1. King 4:5-26

⁵Asaria nöün Natan we mwän i meilapen ekewe kepina. Saput nöün Natan we mwän i souasor me nöün ewe king souöüröür.

⁶Ahisar i meilapen chon tümwünü imwen ewe king, nge Atoniram nöün Apta we mwän a wisen nemeni ewe mwichen chon angangen kinroosi.

⁷Iwe, Salomon a filätä engol me ruoman kepina, pwe repwe nemeni ekewe engol me ruu kinikinin fanü lon Israel. Ir ra wisen amongöni ewe king me chon leimwan, eman leir nge eu maram lon eu ier.

⁸Iwe, ikkei iten ekewe kepina me ekewe kinikin ra nemeni: Penhur a nemeni ewe chukuchukutän Efraim,

⁹Penteker a nemeni Makas, Salpin, Pet-semes me Elon-pethanan.

¹⁰Penheset a nemeni Arupot pwal Soko me unusen ewe fanü Hefer.

¹¹Pen-apinatap a nemeni unusen ewe fanü Tor. Ätei a pwülüeni Tafat nöün Salomon we fefin.

¹²Paana nöün Ahilut we mwän a nemeni Tanak, Mekito me unusen Pet-sean mi nom ünükün Saretan örün Jesrel, pwal seni Pet-sean tori Apel-mehola achöüala ngeni pekilan Jokmeam.

¹³Pen-keper a nemeni Ramot-kiliat pwal ekewe sopun Jair lon Kiliat. Jair eman mwirimwirin Manasa. Iwe, a pwal nemeni ewe fanü Arkop mi nom lon Pasan me wone telinimw mi watte a wor tittir, nge lokkun asamalaper a för seni piras.

¹⁴Ahinatap nöün Ito we mwän a nemeni ewe fanü Mahanaim,

¹⁵Ahimas a nemeni ewe fanü Naftali. Ätei a pwülüeni Pasemat, i pwal eman nöün Salomon kewe fefin.

¹⁶Paana nöün Husai we mwän a nemeni ewe fanü Aser me Pealot.

¹⁷Jehosafat nöün Parua we mwän a nemeni ewe fanü Isakar.

¹⁸Simei nöün Ela we mwän a nemeni ewe fanü Peniamin.

¹⁹Keper nöün Uri we mwän a nemeni ewe fanü Kiliat fanüen Sihon ewe kingen chon Amor, pwal fanüen Ok ewe kingen Pasan. Keper i chök kepina lon unusen ei fanü.

²⁰Iwe, chon Juta me chon Israel ra fokun chomong usun chök chomongun föün pien aroset. Ra momongö, ra ükkün o pwapwa.

²¹Nge Salomon a nemeni ekewe mwü meinisin seni ewe chanpupu Oifrat tori fanüen ekewe chon Filistia, pwal tori kiännin Isip. Ra uwato ar takises ren o angang ngeni Salomon lon unusen ränin manauan.

²²Iwe, ükükün enen chon leimwen Salomon lon eu rän ina epwe ükükün ipükü walik me limu tuk pilawa mi mürina, pwal ina epwe ükükün ülüpükü fik me limu tuken sokun pilawa,

²³engol ätemwänin kow mi aümanau me rüe kow mi mongö seni lemäl, pwal ipükü sip lükün ekewe chia iter kasele me ropak, pwal chuko mi kitinup.

²⁴Salomon a nemeni unusen ewe fanü lotoun ewe chanpupu Oifrat, seni Tifsa tori Kasa, a pwal nemeni ekewe king meinisin mi nom lotoun ewe chanpupu Oifrat. Iwe, a wor an kinamwe ngeni ekewe mwü meinisin mi nom ünükün.

²⁵Lon unusen ränin manauen Salomon chon Juta me chon Israel ra nom lon kinamwe, seni Tan tori Persepa, eu me eu famili a nom fän püsin an irän wain me an irä fiik.

²⁶Mi pwal wor ükükün faik ngeröü lenien oris fän iten nöün Salomon oris mi nukei waan kewe woken me engol me ruungeröü chon wawa oris.