Haqai 1

1

2

¹Koasa vina rua vuaheni pa binaṉara te Dariasi, pa rane kekenu koasa vina onomo sidara, si kamo la koe Haqai sa poropita sa zinama te Zihova pude tozi lania koe Zerubabele sa tuna koreo e Silitili, sa qavuna pa Ziuda meke koe Zosua sa tuna koreo e Zehozadaki, sa ṉati hiama kenukenue:

²Hiera gua si zama nia e Zihova Tadi na Qeto Minate: “Zama guahe sari tie hire, ‘Sa totoso si lopu ele kamo pude kuri ia sa Zelepade te Zihova,’ gua.”

³Meke kamo la gua koe poropita Haqai sa zinama te Zihova:

⁴“Vea, na mia totoso eke mo gamu sia pude koa koari na vetu sapu ta goba va leleana, totoso koa ta huara eko mo sa Zelepade Taqarau hie?” gua si Asa.

⁵Ego, hiera gua si zama nia e Zihova Tadi na Qeto Minate: “Viliti va leana i sari mia hahanana,

⁶Ele lete va soku si gamu, ba vasinahite mo si paketi gamu. Henahena si gamu, ba lopu boka deṉa. Napo tugo ba lopu pada. Sage poko ba lopu maṉini. Vagi tinabara si gamu ba voi i gamu pa huneke vovoina poata sapu koa i na lopa.”

⁷Hiera gua si zama nia e Zihova Tadi na Qeto Minate: “Viliti va leana i sari mia hahanana.

⁸Sage la koari na toqere mamu paleke gore mae ni sari na lalabete mamu kuri ia sa Qua vetu, pude Maqu qetu si Arau pa korapana meke tava lavata,” zama gua se Zihova.

⁹“Sokudi si balabala i gamu pude vagi, ba vasinahite mo si vura. Sapu paleke mae ni gamu koari na mia vetu si ivu pani Rau. Na vegua?” zama vura gua se Zihova Tadi na Qeto Minate. “Koa gua koasa Qua vetu sapu koa ta huarana eko mo, sipu korapa tupiti taveti gamu sari mia vetu soti.

¹⁰Gua ke, koa gua koa gamu, si kote tuqe pule nia sa galegalearane sari nana ruku meke sa pepeso kote tuqe pule nia sa nana linetelete.

¹¹Na soṉe si veko la nia Rau koari na pezara na toqere, koari na linetelete, na inuma vaeni, na huda olive, meke nasa pule si vura pa pepeso, koari na tie meke kurukuru, meke koari na tinavete pa lima mia,” gua si Asa.

¹²Meke va tabe ia ri Zerubabele sa tuna koreo e Silitili, Zosua sa tuna koreo e Zehozadaki, sa ṉati hiama kenukenue, meke sari doduru ka visavisa tinoni koa holadi sa zinama te Zihova sa dia Tamasa meke sa inavoso te Haqai sa poropita. Ura e Zihova sa dia Tamasa na garunia si asa, meke pamaṉa nia rina tie se Zihova.

¹³Meke poni Haqai, sa tie paleke inavoso te Zihova, sa inavoso te Zihova hie koari na tinoni: “Arau korapa koa turaṉa gamu si gamu,” zama vura gua se Zihova.

¹⁴Ke va gevuru ia e Zihova sa maqomaqona e Zerubabele sa tuna koreo e Silitili, sa qavuna pa Ziuda, sa maqomaqona e Zosua sa tuna koreo e Zehozadaki, sa ṉati hiama, meke sari maqomaqodi ri doduru ka visavisa tinoni koa holadi. Ke mae si arini meke podalae tavetavete koasa Zelepade te Zihova Tadi na Qeto Minate, sa dia Tamasa,

¹⁵koasa rane vina hiokona made pa vina onomo sidara koasa vina rua vuahenina sa binaṉara te Dariasid.