Падишаһлар «1» 4:5-26

⁵Натанниң оғли Азария назарәт беги, Натанниң йәнә бир оғли Забуд һәм каһин вә падишаһниң мәслиһәтчиси еди.

⁶Ахишар ординиң ғоҗидари, Абданиң оғли Адонирам баҗ-алван беги еди.

⁷Пүткүл Исраил зиминида Сулайман падишаһниң өзи үчүн вә ордидикилири үчүн йемәк-ичмәк тәминләйдиған, он икки назарәтчи тайинланған еди; уларниң һәр бири жилда бир айдин йемәк-ичмәк тәминләшкә мәсул еди.

⁸Уларниң исми төвәндә хатириләнгән: Әфраим тағлиқ райониға Бән-Хур;

⁹Маказ, Шаалбим, Бәйт-Шәмәш вә Елон-Бәйт-Һананға Бән-Дәкәр;

¹⁰Аруботқа Бән-Хәсәд; у йәнә Сокоһ вә Хәфәр дегән барлиқ жутқиму мәсул еди;

¹¹йәнә Нафат-Дорға Бән-Абинадаб (у Сулайманниң қизи Тафатни хотунлуққа алған);

¹²Таанақ, Мәгиддо вә Йизрәәлниң төвәнки тәрипидики Зарәтанниң йенида болған пүткүл Бәйт-Шанға, шундақла Бәйт-Шандин тартип Абәл-мәһолаһғичә, Җокнеамдин өткичә болған зиминларға Аһилудниң оғли Баана;

¹³Рамот-Гилеадқа Бән-Гәбәр; у йәнә Гилеад жутиға җайлашқан, Манассәһниң оғли Яирға тәвә болған кәнтләр вә һәм Башандики жут Аргоб, җүмлидин у йәрдики сепили, мис балдақлиқ қовуқлири болған атмиш чоң шәһәргиму мәсул еди.

¹⁴Маһанаимға Иддониң оғли Аһинадаб;

¹⁵Нафталиға Ахимааз (у Сулайманниң қизи Басиматни хотунлуққа алған еди).

¹⁶Ашир вә Алотқа Һушайниң оғли Баанаһ;

¹⁷Иссакарға Паруаһниң оғли Йәһошафат;

¹⁸Бинямин зиминиға Еланиң оғли Шимәй;

¹⁹Гилеад зиминиға (әслидә Аморийларниң падишаһи Сиһон вә Башанниң падишаһи Огниң зимини еди) Уриниң оғли Гәбәр. У шу жутқа бирдин-бир назарәтчи еди.

²⁰Йәһуда билән Исраилниң адәмлири деңиз саһилидики қумдәк нурғун еди. Улар йәп-ичип, хошаллиқ қилатти.

²¹Вә Сулайман болса Әфрат дәриясидин тартип Филистийләрниң зиминиға вә Мисирниң чегаралириғичә болған һәммә падишаһлиқларниң үстидә сәлтәнәт қилатти. Улар улпан кәлтүрүп Сулайманниң пүтүн өмридә униң хизмитидә болатти.

²²Сулайманниң ордисиға кетидиған күнлүк тәминат үчүн оттуз кор тасқиған ақ ун, атмиш кор қара ун,

²³он бордиған уй, яйлақтин кәлтүрүлгән жигирмә уй, йүз қой кетәтти; буниңдин башқа буғилар, җәрәнләр, кийикләр вә бордиған тохулар лазим еди.

²⁴Чүнки у Тифсаһдин тартип Газағичә, Әфрат дәриясиниң бу тәрипидики һәммә жутларниң үстидә, йәни Әфрат дәриясиниң бу тәрипидики барлиқ падишаһларниң үстидә һөкүм сүрәтти; униң төрт әтрапи тинич еди.

²⁵Сулайманниң пүткүл күнлиридә Дандин тартип Бәәр-Шебағичә Йәһуда билән Исраил адәмлириниң һәр бири өз үзүм тели вә өз әнҗир дәриғиниң тегидә аман-есән олтиратти.

²⁶Сулайманниң җәң һарвулириниң атлири үчүн төрт миң атханиси, он икки миң чәвәндизи бар еди.