1O kamiben maškar o phrala te na preačhel.
2Ma bisteren te prilel le hoscen a te presikavel lenge e pačiv, bo avke vareko priile le aňjelen, choc pal oda na džanenas.
3Gondoľinen the pro bertenoša, avke sar te tumen uľanas lenca andre bertena. A gondoľinen the pre ola, save cerpinen, avke sar te the tumen cerpinďanas lenca.
4Sako peske mi ľikerel o manželstvo andre pačiv. O rom la romňaha peske mi en pačivale, bo le lubaren the olen, save pašľon avre romňijenca, sudzinela o Del.
5Ma dživen avke, hoj tumen te zakamen andro love, a aven spokojne oleha, so tumen hin, bo o Del phenďa: “Na mukava tut, aňi tut šoha (ňikda) na omukava.”
6Vašoda bi e dar šaj phenas: “O Raj mange pomožinel a na darava man. So man šaj kerel o manuš?”
7Ma bisteren pre ola, save tumen ľidžanas a vakerenas tumenge o lav le Devleskero. Dikhen pre lengero dživipen, sar dživenas a sar mule, a keren andro pačaben avke, sar on kerenas.
8O Ježiš Kristus hino oda jekh idž, adadžives the furt pro furt.
9Ma den tumen te odlel všelijake avre sikavibenenca. Bo hin mištes, te o jilo hino zoraľardo le Devleskere lačhipnastar (milosťatar) a na ole zakonendar pal o chabena, so nane pre chasna olenge, save oda doľikeren.
10Amen hin o oltaris, pal savo našťi chan aňi o rašaja, save služinen andro Stanos.
11O nekbareder rašaj lel o rat le džvirengero andro Neksentneder Than vaš o bini, ale lengere ťela labaren avri le taboristar.
12Vašoda the o Ježiš cerpinelas avri pal e brana le foroskeri, hoj te sentňarel le manušen peskere rateha.
13Aven džas pal leste avri andral o taboris a zľidžas leha leskeri ladž.
14Bo pre kadi phuv amen nane foros, so ačhela pro furt, ale užaras pre oda, so avela.
15Vašoda, aven, obetinas furt le Devleske e chvalakeri obeta prekal o Ježiš, oda hin o ovocje andral o muj, so viznavinel leskero nav.
16Ma bisteren te kerel o lačhipen the te pomožinel jekh avreske, bo oda hin o obeti, so hin le Devleske pre dzeka.
17Šunen olen, save tumen ľidžan, a podden tumen lenge, bo on pes starinen pal tumare duši a ačhena vaš tumenge anglo Del. Šunen len, hoj oda te keren le radišagoha, a na le rovibnaha, bo oda na ela tumenge pre chasna.
18Modľinen tumen vaš amenge. Amen mištes džanas, hoj amen hin žuže jile, bo andre savoreste pes kamas mištes te ľikerel.
19A mek buter tumen mangav, hoj pes te modľinen vaš ma, hoj sigeder pale te džav ke tumende.
20O Del, savo del o smirom a uštaďa amare Rajes le Ježiš andral o meriben, savo hin o baro Pasťjeris le bakrengero prekal o rat, so anďa e večno zmluva,
21mi kerel tumendar ajsen, save kamena te kerel savoro lačhipen, so ov kamel. Mi kerel andre tumende oda, so hin leske pre dzeka, prekal o Ježiš Kristus. Leske mi džal e slava furt pro furt. Amen.
22Na pisinďom tumenge but, phralale, no mangav tumen, hoj te prilen kala lava, so hin pre oda, hoj tumen te zoraľaren.
23Kamav, hoj te džanen, hoj amaro phral o Timoteus sas premuklo. Te avela sigeder, džava ke tumende jekhetane leha.
24Pozdravinen savore tumare vodcen the savore sentnen. O phrala andral e Italija tumen pozdravinen.
25O lačhipen (milosť) le Devleskero mi el tumenca savorenca!
