1Andre ešebno zmluva sas o pravidla pre sentňi služba le Devleske a sas la pre phuv o Sentno Than.
2Sas kerdo o Stanos, so pes vičinelas o Sentno Than, a andre sas o momeľaris the o skamind, kaj thovenas o mare anglo Del.
3Pal o dujto pochtan sas o than, so pes vičinelas o Neksentneder Than,
4a andre sas o somnakuno kaďidloskero oltaris the e Zmluvakeri Archa, so sas obthoďi pal savore seri le somnakaha a andre sas o somnakuno čaro la mannaha, le Aronoskeri paca, so rozkvitňisaľiľa, the o barune tabli la zmluvakere.
5Upral e archa sas o cherubi la slavakere, so peskere kridli rozcirdle upral oda than, pre savo pes odmukel o bini. No akana na kampel te vakerel pal savore kala veci.
6Sar oda savoro sas kerdo kavke, o rašaja džan furt andre ešebno than a ode služinen,
7ale andre dujto than džal ča o nekbareder rašaj jekhvar beršeste, no ča le rateha, so anel vaš peskere the le manušengere bini, so kerenas a na džanenas, hoj oda hin bini.
8Oleha sikavel o Sentno Duchos, hoj nane phundrado o drom andro Neksentneder Than, medik ačhel o ešebno than.
9Oda hin obrazis pre kada časos, so sikavel, hoj o dari the o obeti, so pes anen, našťi keren dokonalo o jilo ňikaske, ko lašarel le Devles.
10Bo oda hin ča pal o chaben, pijiben a sar pes te morel, so hin ča o avrune, ťelesne prikazaňja, so ľikeren ča dži akor, medik na kerela o Del neve.
11Ale sar avľa o Kristus, avľa sar o Nekbareder Rašaj ole lačhipnastar, so imar hino ade, prekal o bareder the dokonaleder Stanos, so na sas kerdo le manušeskere vasteha a nane andral kada svetos.
12Geľa korkoro peskere rateha – na le rateha le capendar vaj le gurumňorendar – jekhvar a pro furt andro Neksentneder Than a avke dochudľa o večno dživipen prekal amende.
13O rat le capengero the le bikengero a o prachos le labarde gurumňorendar sentňarel olen, save hine melale a žužarel len pro ťelos.
14Te oda hin avke, keci buter o rat le Kristoskero amenge žužarela o svedomje andral o mule skutki! Bo o Ježiš anďa pes korkores sar dokonalo obeta le Devleske prekal e zor le večne Duchoskeri a avke šaj služinas le džide Devleske.
15Vašoda kerďa o Kristus nevi zmluva maškar o manuša the maškar o Del, hoj savore, save sas vičimen le Devlestar, te chuden o večno ďeďictvos, pal savo len o Del diňa lav – bo o Kristus muľa, hoj len te cinel avri le binendar, so kerde, medik sas e ešebno zmluva.
16Ode, kaj hin pisimen e posledno voľa, pes mušinel te presikavel, hoj imar muľa oda, ko les pisinďa.
17Bo e posledno voľa nane pre ňisoste, medik dživel oda, ko la kerďa.
18Vašoda aňi e ešebno zmluva na sas kerďi bi o rat.
19Sar o Mojžiš diňa te džanel savore manušenge savore prikazaňja pal o zakonos, iľa o rat le capengero the le bikengero a mišinďa le paňeha, paľis iľa e ľoľi vlna the o konaricis pal o izopos a pokropinďa o zvitkos the savore manušen
20a phenďa: “Kada hin o rat la zmluvakero, so o Del tumenge prikazinďa.”
21Avke pokropinďa le rateha o Stanos the savore veci, soha pes kerelas e služba le Devleske.
22Andro zakonos pes maj savoro obžužarel le rateha a te nane avričhordo o rat, nane odmukle o bini.
23Kampelas kavke te obžužarel ola veci, so hine ča obraza le ňeboskere, ale o ňeboskere veci kampel te obžužarel federe obetenca sar kala.
24Se o Kristus na geľa andro Sentno than, so sas kerdo le vasteha a hino ča o angluno obrazis le čačeske, ale ov geľa dži andro ňebos, hoj pes akana te sikavel anglo Del vaš amenge.
25Aňi na vašoda, hoj pes buterval te obetinel, avke sar o nekbareder rašaj džal sako berš andro Neksentneder Than le rateha, so nane leskero.
26Bo te sas avke, o Ježiš mušinďahas buterval te cerpinel, kanastar sas stvorimen o svetos. Ale ov pes sikaďa akana andro posledna časi (idei) jekhvar a pro furt, hoj pes te obetinel a te zňičinel o binos.
27Avke sar hin dino le manušenge jekhvar te merel a paľis ela o sudos,
28avke the o Kristus pes jekhvar obetinďa, hoj te odlel o bini but manušengere a sar pes dujtovar sikavela, oda imar na ela vašoda, hoj te odlel o binos, ale hoj te spasinel olen, save pre leste užaren.
