1आं दाक्शो लोक्बपुकी आं नोले ङा लोव़ मार बाक्ब देंशा हना, प्रभु नु बाक्शा ग्येरसीने। मोदेंशो लोव़ गो इन कली ब्रेक्ना ब्रेक्न बाक्ती हना यो, श्येत ममिम्नुङ। मेको इन कली बोल्यो दुम्चा कली बाक्ब। फिलिप्पी २:१८; फिलिप्पी ४:४
2कुचुम खोदेंशो मुर आन क्येङा होस पा बाक्कीन। मरिम्शो गेय पाइब आन कली तशा, होस पा बाक्कीन। ख्रोइक्तीक चिनु ख्रोइक्चा माल्ब देंब, आन क्येङा यो होस पा बाक्कीन। प्रकाश २२:१५; गलाती ५:१२
3मारदे हना गोपुकी थमा ख्रोइक्तीक चिनु ङा मुर बाक्नय। गोपुकीमी परमप्रभु यावे आ सोक्त आ पतीकेमी खुम्की पा बाप्शा, परमप्रभु यावे कली गेय पशा, ख्रीस्त येसु आ पतीकेमी ग्येरसय। मुर आ पतीकेमी थमा मसुइय्य। रोमी २:२९
4गो मुर आन पतीके कली थमा सुइक्ने चाप्नुङ। मुरपुकीमी आन पतीकेमी थमा सुइक्ने चाप्नीमी, दे मिम्नीमी। मोदेंब दुम्त हना, गो यो मेको आन क्येङा शुश चाप्नुङ। २कोरिन्थी ११:१८,२२
5गो ८ नाक्त ङा आल बाक्ङानु, ख्रोइक्तीक चिनु ताता। गो इस्राएली नङ। गो बेन्यामीन आ थर ङा मुर नङ। हिब्रू मुर रे जरमेशो, हिब्रू नङ। परमप्रभु यावे आ अरेशो पशा, फरिसी दुम्ती। २तिमोथी १:३; प्रेरित २६:५
6गो थमा सुइक्ब आन कली खेदा पाता। परमप्रभु यावे आ अरेशो लोव़ टिशा, ठीक पाता, दे मिम्शा, दोस मताइब दुम्ती, देंती। प्रेरित ८:३
7तन्न गो ख्रीस्त कली तुइश्शा, आंम कली ठेयब सेल्सीतीके नेल्ल ग्येरशा प्रोंइता। मत्ती १३:४४-४६
8थमा पा, गो आं ङोंइती ङा पशो जाम्शा लाइब बाक्ब, दे तुइक्ताक्ङ। मारदे हना आं प्रभु येसु ख्रीस्त कली तुइक्चा नेल्ल क्येङा ठेयब बाक्ब। मोपतीके मेको आ पर्बम आं पशो नेल्ल ताइश्शा, ग्रांग्रा दिचा ङा बाक्ब, दे तुइक्ताक्ङ। मारदे हना गो ख्रीस्त नु बाक्ब मुर दुम्ती।
9मोपा आ मुर दुम्शा, परमप्रभु यावे आ अरेशो लोव़ ङा आंम ठीक पतीके मबाक्थु, ख्रीस्त कली थमा सुइक्तीकेमी ठीक दुम्तीके बाक्ब। मेको ठीक दुम्तीके परमप्रभु यावेमी गेशो थमा सुइक्तीके रे ला बाक्ब। रोमी ३:२२
10आं दाक्शो मार बाक्त देंशा हना, गो येसु ख्रीस्त कली तुइक्ने चबुल। आ सेंतीक सक्ति गो नु बाक्ल। दोपा श्येत जशा, साइक्चा पुंइसीशो बाक्मे, मोपा गो यो मोदेंशो दुम्ङल। रोमी ६:३-५; रोमी ८:१७; गलाती ६:१७
11दुम्ने चाप्ब हना, गो यो बेक्शो रे सेंसीने चबुल, देंती।
12मुल सम्म गो मेको नेल्ल मतङ। मिनु ठीक मदुम्ङ। तन्न मेको आं के दुम्ल, दे शुश गेय पाइनुङ। मारदे हना ख्रीस्त येसुम आं कली आ मुर सेल्ती। कलस्सी १:२९; १तिमोथी ६:१२; प्रेरित ९:३-६
13आं लोक्बपुकी, मुल सम्म गो नेल्ल मतङ। तन्न गो मुल मार पाइनुङ देंशा हना, आं ङोंइती पशो नेल्ल प्रेंशा, मुल पचा माल्शो मार बाक्मे, मेकोन शुश पाइनुङ। लूका ९:६२
14परमप्रभु यावेमी ख्रीस्त येसु आ नेंमी आ बाक्तीके रे इनाम गेचा कली मार देंमे, मेकोन शुश पाइनुङ। १कोरिन्थी ९:२४
15इं दातेमी सु सु रुम्ने चाप्ब बाक्नी, मेकोमी आं खोदेंशो पा मिम्तीन। गेपुकीमी आं खोदेंशो पा ममिम्ताक्नी हना, परमप्रभु यावेमी इन कली तुइक्पदल।
16गोपुकीम मार रुब्या, मेकोन पय।
17आं दाक्शो लोक्बपुकी, गेपुकी आं खोदेंशो दुमीने। आंइ खोदेंशो पा गेय पाइब आन कली कोव़शा, मेको आन खोदेंशो पने। १कोरिन्थी ११:१
18गो इन कली का निक्शी मुर आन पर्बम लोव़ पाता। मुल आं थुं खाइश्शा, ङाक्शा लोव़ पाइनुङ। मारदे हना मेकोपुकी ख्रीस्त आ जोरी सत्रु दुम्शा, आ बेक्शो आ पर्बम मारेइ ममिम्नीम। १कोरिन्थी १:२३; गलाती ६:१२
19नोले मेकोपुकी जाम्शा लाइनीम। आन कोव़ज कली परमप्रभु यावे क्येङा ठेयब बाक्ब, दे मुने पचा ङा गेयमी आंम कली ठेयब सेल्सीशा, आन थुंमी रागी ङा माल्शो ला मिम्नीम। रोमी १६:१८
20तन्न इं बाक्तीक स्वर्गम बाक्ब। मारदे हना गो स्वर्ग ङा मुर नय। मेकेर रे इं पाप रे प्रोंइब प्रभु येसु ख्रीस्त जाक्ब, दे रिम्नय। एफिसी २:६; कलस्सी ३:१; हिब्रू १२:२२; तीतस २:१३
21मेकोमी इं बेक्चशो रां आ सक्ति पाइश्शो रां खोदेंशो सेल्ब। मेको आ सक्तिमी नेल्ल आन कली आ ङोंइती खुम्की पा बाप्पाइक्ब। १कोरिन्थी १५:४९; २कोरिन्थी ५:१; १यूहन्ना २:३
