Sie Tokosra 4:5-26

⁵Leum fin mwet suksuk ke kais sie acn: Azariah, wen natul Nathan Mwet kasru fulat nu sin tokosra: mwet tol Zabud, wen natul Nathan

⁶Mwet kol lun mwet kulansap ke inkul fulat: Ahishar Mwet kol fin mwet kumakinyuk: Adoniram, wen natul Abda

⁷Solomon el srisrngiya mwet suksuk singoul luo fin acn Israel nufon. Ma kunalos in fosrngakunma mwe mongo nu inkul sin tokosra liki acn selos — kais mwet suksuk karingin malem se ke yac se.

⁸Pa inge inelos ac acn elos karingin: Benhur: infulan eol Ephraim

⁹Bendeker: siti lun Makaz, Shaalbim, Beth Shemesh, Elon, ac Beth Hanan

¹⁰Benhesed: siti lun Arubboth, ac Socoh ac acn Hepher nufon

¹¹Benabinadab, su payuk sin Taphath, acn se natul Solomon: acn Dor nufon

¹²Baana, wen natul Ahilud: siti Taanach ac Megiddo, ac acn nukewa apkuran nu Beth Shan ma apkuran nu ke siti srisrik Zarethan, eir in siti srisrik Jezreel, fahla nwe ke siti Abel Meholah ac Jokmeam

¹³Bengeber: siti Ramoth in acn Gilead, ac acn srisrik nukewa in acn Gilead ma lun sou lal Jair, su ma in fwil natul Manasseh, ac acn Argob in acn Bashan. Oasr siti lulap onngoul, ac kewana potyak, ac mwe sruh ke mutunpot uh orekla ke osra bronze

¹⁴Ahinadab, wen natul Iddo: acn lal Mahanaim

¹⁵Ahimaaz, su payukyak sel Basemath, sie pac sin acn natul Solomon: acn lal Naphtali

¹⁶Baana, wen natul Hushai: acn lal Asher ac siti srisrik Bealoth

¹⁷Jehoshaphat, wen natul Paruah: acn lal Issachar

¹⁸Shimei, wen natul Ela: acn lal Benjamin

¹⁹Geber, wen natul Uri: acn Gilead, facl se ma Sihon (tokosra lun mwet Amor) ac Og (tokosra lun Bashan) eltal leumi. Sayen mwet singoul luo inge, oasr sie mwet suksuk fulat solla in karingin facl sac nufon.

²⁰Pusiyen mwet Judah ac Israel oana puk weacn uh. Elos mongo ac nim ac engan.

²¹Tokosrai lal Solomon sisani facl nukewa e ke Infacl Euphrates me nwe ke acn Philistia, ac masrol nu Egypt. Mwet inge nukewa moli tax nu sel, ac orekma nu sel ke lusen moul lal nufon.

²²Enenu lal Solomon nu inkul sin tokosra ke kais sie len pa: pak in flao srik kosra siofok lumngaul, ac pak in flao yohk kosra tolfoko,

²³cow muta in kalkal singoul, ac cow forfor saya longoul, ac sheep siofok, sayen na kosro deer, gazelle, roebuck, ac won.

²⁴Solomon el leumi facl nukewa roto in Infacl Euphrates, liki acn Tiphsah ke infacl Euphrates, nwe ke siti Gaza nu roto. Tokosra nukewa roto in Infacl Euphrates elos orekma nu sel, ac oasr misla ke facl nukewa ma oan raunella.

²⁵Ke lusen moul lal Solomon, mwet nukewa in acn Judah ac Israel elos mutana in misla ac wangin mwe fosrnga. Kais sie sou oasr ima in grape ac sak fig sunalos.

²⁶Oasr angngaul tausin nien muta lun horse in chariot natul Solomon, ac singoul luo tausin horse in mweun natul.