1No akana mek phenav, phralale mire, radisaľon andro Raj. Nane mange phares tumenge pale oda te pisinel a tumenge oda hin pro lačho.
2Dikhen pro rikone, dikhen pro nalačhe manuša, dikhen pre ola, save čhingeren o ťelos.
3Bo amen sam čačes o občhinde (obrezimen), amen, save le Duchoha lašaras le Devles a pes bararas andro Kristus a na mukas pes pre amaro ťelos,
4choc me man šaj mukľomas the pre miro ťelos. Te peske vareko aver gondoľinel, hoj pes šaj mukel pro ťelos, me mek buter:
5Somas občhindo pro ochtoto džives, andral o Izraeliko rodos, andral o kmeňos Benjamin, Hebrejis le Hebrejendar a pal o zakonos Farizejis;
6bara choľaha andro jilo igen džavas pre khangeri; a doľikeravas sa, so kamel o zakonos.
7Ale oda, so mange sas pre chasna, akana prekal ma hin sar ňič vaš o Kristus.
8Ale čačes dikhav savoro sar našaďipen, bo vzacneder mange hin, hoj te prindžarav le Ježiš Kristus, mire Rajes. Vaš leste oda savoro odčhiďom a hin mange sar o šmeci, hoj te dochudav le Kristus
9a te avav arakhlo andre leste sar ajso manuš, savo nane čačipnaskero korkoro pestar prekal o skutki le zakonostar. Hoj te avav čačipnaskero prekal o pačaben andro Kristus: Čačipnaskero le Devlestar prekal o pačaben;
10hoj te prindžarav les the e zor, so les uštaďa andral o meriben; hoj te ľidžav leskere dukha a te avel ajso sar ov andre leskero meriben,
11hoj varesar te dodžav ke oda, hoj uščava andral o meriben.
12Na hoj imar te dogeľomas abo imar te uľomas dokonalo, ale denašav, hoj te dochudav oda, prekal soste man o Ježiš Kristus imar dochudľa.
13Phralale, me mange na gondoľinav pal mande, hoj imar oda dochudľom, ale kada jekh kerav: Bisterav pre oda, so hin pal ma, a kerav sa, hoj te dochudav oda, so hin anglal ma.
14Denašav andro cieľos, hoj te ňerinav (zviťazinav) e odmena, o ňeboskero dživipen, andre savo man o Del vičinďa andro Ježiš Kristus.
15Avke te gondoľinas amen savore, save sam dospele andro pačaben. A te pal varesoste avres gondoľinen, the oda tumenge mek o Del sikavela.
16Ča dživas dureder andre oda, so imar priiľam.
17Phralale mire, keren avke sar me. A dikhen mištes pre ola džene, save dživen avke, sar tumenge amen sikaďam.
18Bo but džene, save avke dživen a pal save tumenge imar buterval phenavas a the akana rovibnaha phenav, dživen sar ňeprijaťeľa le Kristoskere kerestoske.
19Lengero agor hin o meriben, lengero del hin lengero per, lengeri slava hin e ladž a gondoľinen ča pre oda, so hin pre kadi phuv.
20Ale amaro kher hin andro ňebos a odarik užaras the le Spasiťeľis, le Rajes le Ježiš Kristus.
21Ov peskere zoraha, savaha šaj thovel sa tel peskere pindre, čerinela amare slabe the pokorne ťela pre ajse slavne ťela, sar hin leskero.
