक्ब।
22मेको आस पतीकेन यहूदा रे बेबीलोनम ग्याइश्शा लाइक्चा पुंइसीशो आन दातेमी सराप पाइनीम। परमप्रभु यावेम इ कली सिदकीयाह नु आहाब आस कली खोदेंशो सेलल। बेबीलोन ङा पिप नेबुकदनेसरमी मेको आस कली मीम हुम्शो बाक्त’ देंनीम।
23मारदे हना मेको निक्शीमी इस्राएलम थम ग्रांग्रा दिशो गेय पशो बाक्ताक्स। मेको निक्शी आस नेक्था ङा मुर आन मीश नु इप्शो बाक्ताक्स। मिनु मेकोम आं मअरेशो लोव़ पाम्ताक्स। गो मेको नेल्ल तुइक्नुङ। मिनु गो मेको आ सांकछी बाक्नुङ” दे परमप्रभु यावेम देंत।
24मिनु गे नेहेलाम ङा शेमायाह कली
25“मुर नेल्ल आन परमप्रभु यावे, इस्राएली आन परमप्रभुमी ‘गे इ नेंमी यरूसलेम ङा मुर नेल्ल आन कली, मासेयाह, चढ़ेब आ तौ सेफन्याह नु अरु चढ़ेब नेल्ल आन कली चिठी ब्रेक्ताक्वी। गे सेफन्याह कली येरमीया २१:१
26परमप्रभु यावेम इ कली चढ़ेब येहो-यादा आ पा ङा चढ़ेब सेल्तु’ मोपतीके गे परमप्रभु यावे आ खिं ङा ठेयब मुर दुम्शा, मेको जिम्मा ताक्नेवे। गे मेकेर आन निप्स ग्राइश्शो नु जोल पा परमप्रभु यावे आ लोव़ पखु पाइब आन कली ठेंङरो थोक्शा, आन शुरम फलाम क्युक्शा वोतो। येहो-यादा कली यो-यादा यो ब्रेक्शो बाक्ब।इजीकीएल ९:७; येरमीया २०:२
27मिनु गे ‘इन दाते ङा परमप्रभु यावे आ लोव़ पखु पाइब अनाथोथ ङा येरमीया कली मारदे महुइक्तीनी?’
28मेकोमी बेबीलोनम आंइ कली ओदेंशो लोव़ सोइक्ताक्व। गे शुश बर्स मेकेर बाक्चा माल्नीनी। मोपतीके खिं सेल्शा बाक्कीन। मिनु रूम मार मार शोक्शा जने” दे ब्रेक्शो बाक्त।
29मिनु चढ़ेब सेफन्याहम मेको चिठी पढेशा परमप्रभु यावे आ लोव़ पाइब येरमीया कली नेंपाइक्तु।
30मिनु मेना परमप्रभु यावेम येरमीया कली लोव़ पाप्तु।
31नेहेलाम ङा शेमायाह आ पर्बम मार लोव़ पाप्तु देंशा हना “ग्याइश्शा लाइक्चा पुंइसीशो नेल्ल आन कली एको लोव़ सोइक्तो। शेमायाहम इन कली नोले दुम्ब लोव़ पाप्तु। तन्न गो मेको कली मसोइक्तु। मेकोमी आं लोव़ पा, इन कली जोल लोव़मी थमा सुइक्पाइक्तु।
32मोपतीके गो नेहेलाम ङा शेमायाह नु मेको आ चच युइ आन कली सजाइ गेनुङमी। मेको आ मुर सुइमी आं मुर रिम्शो दुम्शो तचा मताइनीम। मारदे हना मेकोमी आं कली मटिथु आं पर्बम दूली लोव़ पाप्तु” दे परमप्रभु यावेमी येरमीया कली देंत।
