1Dutun te nehuna he andew te ikeenem he vulan, dutun te ikezuwa he tuig te kedhadì ni Darius diyà te Persia, duen migkaǥi te Nengazen diyà te ki Zerubabel wey ki Josue pinaaǥi te ebpeneuven he si Haggai. Si Zerubabel he anak ni Shealtiel iyan gubirnedur ziyà te Juda, ne si Josue he anak ni Jehozadak iyan lavew he memumuhat.
2Iyan heini migkaǥi te Nengazen he Mekeǥeǥehem pinaaǥi te ebpeneuven he si Haggai: “Migkaǥi kew te kenè pa heini timpu te ked-umana kebenguna zuen te valey ku.
4Egenahan kew ve he ed-ubpà diyà te mekempet he menge valey he neregdas mulà is kediey he valey?
5Is-isipa niw is nengehitavù keniyu.
6Dekelà is impemula niw piru zeisey zà is neraǥun niw. Duen niw keenen, piru kenà heini ereg. Duen niw inumen, piru kurang heini. Duen niw visti, piru kenà heini utew ebpekaalang te meǥenew. Duen egkezawat niw he suwildu, piru meǥaan dà heini egkaamin.
7Umbe, is-isipa niw is nengehitavù keniyu.
8Guntaan, tekezeg kew ziyà te vuntud ne penguwa kew te menge kayu ne umana niw venguna is baley ku, su wey pinaaǥi kayi egkelipey a wey egkeveǥayan te zengeg. Iyan a, is Nengazen, is migkaǥi kayi.”
9Migkaǥi pa is Nengazen he Mekeǥeǥehem te, “Dekelà is ebperetengen niw he sebpet piru zeisey zà is neraǥun niw. Ne zutun te ked-ulia niw kayi midezeetan ku heini. Mibeelan ku heini tenged te neregdas en is baley ku piru is kada sevaha keniyu mulà, ne egkevuhetanan te kedterebahu ziyà te kandin mismu he valey.
10Umbe, tenged keniyu wazè en birisbiris ne kenè ne ebeǥey te sebpet is tanà.
11Impememaza ku is tanà wey is menge vuntud. Umbe neipiktuwan is trigu, binu, lana, wey is duma pa he menge abut, ragkes en is menge etew, wey is menge uyaǥen dan, wey menge impemula zan.”
12Mibpezumazuma te Nengazen si Zerubabel, si Josue, wey is langun he menge zuma zan he menge Israilihanen he nemen-ulì diyà te Israel puun te kegkevihaǥa kandan diyà te Babilonia. Su mibpemineg dan is migkaǥi te Nengazen he Megbevayè dan pinaaǥi te ebpeneuven he si Haggai he midsuǥù te Nengazen diyà te kandan. Ne pinaaǥi kayi midtahud dan is Nengazen.
13Ne zutun, si Haggai, is perekaǥi te Nengazen, migkeǥiyan din is menge Israilihanen te, “Migkaǥi is Nengazen he zuma niw kun sikandin.”
14Umbe, mibaghet te Nengazen si Zerubabel, si Josue, wey is langun he zuma zan he menge Israilihanen he nemen-ulì diyà te Israel, te kebangun duen te valey te Nengazen he Megbevayè dan he Mekeǥeǥehem.
15Mibpuunan dan is kebangun hein ike-24 he andew te ikeenem he vulan, dutun te ikezuwa he tuig te kedhadì ni Darius.
