1 KING TAUDIA 4:5-26

⁵Asaraia Natana: Provins idia naria taudia edia biaguna. Sabuda Natana: Hahelagaia tauna, bona king ia sisiba henia tauna.

⁶Ahisa: King ena ruma ia naria tauna. Adonirama Abida: King ena gaukara taudia edia biaguna.

⁷Solomona ese tau 12 ia abia hidi, Israela ena provins do idia naria totona. Inai taudia 12 edia gaukara ta be edia provins ta ta dekena amo aniani do idia abia, Ierusalema dekenai king, bona iena ruma dekenai noho taudia totona, inai aniani idia siaia. Inai provins naria taudia ta ta ese hua ta ta king ena ruma taudia edia aniani do idia henia, lagani ibounai lalonai.

⁸Inai provins naria taudia edia ladana be inai: Benehuru: Eparaima Ororo tano.

⁹Benedeka: Maka, Salabima, Bete Semese bona Elono, Bete Hanana edia kahana dekenai.

¹⁰Beneheseda: Aruboto dekenai, Soko bona Hepere tano ibounai danu.

¹¹Benabinadaba: Napata Doro ena kahana ibounai. Ia ese Solomona ena natuna kekeni Tapata ia adavaia.

¹²Bana Ahiluda: Tanaka, bona Megido hanua, bona Bete Seana hanua ena tano ibounai. Unai be Saretana ena badibadinai, Ieserele ena henunai. Bona Bete Seana dekena amo ela bona Abele Mehola, ela bona Iokomeama hanua danu.

¹³Benegebere: Ramoto Gileada, Iairi Manase ena hanua, Gileada tano dekenai gaudia, bona Aragobo tano, Basana dekenai, hanua badadia 60 mai edia magu, bona mai auri laboralabora magu iduaradia.

¹⁴Ahinadaba Ido: Mahanaimi.

¹⁵Ahimasa: Napatali. Ia ese Solomona ena natuna kekeni Basemata ia adavaia.

¹⁶Bana Husai: Asera bona Bealoto.

¹⁷Iehosapata Parua: Isakara

¹⁸Simei Ela: Beniamina iduhu tanona.

¹⁹Gebere Uri: Gileada provins. Guna inai provins be king Sihona, Amoro taudia edia king, bona king Oga, Basana ena king idia naria. King ena opesa ta ese inai provins naria taudia ia biagua.

²⁰Iuda taudia bona Israela taudia be momo herea, kone ena miri bamona, idia aniani, idia inuinu, bona idia moale noho.

²¹Solomona ese iena basileia kahana ibounai ia biagua, Euperate Sinavai dekena amo ela bona Pilistia taudia edia tano, bona Aigupito tano ena hetoana. Inai gabudia ibounai ese takisi moni Solomona dekenai idia henia noho, iena mauri dinadia ibounai lalonai.

²²Dina ta lalonai Solomona ena ruma ena aniani be inai: Paraoa kurokurona, 3000 kilogaram, paraoa sisina kurokuro, 6000 kilogaram.

²³Bona boromakau, mai edia digara danu gaudia 10, bona boromakau, rei gabudia dekena amo gaudia 20. Bona mamoe 100, bona dia badadia, uda nanigosidia, dia maragidia, bona kokoroku mai edia digara danu.

²⁴Solomona ese Euperate Sinavai ena dina diho kahana, Tipisa ela bona Gasa, ia biagua, bona Euperate Sinavai ena diho kahana king taudia be ia ese ia biagua. Unai Solomona ena tano kakirakahira idau bese taudia ese ia dekenai idia tuari henia lasi.

²⁵Solomona ena mauri dinadia ibounai lalonai Iuda bona Israela taudia be mai maino danu idia noho. Edia bese ta ta ibounai be mai edia vain audia, bona mai edia fig audia.

²⁶Solomona be mai ena kariota hosidia danu. Idia ta ta be mai edia noho ruma. Unai hosi ibounai be 40,000. Bona iena tuari hosi dekenai guia taudia be 12,000.