Filipi 3

1

2

3

4

¹Âgofâc‐nane, moc mupe. Wofuŋte erâ bubiaŋhec junʒepieŋ. Dâŋ hâsine ijaha qâreŋke‐ŋarezore manape mi quŋkekac, â ŋoŋe ine hume keteŋ eŋarezejec.

²Ŋoŋe qâto jaŋere rucsoŋaŋ junʒepieŋ, miti gie bapa bâbâsifucne, sahac hehetâc ŋic jaŋere rucsoŋaŋ hâcne junʒepieŋ.

³Anutu maŋzi kiŋaŋ qacneeŋgopeneŋ â Kristo Jesurao qohotaeŋgopeneŋ â mamanasiŋ‐nâŋec sahacko mi râeeŋgopeneŋ, nâŋâc hâcne ma fârine bajueŋgopeneŋ.

⁴No nahac sahacko siŋkezo murâ sâcne ezapo. Ŋic gâcne jaŋe sahacko siŋkeeŋgopieŋ no ijaha ezo murâ siric‐jopazapo.

⁵No fuarâ fohape ʒoaŋ 8 eme sahac‐naneo ma bambiŋ, no Israe ŋicguruonec, Benjamiŋte ɋâric, no Judaŋiczi Judaŋic jaŋeraonec fuakicne hâcne, sâcmutâc dâŋte neŋgocne farisaio ŋic jupo,

⁶ʒoɋac‐nanere erâ kikefuŋ jaŋere râsi epo, sâcmutâc dâŋ sâcko tiŋne juju â bahacmâc jupo.

⁷Eme no mârâc wiac bajuhuc manape fârine ewec, i ʒâhec ine Kristore erâ manape racne ewec.

⁸No Wofuŋ‐nane Kristo Jesu ere fuŋne hone ʒâŋitâc erâ manape furi sâko eme wiac mârâc epo bapo irec jâmbomac manape racne eekac. No Kristo rauckepemurâ ere erâ wiac sasawa ho jawa muhuc qikiŋne‐fârepo.

⁹No erao qohotahuc, sâcmutâc reŋkehuc kiŋfâsâc bâbâfua i mâcne, Kristo manasiŋkehuc kiŋfâsâc juju irec enareekac. Mamanasiŋhec jupe Anutuzi kiŋnanere maname tatara, irec mukopac.

¹⁰Erâ no Kristo maŋzi hemiriŋkepe fafahare‐ticnere tâpiri norao fuame ʒâic manawecko ʒuhuckerâ ehec manazepac. Eku hâmoc‐ticnere hawari wâc bâfuazepac.

¹¹Iŋuc eerâ raku hâmockonec fafahare bâfuapere enareekac.

¹²No nahacnere ʒiŋuc mi mukopac: Biac mao fisirâ eri bâfuapo. Mâc Kristo Jesuzi no rocnuwecte eri bâfuapemurâ hata gagasa i gasackeekopac.

¹³Âgofâc‐nane, eri biac bâfuarâ ropo, i no nahacnere manape iŋuc mi ekac. Kecʒiŋuc ine eekopac: Wiac hetarapo i râpeckeekopac, â wiac mai‐naneo râekicne irec menane sicneekopac,

¹⁴ehuc Anutuzi Jezu Kristore erâ sambâŋte hefârecnuhuc mao eri râe‐narewec, i bâfuapemurâ ʒâŋezi hone dendeŋnehuc gasackeekopac.

¹⁵Soka tarakicne nâŋâc mâmâc sasawa wiac irecteaŋ hâcne henʒiriŋnehuc junʒepeneŋ. Eme wiac mocte manapie hatane moc ekacko Anutuzi maŋŋeŋic batamaeme mana taraniŋmu.

¹⁶Mâc hata âte warembeŋ ijaha âte ranʒepeneŋ.

¹⁷Âgofâc‐nane, banie‐ŋarepe honecnuhuc ijaha bâjâpecnunʒepieŋ. Â ŋic gâcne sâc ijaha juhuc bânie‐ŋareeŋgopieŋ jaŋerao wâc ʒâŋe fihuc junʒepieŋ.

¹⁸Ŋic tucne jaŋere ŋaza warehuc jupo, ʒi ine ki busâqochec mocwâc ŋazape: Jaŋe Kristo maripoŋ‐ticne râsi ecneeŋgopieŋ.

¹⁹Ŋic i jaŋe hâcne sisipiric bâfuaniŋmu. Hobu‐jeŋiczi wofuŋ ejareekac, â wiac mimineheczi bubiaŋ qajareekac, â mâreŋkonec wiac maŋ mamanasu‐jeŋic rofâreekac.

²⁰Nâŋâc ine sambâŋ hae irec fârine, eme irecnec hâcne bâbâpiaŋ‐nâŋec, Wofuŋ Jesu Kristo, e waharâ rocnâpoocte woŋec jueŋgopeneŋ.

²¹E ŋic â wiac sasawa bawahac‐joparâ jahacne rurumaŋko guruc‐jopaocte tâpiri focnekac, tâpiri izi sahac‐nâŋec waha qaqane bâtikieme e jahacne sahac iŋucne tatamac huririnehec eocmu.