1पावल नु तिमोथी, गो निक्शी ख्रीस्त येसु आ वाइल नस्कु। फिलिप्पी सहरम बाक्शो ख्रीस्त येसु कली थमा सुइक्ब नेल्ल इन कली, थमा सुइक्ब आन कली कोव़ब नु ग्रुम्तीके ङा गेय पाइब इन कली चिठी ब्रेक्ताक्ङ। प्रेरित १६:३
2इं आफ परमप्रभु यावे नु प्रभु येसु ख्रीस्तमी इन कली शिशी पा थुं नाइक्चा गेम्सेक्ल।
3गो इन कली मिम्शा, आं परमप्रभु यावे कली “गे रिम्शो पाइतीनी” देंनुङ। रोमी १:८; १कोरिन्थी १:४
4गो परमप्रभु यावे नु लोव़ पङानु, गेना हना यो नेल्ल इन कली मिम्शा, ग्येरशा पाइनुङ।
5ङोंइती रे मुल सम्म ग्येरपाइक्ब लोव़ पचा कली आं कली वारच पाइतीनी।
6इन आगामी रिम्शो गेय गोइबमी येसु ख्रीस्त आ जाक्ची ना सम्म थुम्ब, दे तुइक्नुङ। फिलिप्पी २:१३; १कोरिन्थी १:८
7नेल्ल इन पर्बम मोदेंशो मिम्चा ठीक बाक्ब। मारदे हना गो इन कली शुश दाक्नुङ। आं जेल्खानमी चोक्चा पुंइसीशो, निसाफ पची ना नु ग्येरपाइक्ब लोव़ शेंची ना गो इन कली मिम्नुङ। गो नेल्ल खाल का ङा शिशी ताइब बाक्नय।
8ख्रीस्त येसुमी आं कली दाक्पाइक्तीके थुं गेतीके गो इन कली ग्रुम्चा शुश दाक्ताक्ङ, परमप्रभु यावेमी मेको तुइक्ब।
9आं प्रार्थना मार बाक्ब देंशा हना, इन दाक्चा शुश बारशा, रिम्शो नु मरिम्शो मार बाक्बा से रुप्ने चाप्नील, दे पुंइशा, परमप्रभु यावे नु लोव़ पचा बाक्ब। फिलेमोन ६
10मोपा गे नेल्ल क्येङा रिम्शो मार में, दे तुइश्शा, ख्रीस्त आ नाक्ती पाप मपाइब नु दोस मताइब दुम्नीनी। रोमी १२:२; एफिसी ५:१०; १थिस्सलोनिकी ५:२३
11गेपुकी येसु ख्रीस्तमी पपाइश्शो ठीक पतीकेमी ब्रीशो बाक्तीनी हना, परमप्रभु यावे सक्ति पाइश्शो नु ठेयब बाक्ब, दे तुंइसीब। एफिसी ५:९
12आं लोक्बपुकी, आं कली दुम्शो श्येतमी ग्येरपाइक्ब लोव़ ब्रपाइक्तु। १तिमोथी २:९
13हुकुम पाइब आ खिं ङा मुर नु अरु नेल्लेमी गो ख्रीस्त कली थमा सुइश्शो आ पर्बम जेल्खानम बाक्ती, दे तुइक्ताक्म। फिलिप्पी ४:२२
14मिनु प्रभु कली थमा सुइक्ब लोक्ब शुशेमी आं कली जेल्खानमी बाक्शो तशा, प्रभु कली थमा सुइक्तीक बारपा महिंथु, परमप्रभु यावे आ लोव़ पाइनीम।
15का निक्शीमी गेहे पशा, नेल्ल क्येङा ठेयब नङ, दे ख्रीस्त आ पर्बम शेंनीम। का निक्शीमी चहिं रिम्शो थुं पा शेंनीम।
16मोपा शेंबपुकीमी आं कली दाक्शा, गो परमप्रभु यावे आ ग्येरपाइक्ब लोव़ पतीके एकेर बाक्नुङ, दे तुइक्नीम।
17गेहे पा ख्रीस्त आ लोव़ शेंबपुकीम चहिं “गो नेल्ल क्येङा ठेयब नङ” दे रिम्शो थुं मपथु, आं कली जेल्खानम श्येत तेम्चा मिम्नीम।
18मिनु मार? ठेयब लेश्शा हना यो, थमा पा हना यो, ख्रीस्त आ पर्बम लोव़ पाम्तेक्म हना, गो शुश ग्येरसीनुङ। फिलिप्पी २:१७-१८
19इन परमप्रभु यावे कली पुंइतीके नु येसु ख्रीस्त आ सोक्तीम आं कली वारच पतीके गो एको श्येत रे ब्रोंइनुङ, दे तुइक्नुङ। २कोरिन्थी १:११
20गो काइ मुने मदोक्नुङ, दे तुइश्शा, आस पाइनुङ। मिनु काइ महिंब दुम्शा, ब्रोंइती हना यो, साइक्तीमी हना यो, मुरपुकीमी गेना हना यो ख्रीस्त कली ठेयब सेल्मेक्ल, देंनुङ।
21मारदे हना ब्रोंइङानु, ख्रीस्त कली ब्रोंइनुङ, साइक्तीमी हना यो, ग्रानुङ। गलाती २:२०
22गो ब्रोंइती हना, ख्रीस्त आ गेय पाइनुङ। तन्न तेको गेय योव़नुङा मेको मतुइक्नुङ।
23गो निम्फा आस दातेमी बाक्नुङ। मेकेर रे लशा, ख्रीस्त नु बाक्चा आं दाक्शो बाक्ब। मारदे हना मेको शुश रिम्शो बाक्ब। २कोरिन्थी ५:८
24गो ब्रोंइती हना, इन कली शुश रिम्शो दुम्ब।
25मोदेंब दुम्ब, दे तुइश्शा, इन थमा सुइक्चा नु ग्येरपाइक्तीके बारल, दे गो गेपुकी नु बाक्नुङ, दे तुइक्नुङ। फिलिप्पी २:२४
26मारदे हना गो इन कली लेंशा ग्रुम्थ जाक्नुङ, गेपुकीमी आं जाक्शो आ पर्बम ख्रीस्त येसु कली ठेयब सेल्नीनी।
27गे इन नाक्त किंत किंत ङा पतीकेमी ख्रीस्त आ ग्येरपाइक्ब लोव़ कली शिरशो दुम्शा बाक्कीन। गो गेपुकी नु बाक्ती हना यो, मबाक्ती हना यो, इन सोक्त का दुम्शा, इन थुं का दुम्शा, ग्येरपाइक्ब लोव़ ङा थमा सुइक्तीके गेय पा वारच पमुने।
28इन कली श्येत गेब आन कली तशा काइ महिनीन। मेकोन मेको आन कली ब्रुतीक चिनु बाक्ब। इन कली चहिं ब्रोंइतीक चिनु दुम्ब। मेको परमप्रभु यावे रे दुम्ब। २थिस्सलोनिकी १:५
29ख्रीस्त कली थमा सुइक्चा ला इन कली गेशो ममाइ, तन्न मेको आ पर्बम श्येत जचा यो गेशो बाक्ब।
30मुल आं श्येत जशो खोदेंशो पा, गेपुकी यो श्येत जाइनीनी। प्रेरित १६:२२
