1Bəza ga mmawa, ere ye ti nawayay nəhikivu ana kʉli ni ti nihi : mərumvu aɗaba leli ɗek mìgia akaɗa mis bəlaŋ akaba Bay geli a. Ere ye ti nəhi ana kʉli nihi ni ti nə̀bikia ana kʉli a à ndava, ay ti tamal nəhikivu ana kʉli nəŋgu ni à gray araŋa do, avikivu njəɗa ana kʉli daya.
2Bumvu slimi ana ndam ya tə̀ɗəm si *kekelʉm kʉɗi kwa ni. Ndam nday nani kərá, tà gray zlam sulumani do.
3Tə̀ɗəm tamal kawayum kigʉm ndam ge Melefit ti si kikelʉm kʉɗi kwa. Ay ti ndam ge Melefit eɗeɗiŋ eɗeɗiŋeni ti leli. Ndam ya ti tazləbay Melefit à na njəɗa ga Məsuf gayaŋ *Njəlatani ni ti leli. Ndam ya ti tə̀ɗəm Yezu *Krist naŋ gəɗakani ni ti leli. Ere ye ti mis təfəki ahà r ni akaba tagray à na ahar gatay ni, leli ti mə̀fəki ahà r do.
4Ku tamal nahkay nəŋgu ni, nu day nisliki məfəki ahà r ka zlam nday nani. Ku way way do à ɗəm esliki məfəki ahà r ka zlam nday nani nahəma, nu nisliki nə̀tam naŋ.
5Zlam ya ti nəfəki ahà r goro ka tay tata ni ti nday hi : nu zal Izireyel, jiba goro ti ge Benjemeŋ, ata ba ata mma ti nday ɗek ndam *Hebri : tà ra tìweya nu a ti tèkelʉa kʉɗi a vaɗ ya azlalahkər a. Tamal mis tə̀ɗəmki ma ke *Divi ya Mʉwiz à bəki a wakita gayaŋ ni bu ni ti, nu zal Feriziyeŋ, nə̀gəskabá nə̀tam ndam Zʉde ndahaŋ.
6Ahaslani ti nə̀hi ana ahà r nəgri tʉwi ana Melefit à na njəɗa kay, nahkay ti nə̀gria daliya ana ndam məfəki ahà r ka Yezu a. Nə̀gəskabá Divi ya Mʉwiz à bəki a wakita gayaŋ ni bu na, nà gudar zlam ndo simiteni.
7Ahaslani ti nə̀ɗəm zlam nday nani ɗek ti təzoru nu kama, ay nihi ti nə̀ɗəm təcafəŋa nu kà məsər Krist a sawaŋ.
8Namənjaləŋ kà zlam ɗek masakani, aɗaba nə̀səra Yezu Krist Bay goro a : zlam gani nani à tam zlam ndahaŋ ɗek. Ka ya ti nə̀səra naŋ a ni ti nə̀mbrəŋa zlam ndahaŋ na ɗek, namənjaləŋ kà zlam ndahaŋ ni ɗek akaɗa ga dandas ni, aɗaba nawayay manjəhaɗani akaba Krist akaɗa mis bəlaŋ,
9nawayay ti a vaɗ ya ti amaŋga ni mə̂ɗəm nu mis gayaŋ. Ku naɗəbay Divi ya Mʉwiz à bəki a wakita gayaŋ ni bu nəŋgu ni, nawayay ti mis tə̀ɗəm nu zal jiri azuhva nani va ba. Ere ye ti nawayay ni ti, Bay Melefit mâmənjalu nu zal jireni aɗaba nə̀fəkia ahà r ke Krist a. Jiri nani ti tʉwi ge Melefit. Melefit agru tʉwi nani ti aɗaba nə̀fəkia ahà r ke Krist a palam.
10Nawayay nəsər Krist : nawayay nəsər njəɗa ya Melefit à həŋgaraba naŋ à na naŋ a ni. Ku à caka daliya nəŋgu ni, daliya gayaŋ ya à cakay ni nu day nawayay macakani. Nawayay nə̂mət akaɗa gayaŋ ya à mət ni,
11ti ku ahəmamam nu day Melefit mâhəŋgaraba nu e kisim ba.
12Ay ku naɗəbay zlam nday nani ɗek nəŋgu ni, ŋgay nə̀ŋgəta, nìnjikiya ka tay a ti nə̀ɗəm do. Nahkay naɗəboru tay kama kama, aɗaba nawayay ti nə̂gəs tay a ahar vu akaɗa ga Yezu Krist ya à gəs nu a ahar gayaŋ vu ni.
13Bəza ga mmawa, ŋgay nə̀gəsa zlam nday nana ti nə̀ɗəm faŋ ndo. Nu nə̀bu akaɗa ge mis ya tacuhwakabu ni ; nawayay magray zlam biliŋ ciliŋ : nəmbrəŋ zlam ya kələŋ ni, nakaɗvu ti naɗəbay ere ya kama goro ni.
14Nacuhworu ke ekwi gani duk, nawayay nəŋgət ere ye ti təvi ana bay ya ti enjiyu enjenjeni ni. Bay Melefit azalay leli ti mə̂cəloru a huɗ melefit vu ga məvi ere nani ana leli aɗaba leli ndam ga Yezu Krist.
15Leli ɗek məndəhani : nahkay ahà r à ɗəm mânjəhaɗ akaɗa ya nə̀hi ana kʉli ni. Ay tamal ti kajalum ahà r nahaŋ nəŋgu ni, Melefit aməɗəfiki jiri gani ana kʉli.
16Zlam maɓəlani nahəma, ahà r à ɗəm mahəɗakumoru kama à na divi ya mə̀bu maɗəbay ni.
17Bəza ga mmawa, grum akaɗa goro ya nagray ni. Lekʉlʉm kìpʉma manjəhaɗ geli na : si kəmənjumləŋ ana mis ya tanjəhaɗ akaɗa geli ya manjəhaɗ ni, ti kânjəhaɗum nahkay bilegeni.
18Mis tə̀bu kay, manjəhaɗ gatay à ɓəlay do, tizirey Krist naŋ ya à mətfəŋ kà təndal ni. Ahaslani nə̀hikia pakama gani ana kʉli a sak kay, nihi keti nəhikivu ana kʉli, nitʉwi à na ma gani.
19Ndam nday nani ti Melefit emijiŋ tay ka mandav ga sifa gatay. Ere ye ti tawayay ni ti ègia melefit kè eri gatay a. Nday tə̀bu təmərvu à na zlam ya təbəki mimili ka tay ni sək sawaŋ. Tə̀jalaki ahà r ka zlam ge Melefit do, si ka zlam ga duniya ni ciliŋ.
20Leli zla nahəma, majalay ahà r geli nahkay do. Kəsa geli ti a huɗ melefit bu. Bay mahəŋgay leli, Bay geli Yezu Krist, amasləkabiya eslina, leli mə̀bu majəgay naŋ.
21Eminjia ti aməmbatkaba vu geli gedebeni na, ti vu geli mîgi maslaɗani akaɗa gayaŋ ni. Ara agray nahkay ti à na njəɗa gayaŋ ya agur zlam ɗek à na naŋ ni.
