1Tɛ̃, nɛɡibu, i de i n nukuru do ye i kɑ sɑ̃ɑ Yinniɡibu. Nɛn mi, nɑ ǹ wɑsirɑmɔ n kɑ bɛɛ yɑɑyɑsiɑ ye nɑ rɑɑ yoruɑ kɔ, bɛɛn mi mɑɑ, somirɑ.
2I n tii sɛ kɑ kɔ̃sɑn kowobu be bɑ sɑ̃ɑ nɡe bɔ̃nu, mɑ bɑ wɑsin bɑnɡo nɑɑnɛ sɑ̃ɑ.
3Bɛsɛrɑ sɑ sɑ̃ɑ bɑnɡoɡii ɡeebu, n ǹ mɔ be, domi sɑ Gusunɔ sɑ̃ɑmɔ kɑ win Hunde, sɑ woo kɑnɑmɔ Yesu Kirisin sɔ̃, sɑ ǹ mɑɑ bɛsɛn nɑɑnɛ doke wɑsin komɑnu sɔɔ.
4Kɑ mɛ, nɛn tii kon kpĩ n nɛn nɑɑnɛ doke wɑsin komɑnu sɔɔ. Gɑbu bɑ̀ n tɑmɑɑ bɑ koo kpĩ bu ko mɛ, kɑɑ rɑ ɡere nɛ?
5Bɑ mɑn mɑrɑwɑ Isirelin bii, Bɛnyɑmɛɛn bweseru sɔɔ. Nɑ sɑ̃ɑwɑ Yuu wi Yuubɑ bɑ mɑrɑ. Mɑ bɑ mɑn bɑnɡo kuɑ sɔ̃ɔ nɔɔbɑ itɑse. Ǹ n mɑɑ woodɑn sɔ̃n nɑ, nɑ kuɑ Fɑlisi.
6Nɑ rɑɑ mɑm hɑniɑ mɔ sere nɑ Yesun yiɡbɛru nɔni sɔ̃ɔmɔ. Ǹ n ɡem kɑson nɑ, woodɑn mɛm nɔɔbu sɔɔ, ɡoo kun kpɛ̃ u mɑn tɑɑrɛ wɛ̃.
7Adɑmɑ ye nɑ rɑɑ mɛɛrɑ ɑre, tɛ̃ nɑ ye kpuro ɡɑrisi wom dirum Kirisin sɔ̃.
8Nɑ mɑm kpuro ɡɑrisi wom dirum domi ɡɑ̃ɑ bɑkɑnɑ nɑ̀ n nɛn Yinni Yesu Kirisi ɡiɑ. Win sɔ̃nɑ nɑ kpuro deri, nɑ mɑɑ ye mɛɛrɑ kubɑnu nɑ n kɑ Kirisi mɔn sɔ̃,
9kpɑ nɑ n kɑ nùn ɡbinnɛ. Nɑ ǹ mɑɑ yĩiyɔ mɑ kon ɡem wɑ woodɑn mɛm nɔɔbun sɔ̃, ɑdɑmɑ kon ɡem wɑ yèn sɔ̃ nɑ Kirisi nɑɑnɛ doke. Gem mɛ, mu weewɑ sɑɑ Gusunɔn min di nɑɑnɛ doke bin sɑɑbu.
10Ye nɑ kĩ, yeyɑ n Kirisi ɡiɑ, kɑ mɑɑ dɑm mɛ u kɑ seewɑ ɡɔrin di kpɑ nɑ n bɔnu mɔ win wɑhɑlɑ sɔɔ, kpɑ n kɑ nùn weenɑ win ɡɔɔ sɔɔ,
11kpɑ nɑ n yĩiyɔ nɛn tii mɑ kon se ɡɔrin di.
12N ǹ mɔ nɑ ɑre nɔmɑ turɑ ɡinɑ, n ǹ mɑɑ mɔ nɑ yibɑ. Adɑmɑ nɑ yi nɑɑ ɡire yi kɑ ko nɛɡii yèn sɔ̃ Yesu Kirisi u mɑn kuɑ wiɡii.
13Nɛɡibu, nɑ ǹ tɑmɑɑ nɑ ɡinɑ yi nɔmɑ turɑ, ɑdɑmɑ ɡɑ̃ɑ teenɑ nɑ mɔ̀, nɑ ɡɑ̃ɑ birukinu duɑri, mɑ nɑ wuswɑɑɡinu nɑɑ ɡire.
14Nɡe mɛyɑ nɑ ye nɑ nɑɑ ɡire dukɑ swĩi n kɑ ɑre yi wɑ yi Gusunɔ u sun sokue wɔllɔ sɑɑ Yesu Kirisin min di.
15Bɛsɛ kpuro, bɛsɛ be sɑ sɑ̃ɑ tɔn ɡirobu, su bwisiku nɡe mɛ. Adɑmɑ bɛɛ ì n bwisiku tukunu ɡɑnu mɔ, Gusunɔ u koo bɛɛ ɡem sɔ̃ɔsi.
16Kɑ mɛ, bɑɑ ǹ n mɑn nɑ sɑ turɑ, su ɡesi dɑ wuswɑɑɔ swɑɑ tiɑ sɔɔ.
17Nɛɡibu, i mɑn sɑɑrio bɛɛ kpuro. Sɑ bɛɛ kom ɡem sɔ̃ɔsi. Ǹ n mɛn nɑ, i bu nɔni ɡirɑrio be bɑ kom ɡem mɛ swĩi.
18Nɑ bɛɛ sɔ̃ɔwɑ kɔ nɔn dɑbiru, nɑ kpɑm wure nɑ bɛɛ sɔ̃ɔmɔ tɛ̃ kɑ yĩresu, tɔn dɑbirɑ wɑ̃ɑ be bɑ sĩimɔ nɡe Kirisin dɑ̃ɑ bunɑnɑrun ɡɑrin yibɛrɛbɑ.
19Kɑm kobɑ bɑ koo kɑ wiru ɡo, domi ben nukurɑ tɑ sɑ̃ɑ ben yinni. Ye n weenɛ n bu sekuru ko yerɑ bɑ kɑ woo kɑnɑmɔ. Hɑnduniɑ yen ɡɑ̃ɑnu tɔnɑwɑ bɑ bwisikumɔ.
20Adɑmɑ bɛsɛ, Gusunɔn wɔllɑ tɑ sɑ̃ɑ bɛsɛn wuu. Min diyɑ sɑ bɛsɛn Fɑɑbɑɡii Yinni Yesu Kirisi mɑrɑ u nɑ.
21Wiyɑ koo bɛsɛn wɑsi yiiko sɑriruɡii kɔsi kɑ win dɑm mɛ mu koo de kpuro nùn wiru kpĩiyɑ, kpɑ yi kɑ win wɑsi yiikoɡii weenɑ.
