Pilipai 3

1

2

3

4

¹Mua e huriki a turagu, mu vivi ne Bakovi Dagi. A ngava iea i uka ma i vakapae iau ni here tabu lakene mua. Bara i kori mua.

²Mu matadoko vona e huriki ri katoki hateka manga a ligo, e huriki a mari ni rata a naro hale, re huriki ri pala vuroki mule a kuline ria.

³Pali hita kunana a Israel muholi, si kavurikea e Isu Kristo na nitora na Hanuna Vure, ra hita i uka ma si luhoi hateka a kakaine hita.

⁴Pali iau a tahoka a vuhuna ni luhoi a kakaigu. E rei a viri i luhoi i tahoka a vuhuna ni luhoi a kakaina, iau a tahoka a vuhuna dagi.

⁵Iau ni pala a kuligu na polotoluna parava muri ne iau ni poda. Iau a bakovi o Israel. A kabu nau, a kabu ne Bensamin. Iau a Hibru muholi. Na naro ni ramai a vinara, iau a Pariseo.

⁶Na naro ni kinigao na leho na Vure, iau a vakamadihi hosi a tara ne Kristo. A pahaluhoi ta a malamala, a ramai lobo a vinara.

⁷Hosi a pahaluhoi ta a maki nga a maki dagi hateka. Pali ngane a matai ria a maki tavula a vuhuna i dagi hateka a maki i ratea e Kristo.

⁸Na tahuna a luhoia a hini a lohoka ne Isu Kristo, a Bakovi Dagi nau, a maki lobo ranga a maki tavula na matagu. A vuhuna a lohoka ne Kristo, a maki lobo nau a matai i manga a lulu kunana. A vuroki lobo, ga bolea e Kristo,

⁹ga rihi ia. I mavonga i uka ma ga malamala a vuhuna a ramai lobo a vinara. A Vure i rata iau a malamala a vuhuna a luhoi torea e Kristo. A naro ni bele malamala na matana Vure i bele na tahuna si luhoi torea e Kristo.

¹⁰A ngaru ni lohoka vona e Kristo. A ngaru ni lohoka vona a nitora i vakamahuri mulea na matenga. A ngaru ni bole a nimadihi i manga ia i bole, ga mate manga ia i mate.

¹¹Na naro iea, a ngarua a Vure ge vakamahuri mule iau na matenga.

¹²I uka ma a taki a mulangi pali, o a moro liu pali. Pali a rura ni bele manga e Isu Kristo, a vuhuna i vulaki iau.

¹³Mua e huriki a turagu, i uka ma a luhoi a bele pali manga e Kristo. Pali a maki a ratea i maea: i uka ma a luhoi tabu a maki muga. A toni a bulugu ni bole a maki muri.

¹⁴A toni a bulugu, ga bole a mapagu meli na hunu, ra Vure i gale hita vona na tahuna si luhoi torea e Isu Kristo.

¹⁵Hita e huriki si moro pali na niluhoi torea e Kristo si gi luhoi maea. E rei ne mua mu luhoi tebi, a Vure bara i vakalohoka mua.

¹⁶Pali a ra lohokanga si bole pali, si gi nugu tatea.

¹⁷Mua e huriki a turagu, mu rata manga iau. Mu matanono, mu toni e huriki ri laho manga a hini a vakasiri mua mu gu laho vona.

¹⁸I kupo e huriki ri laho manga a pile na kai tavalavala ne Kristo. Balaka kupo a vakalongo mua ne ria. Ngane a vakalongo tabu mua, a tangi.

¹⁹A vure ne ria, a ningaru hale na kakaine ria. A bagetua ne ria a maka naro ni maruhu ri rata. Ri luhoi kunana a maki na malala. Bara ri vurua.

²⁰Pali a tanga muholi ne hita, meli na hunu. Si davea e Bakovi Dagi, e Isu Kristo, ge valai vona, ge korimule hita.

²¹Bara i rata a kakaine hita tavula i mapulo, bara i bele manga a kakaine Kristo, ra i bagetu hateka. Bara i rata mavonga na nitora vona, ra i rata a maki lobo i tabuli na limana.