عَننَبِ هَفٍ 1

1

2

¹مَنفّ دَرِيُسِ شَ مَنفّيَ حّ قِرِن ندٍ، كِكٍ سٍننِ ندٍ، شِ سِنفٍ رَ، عَلَتَلَ نَشَ يِ مَسٍنيِ تِ سَلَتِيٍلِ شَ دِ سٌرٌبَبٍلِ بّ، يُدَيَ فٌمِنَ، عَننَبِ هَفٍ سَابُي رَ. عَ مَن نَشَ يِ مَسٍنيِ تِ سّرّشّدُبّ كُنتِفِ يٌسَدَكِ شَ دِ يٌسُوٍ بّ.

²عَلَتَلَ شَ مَسٍنيِ نَن يَ، «يِ حَمَ عَ قَلَمَ، ‹عَ مُ لَن وٌن شَ عَلَتَلَ شَ بَنشِ يَءِلَن سِندٍن.›»

³نَ كُي، عَلَتَلَ نَشَ يِ مَسٍنيِ تِ عٍ بّ عَننَبِ هَفٍ سَابُي رَ،

⁴«عَ لَنمَ وٌ تَن شَ لُ بَنشِ رَشُنمَشِ كُي، ﭑ تَن مَ هْرْ مْبَنشِ كَنَشِ؟»

⁵مَنفّ عَلَتَلَ شَ مَسٍنيِ نَن يَ، «وٌ وٌ شَ وَلِ مَتٌ.

⁶وٌ سَنسِ شْرِ فبٍفبٍ سِمَ، كْنْ وٌ نَشَن سْتْمَ، نَ شُرُن. وٌ وٌ دّفٍمَ، كْنْ وٌ مُ لُفَمَ. وٌ وٌ مِنمَ، كْنْ عَ مُ وٌ رَلِمَ. وٌ شِنبٍلِ دٌنمَ رَفٌرٌ مَ وٌ مَ، كْنْ شِنبٍلِ مُ بَمَ وٌ مَ. وٌ وٌ شَ وَلِ سَرٍ سْتْمَ، كْنْ يَلٍ نَ وٌ شَ يُبَيٍ مَ.»

⁷مَنفّ عَلَتَلَ شَ مَسٍنيِ نَن يَ، «وٌ وٌ شَ وَلِ مَتٌ.

⁸وٌ تٍ فٍيَ قَرِ وُرِ قٍندٍ، وٌ شَ ﭑ مَ بَنشِ تِ عَلَكٌ ﭑ شَ بِنيّ سْتْ نَشَن نَقَنشِ ﭑ مَ.» عَلَتَلَ شَ مَسٍنيِ نَن عَ رَ.

⁹«وٌ بَرَ وَ هَرِفٍ فبٍفبٍ شْن مَ، كْنْ وٌ دٌندٌرٌنتِ فبَنسَن نَن سْتْشِ. وٌ بَرَ نَ شَنِن وٌ شْنيِيٍ، ﭑ بَرَ نَ قَن نَيٍنسٍن حّ. نَ كٍلِشِ مُنسٍ مَ؟ نَ كٍلِشِ ﭑ مَ بَنشِ شَ كَنّ نَن مَ قٍ رَ. عَ قَ لِ، كَنكَن سِنفَنشِ وَكِلِ مَ عَ فبٍ وَلِ تَن نَ، كْنْ وٌ مُ سٍسٍ رَبَمَ ﭑ فبٍ وَلِ تَن شَ قٍ رَ.» مَنفّ عَلَتَلَ شَ مَسٍنيِ نَن عَ رَ.

¹⁰«نَ قٍ بَرَ عَ نِيَ تُنّ يٍ مُ فٌرٌ مَ، بْشِ مُ دَشَمُي رَ مِنِمَ.

¹¹ﭑ بَرَ عَ نِيَ بْشِ نُن فٍيَيٍ شَ شَرَ، وٌ شَ مّنفِ، وٌ شَ وّنِ نّينّ، وٌ شَ تُرٍ، وٌ شَ سَنسِيٍ، وٌ شَ مِشِيٍ، وٌ شَ شُرُ سٍيٍ، نُن وٌ شَ وَلِ بِرِن شَ نَشَسِ.»

¹²سَلَتِيٍلِ شَ دِ سٌرٌبَبٍلِ، سّرّشّدُبّ كُنتِفِ يٌسَدَكِ شَ دِ يٌسُوٍ، نُن حَمَ دْنشْي بِرِن نَشَ عٍ مَرِفِ عَلَتَلَ شُي سُشُ، عَ نَشَن قِشِ عَننَبِ هَفٍ مَ. حَمَ نَشَ فَاشُ عَلَتَلَ يَ رَ.

¹³عَلَتَلَ شَ شّيرَ عَننَبِ هَفٍ نَشَ عَلَتَلَ شَ يِ مَسٍنيِ قَلَ حَمَ بّ، «وٌن بِرِن نَن عَ رَ.» عَلَتَلَ شَ مَسٍنيِ نَن عَ رَ.

¹⁴عَلَتَلَ نَشَ سَلَتِيٍلِ شَ دِ سٌرٌبَبٍلِ، يُدَيَ فٌمِنَ بْحّ رَوُتُن. عَ مَن نَشَ سّرّشّدُبّ كُنتِفِ يٌسَدَكِ شَ دِ يٌسُوٍ نُن حَمَ دْنشْي بْحّ رَوُتُن. نَ نَشَ عَ نِيَ عٍ شَ عٍ مَرِفِ عَلَتَلَ شَ بَنشِ تِ وَلِ سُشُ،

¹⁵دَرِيُسِ شَ مَنفّيَ حّ قِرِن ندٍ، كِكٍ سٍننِ ندٍ، شِ مْشْحّن نُن نَانِ ندٍ رَ.