1मिनु पिप सिदकीयाहम माल्कीयाह आ तौ पश्हुर नु मासेयाह आ तौ चढ़ेब सेफन्याह आस कली लोव़ कुर पा येरमीया आ बाक्तीकेम सोइक्ताक्सी। मेना परमप्रभु यावेमी येरमीया कली लोव़ पाप्तु। येरमीया ३९:१-१०; येरमीया २९:२५-२६; येरमीया ३७:३; येरमीया ५२:२४
2मेको निक्शीमी “हजुर, परमप्रभु यावे कली आंइ पर्बम हिल्लो पने। मारदे हना बेबीलोन ङा पिप नेबुकदरेसरमी आंइ कली लडाइ तोन तोन बाक्ब। साइ ङोंइती शुश खेयप पशो खोदेंशो पा परमप्रभु यावेमी आंइ पर्बम छक लाक्चा ङा गेय पाइबा कों? मिनु मोपा मेकोपुकी आंइ रे पा लेश्शा लाइनीमी कों?” देंताक्से।
3मिनु येरमीयामी मेको आस कली
4“परमप्रभु यावे, इस्राएली आन परमप्रभुमी मार लोव़ पाप्तु देंशा हना, गे सिदकीयाह कली ‘गारो आ लाङगाम बाक्शो इन कली पुम्ब बेबीलोन ङा पिप नु कल्दी नु लडाइ पशो इन गुइ ङा यापुकी इन गे लेप्पाइक्नुङ। मिनु गो मेको आन कली खुप्शा, एको सहर आगाम ओंइनुङमी।
5गो आं दिंशो गुइ, सक्ति नु आं थाम्पा गाइश्शा, चुरशा नु ग्युश्रा बोक्शा, गे नु लडाइ पाइनुङ।
6गो एको सहरम बाक्ब मुर नु बस्तु भाव नेल्ल आन कली साइक्नुङमी। मिनु मेकोपुकी ठेयब बेक्तीक रोइम बेक्नीम’ देंत, दे मतीस।
7मिनु नोले परमप्रभु यावेमी ‘गो यहूदा ङा पिप सिदकीयाह, मेको आ गेय पाइबपुकी नु मेको सहर ङा बेक्तीक रोइ, तरवार नु अन्काल रे ब्रोंइशो मुर आन कली बेबीलोन ङा पिप नेबुकदरेसर आ गुइम गेनुङमी। गो मेको आन कली साइक्चा माल्ब आन जोरी सत्रु आन गुइम जिम्मा गेनुङमी। मिनु मेकोमी मेको आन कली तरवारम साइक्पाइक्ब। मेकोमी मेको आन कली शिशी मपथु, मप्रोंइब नु दाक्तीके मकोंइथु, साइक्पाइक्ब’ मतीस” दे माइक्तीम्सी।
8मेकोमी “गेमी मेको मुर आन कली ‘परमप्रभु यावेमी “गो इन ङोंइती ब्रोंइशा बाक्तीक नु बेक्तीक लां वोइक्ता। ब्यवस्था ३०:१५
9मेको सहरम बाक्ब मुर तरवार, अन्काल नु मुर बेक्तीक रोइम बेक्चा माल्नीम। तन्न सु लाङगा ग्रूशा, इन कली पुम्ब कल्दी आन कली जिम्मा गेंसीबा, मेको ब्रोंइब। मेकोम आ सोक्त ला प्रोंइब। येरमीया ३८:२
10गो एको सहर कली थमा पा क्याम्नुङ। रिम्शो पचा कली ममिम्नुङ। एको सहर बेबीलोन ङा पिप आ गुइम गेनुङ। मेकोमी एको सहर कली मीम क्रोइक्ब” देंत’ देनो” देंत। येरमीया ३४:२
11परमप्रभु यावेम “यहूदा ङा पिप आ खिं ङा मुर आन कली ‘परमप्रभु यावे आ लोव़ नेनीन।
12गे दाऊद आ खिं ङा मुर सुनी कुस कुस ठीक निसाफ पने। रोइक्चा पुंइसीशो आन कली मरिम्शो पाइब आन गुइ रे प्रोनीन। मो मपाइतीनी हना, इन मरिम्शो पतीके आं गाइक्तीके मी खोदेंशो पा ब्राइब। मेको सुइम काप्ने मचाप्चा ङा पा ब्राइब। येरमीया २२:३; येरमीया ७:२०
13एको दिंमम बाक्बपुकी रोंगु तार सेल्शो सहर गो इन कली लडाइ तोइनुङ। गे आंइ कली जाक्शा, सुम लडाइ तोइबा ङा? “आंइ ख्रुइक्तीके सु ओव़ने चाप्बा ङा? आंइ बाक्तीकेम सु ओव़ने चाप्बा ङा?” देंनीनी।
14गो इन कली इन पशो खोदेंशो पा कोव़शा, सजाइ गेनन्नी। गो इन ब्वाकीम मी सुइक्नुङ। मिनु मेकोमी इन एर ओंथ बाक्शो मारेइ मारेइ नेक्ब, दे परमप्रभु यावेमी देंत’ देनो” देंत। गलाती ६:७; इजीकीएल २१:३
