Haggai 1

1

2

¹Bin l’agruw e duw ni Darius e Pilung nu Persia, ni aram e bin m’on e rran ko bin n’el e pul, me non SOMOL u daken Haggai ni profet. Thin ni yog SOMOL e fan ngak fare governor nu Judah, ni Zerubbabel nib mo’on ni fak Shealtiel, ma ku fan ngak fare Prist ni Th’abi Ga’, ni aram Joshua nib mo’on ni fak Jehozadak.

²I ga’ar SOMOL ni Gubin ma Rayag Rok ngak Haggai, “Pi girdi’ ney e yad be yog ni gathi aray e ngiyal’ ni bfel’ ni ngan toy bayay fare Tempel.”

³Ma aram me yog SOMOL e re thin ney u l’ugun Haggai ko fapi girdi’:

⁴“Girdi’ rog, mangfan ni gimed be par u lan bogi naun ni fafalel’ ma kabay e Tempel rog u but’ nib puth?

⁵Damur guyed e n’en ni be buch romed?

⁶Kam yunged e woldug ni grain nrib yo’or, machane wom’ngin ni kam t’ared e ri bochu’uw. Bay e ggan ni ngam ked, machane de gaman ni ngam fosgad ngay. Bay e wayin ni ngam unumed, machane de gaman ni ngam chinggad ngay. Bay e mad romed, machane de gaman ni nge magwal nagmed. Ma pi’in yad be maruwel e dab ra gaman gad u pulworad.

⁷Damur guyed fan e ran’ey nike yodroy?

⁸Ere mmarod e chiney ngalan e burey ngam th’abed e ren, ngam toyed bayay fare Tempel; ma aram e ra felfelan’ug min liyor ngog ni bod nthingar nrin’.

⁹“Um fineyed ni bay mu t’ired wom’ngin e woldug nib yo’or, machane me yan i aw nri buchu’uw. Ma nap’an e mu feked fapi wom’ngin e woldug nga tabnaw, mug kirebnag. Mangfan e binem ni gu rin’? Bochan fare Tempel rog ni be par nib puth u but’ mra bugmed ma ke thay parwon i muruwliy e naun rok.

¹⁰Aram fan ndakir yib e n’uw ma dakir tugul ban’en.

¹¹Kug pag e yal’ nib gel kem’ay e ran u daken e but’ ngu daken e ted, nge yung i flang ko grain, nge yung i woldug ko grape, nge milay’ ko olive, nge gubin mit e woldug nma tugul u but’, ma ku er rogon e gamanman nge girdi’, nge gubin ban’en ni gimed be guy rogon ni ngam yunged.”

¹²Ma aram e Zerubbabel nge Joshua nge gubin e girdi’ ni ur kalbusgad u wuru’ e nam u Babylon, ni karsuled e yad be rin’ e n’en ni yog e SOMOL rorad ngorad ni ngar rin’ed. Kar pired ni yad ba marus ma yad be fol rok Haggai ni profet ni fare mal’og rok SOMOL.

¹³Ma aram me yog Haggai e thin rok SOMOL ngak fapi girdi’: “Gube micheg ni bay gu par romed.”

¹⁴Me pasignag SOMOL laniyan’ gubin e girdi’ ni ngar muruwliyed fare Tempel: Zerubbabel, fare governor nu Judah; Joshua, ni fare Prist ni Th’abi Ga’, nge gubin e girdi’ ni ur kalbusgad u bang ni kar sulod. Ra tababgad ko maruwel ko fare Tempel rok SOMOL ni Gubin ma Rayag Rok ni Got rorad,

¹⁵ko rofen ni rliw’ nge aningeg ko bin nnel’ e pul ko duw ni l’agruw ni Darius e ir e pilung.