1Ʒâʒâfic raŋɋanao Wofuŋ mai eecnere hata fowec â irec tiri qoruc boze mâreŋko ŋewec wâc.
2Mitire qoruc boze hâcne kecʒiŋuc bambiŋ: Maŋne moc maine, ʒâŋene Furufic mukicne, ira kendo kikenehec domawec erâ tebo ŋewec fainao poroŋ furu mukicne i fowec.
3Eme bumec maŋne moc âke tâcnekicne fowec, ʒâŋene Furu Dindiŋ mukicne.
4Ira hosâc ririke alata golzi bakicne ŋewec, erâ ʒâʒâficte qorac tapa katapa golzi ɋorockekicne i ŋewec, erâ Aroŋte gunu ɋârerâ gitec hekicne i â qorac tapa mâmâc râekicne.
5Fainao ine tatamacte kerubim hawari jajahec fakec‐jekiczi katapa tapane sâockehuc domapic. Irec dâŋ ninic jaha wemocko mufârezo.
6Wiac iŋuc râepie fohame fic maŋne maine ira taha bapa jaŋe dameŋ sâc fec wahac ehuc gie‐jeŋic bajumbieŋ.
7Fic maŋne moc ira ine taha bapa sâko e bucticne jara moc maŋnao arec mocjaha fejujec. Erâ soc tâmiric aricne, sochec sasawa fehuc e jahacne â ŋic jaŋere bahacte tie jujec.
8Wiac irec fuŋne Tiri Mârozi ʒiŋuc nâwotukac: Maŋne maine izi ŋehame furu ufuŋko raraʒire hata mi fua tâcnekac.
9Maŋne maine izi dameŋ ʒiŋuczia mâreŋko juŋgopeneŋ irec sâsâcne ekac. Tiri qoruc bozeo nânâ qowi bâzi râe rikec ee izi wemocko ŋic Anutu mai ecnembiŋ jaŋere maŋ bâpiaŋkezac?
10I sahackopec sâcmutâc dâŋ sawa, nânâ opâre â sahac ʒuʒurere dâŋ fowec iŋucne, i ʒâhec fârinezi âkehockeocte jaba fowec.
11Kristo eki ine wiac fârine fuaocte mukicne irec taha bapa sâko fuawec, ehuc qoruc boze sâc moc, fârine jâmbâŋ, mezi mi bakicne, mâreŋko mi ŋeŋene, ira raʒiwec.
12Noniŋ bulimakao sochec mâcne, e jahacne sochec Furuficko arec mocjaha raʒihuc kitâc‐nâpowec izi fofo sanaŋ foocmu.
13Noniŋ bulimakao soc â bulimakao ʒafe i ŋic wâwânâŋ fua‐jarewec jaŋe epie furu bacjopame sahackopec ɋaɋackembiŋ;
14Kristo e ine Mâro juweczi jukac eki neŋgoc ŋecneha maŋ sahac‐ticne Anutu taha bâzi furu biaŋ ecnewec, eme nâŋâc eebapa aputacnezi maŋnâŋec hegâpârembeŋ i Kristore soczi sâcne ʒure ɋaɋackeme Anutu jujune kiŋaŋ qacnenaŋmu.
15Irec hâcne Kristo e ʒâʒâfic ɋâricnere jâcne ewec, erâ ʒâʒâfic raŋɋanao juhuc kiŋ bâfuakicne i taraocte hâmowec, eme irec biŋefâc‐ticne jaŋe juju sanaŋte merâfâc roniŋte mujarekicne i sâcne roniŋmu.
16Merâfâcte hata ʒiŋuc fokac: Runezi hâmome jaha rauckezo.
17Ɋâricne juhame merâfâcte dâŋ mukicne i mâc foocmu, hâmome ine dâŋ irec fârine fuaocmu.
18Irec hâcne ʒâʒâfic raŋɋane i soc tâmiricko wâc mi fuawec.
19Mose e sâcmutâc dâŋqâhâc jâcne jâcne, mutâcnekicnere sâcko ŋic jazaku jaza‐fârerâ bulimakao â noniŋsoc opâhec bâsifuckerâ kâcbiŋko lama kanʒaŋ bâbâroŋ qâfiserâ izi soc tieme miti papia mecne ŋic ŋokac mecne mâmâc rua‐jarewec.
20Ehuc ʒiŋuc jazawec: “Anutuzi ʒâʒâficte dâŋ mupaŋke‐ŋarejec irec soc ʒi hâcne.”
21Erâ taha boze â taha giere râqâc wiac i iŋuc jaha soczi ruacne‐fârewec.
22Ine hâcne, sâcmutâc dâŋko mukicnere wiac ʒeŋgoma qâririŋ soczi ʒure ɋaɋackezo, â soc tâmiricko sâqocne bâbâtâmire mi fokac.
23Sambâŋko wiac fârine fokac irec sâsâc wiac i soc omanezi ʒure ɋaɋackeocte mukicne, â wiac fârine e jahacne ine taha furi sâkozi ʒure ɋaɋackeocte hatane mocjaha fokac.
24Irec hâcne Kristo e furu ufuŋ mezi bakicne, fârine irec sâsâcne mac, ira mi raʒiwec, e sambâŋ maŋnao raʒiwec, eme ira Anuture maio juhuc nâŋâcnere erâ taha gie‐ticne baekac.
25Erâ e maŋ sahac‐ticne hâsi fâri taha‐nâŋec qikiŋneocte wâc mi fewec, taha bapa sâkozi jâmbomac jarane jarane feekac, ehuc e jahacne soc mâcne, soc jabane rorâ tiri ufuŋko feekac.
26Kristo e iŋucnere sâc erâ muzac mâreŋ fuaweckonecteaŋ wemo afecne hâmo warehuc juzac. E ine iŋuc mi ehuc dameŋ ŋondeŋ tataranao due‐nâŋec bahuc kiŋnâŋec bârârieocte fua tâcnewec.
27Ŋiczi mocjaha hâmonaŋte munârekicne, eme irec faicnao dâŋnâŋec mumutara fuaocte mukicne;
28eme Kristo e iŋuc jaha, ŋic bocjaha kiŋjeŋic âsickehuc mocjaha hâcne hâmoweczi mocwâc sâqocnere gie baocte mâcne, e worickehuc jueŋgopieŋ jaŋe rocjopaocte sawa fua taniŋkeocmu.
