ፒሊጲሲዮሳ 3

1

2

3

4

¹ዉርሴꬃን፥ ታናዳን ፆሳ ካሊያዋንቶ፥ ጎዳይ ሂንቴንቶ ናሼቻ ኢሞ። ታኒ ካሴ ፃፌዳዋ ዛሬꬃዴ ፃፊያዌ ታና ዋዪሴና፤ ቃሲ ሄ ፃፊያዌ ሂንቴና ናጋና።

²ኢታባ ኦꬂያዋንቱፔ፥ ሄ ካናቱዋ ኤሻይ ዴዒያዋንቱፔ፥ ቃፃራይ ኮሼ ጊያ ኣሳቱዋፔ ናጌቲቴ።

³ኣዪሲ ጎፔ፥ ኑኒ ፆሳ ጌሻ ኣያናን ፆሳው ጎዪኒያ ዲራዉኔ ኑ ዴዑዋን ጎዳ ኪሪስቶሳ ዬሱሳን ናሼቲያ ዲራው፥ ቱሙ ቃፃራ ቃፃሬቴዳዋንታ፤ ኣሳቴꬃ ቦላ ኦሴቲያዋን ኣማኖኮ።

⁴ቃሲ ታው ታ ሁጲያንካ ታ ኣሳቴꬃን ኣማኔቲያዌ ዴዔ። ኣይ ኣሳይኔ ባሬ ኣሳቴꬃን ኣማኔቲያዌ ባሬው ዴዔ ጊዴ ቆፖፔ፥ ታኒ ኣፔ ሎይꬃ ኣꬋይ።

⁵ታኒ ዬሌቶዴፔ ሆስፑንꬃ ጋላሳን ቃፃሬታዲ። ታኒ ዬሌታን ኢስራዔሊያ፤ ቢኒያማ ዛሬ፤ ዋላካይ ባዪና ኣዪሁዳ ኣሳ። ኣዪሁዳ ሂጊያ ናጊያዋን ጊዶፔ፥ ታኒ ፓሪሳዌ፤

⁶ኣዪሁዳ ኣማኖ ሴላ ጊዶፔ፥ ታኒ ኣማኒያዋንታ ዋዪሳዲ፤ ኢቲ ኡራይ ሙሴ ሂጌው ኣዛዜቲዴ ፂሊያዋ ባጋ ጊዶፔ፥ ታናን ፖኮባይ ቤቲቤና።

⁷ሺን ታና ጎዒያ ሄ ኡባባ ኪሪስቶሳ ዲራው ባዬዳዋዳን ፓይዳይ።

⁸ቱማካ፥ ሄዋንቱ ፃላላ ጊዴና፤ ታኒ ታ ጎዳ ኪሪስቶሲ ዬሱሳ ኤሪያዌ ኡባባፔ ሎይꬂ ኣꬊያ ዲራው፥ ኡባባ ታና ሙሌካ ጎዔናዋዳን ፓይዳይ፤ ታኒ ኣ ዲራው ኡባባ ዬጋ ባሻዲ። ኪሪስቶሳ ዴማናዉኔ ኣናና ዴዓናው ኡባባ ዎራ ኦሌዳዋዳን ፓይዳይ፤ ታኒ ሙሴ ሂጌው ኣዛዜታዴ ዴሚያ ታ ሁጴ ፂሎቴꬃይ ታው ባዋ። ኪሪስቶሳ ኣማኒና፥ ፆሳይ ኢሚያ ፂሎቴꬃይ፥ ኣማኑዋን ፆሳ ማታፔ ዪያ ፂሎቴꬃይ ታው ሃዒ ዴዔ።

¹⁰ታኒ ኪሪስቶሳኔ ኣ ዴንዱዋ ዎልቃ ኤራናው ኮያይ፤ ያታዴ ታኒ ታ ሁጴው ሃዪቁዋፔ ዴንዳና ያጊያዋን፥ ኣ ዋዪያ ኣናና ዋዬታናዉኔ ኣ ሃይቁዋን ኣ ማላታናው ኣሞታይ።

¹²ታኒ ሃዒ ዴማ ዲጋዲ ዎይ ታናን ባሊ ባዋ ጊኬ። ሺን ኪሪስቶሲ ዬሱሲ ታና ባሬው ኦꬄዳ ዎይታ ዴማና ጋዴ ኤሌላይ።

¹³ታናዳን ፆሳ ካሊያዋንቶ፥ ታኒ ሄዋ ዴማ ዲጋዲ ጋዴ ቆፒኬ፤ ሺን ታኒ ኢቲባ ኦꬃይ፤ ታፔ ጉዬና ዴዒያዋ ዶጋዴ ሲንꬃን ዴዒያዋ ኦይቃናው ዋꬌታይ።

¹⁴ፆሳይ ኪሪስቶሲ ዬሱሳ ባጋና ቦላ ዴዑዋሲ ፄሲያ ዎይታ ኣካናው፥ ታ ጋካናው ዎፃይ።

¹⁵ሲሚ ኑኒ ኣያናን ሚኔዳዋንቱ ኡባቱ ሃዋ ቆፓናው ቤሴ፤ ቃሲ ሂንቴፔ ኣማሬዳዋንቶ ኣያኒኔ ዱማ ቆፋይ ዴዖፔ፥ ሄዋካ ፆሳይ ሂንቴንቶ ቆንጪሳና።

¹⁶ጊዶፔካ፥ ኑኒ ሃኖ ጋካናው ዴዔዳ ማራዳን፥ ኣኔ ሲንꬃው ሄ ማራ ካሎይቴ።

¹⁷ታናዳን ፆሳ ካሊያዋንቶ፥ ታኒ ሃኒያዋዳን ሃኒቴ። ኑኒ ሂንቴንቶ ሌሚሱዋ ጊዴዶ፤ ሄዋዳን ሂንቴካ ኑኒ ሂንቴንቶ ሌሚሱዋ ጊዴዳ ማራ ካሊያዋንታ ኣኬኪቴ።

¹⁸ኣዪሲ ጎፔ፥ ታኒ ሄዋ ሂንቴንቶ ካሴ ጮራቶ ኦዳዲ፤ ቃሲ ሃዒ ላዔꬁዋካ ኣፎፃዴ ሂንቴንቶ ኦዳይ፤ ኪሪስቶሲ ማስቃሊያ ቦላ ሚሲማሪያን ꬊሼቲዴ ሃዪቄዳዎ ባሬንቱ ሼምፑ ባሬና ሞርኬ ኦꬄዳ ዳሮ ኣሳቱ ዴዒኖ።

¹⁹ኡንቱንቱ ዉርሴꬃይ ባሻ፤ ኡንቱንቱ ኡሉ ኡንቱንቶ ፆሳ፤ ዬላታናው ቤሲያዋን ኡንቱንቱ ኦቶሬቲኖ፤ ቃሲ ሃ ሳዓባ ፃላላ ቆፒኖ።

²⁰ኣዪሲ ጎፔ፥ ኑ ቢታይ ሳሉዋና፤ ኑኒ ቃሲ ሳሉዋፔ ያና ኑና ኣሺያ ጎዳ ዬሱሲ ኪሪስቶሳ ናጌቶ።

²¹ኪሪስቶሲ ኡባባ ባሬፔ ጋርሳን ዎꬃናው ዳንዳዪያ ባሬ ዎልቃን፥ ኑ ዳቡራንቻ ኣሳቴꬃ ላሚዴ፥ ባሬ ቦንቾ ኣሳቴꬃ ማላቲሲዴ ኦꬃና።