Ŋicwofuŋ II 13:1-23

¹Juda ŋicwofuŋ Ahaʒiare ŋokâ Joasi e ŋicwofuŋ jume jara 23 eha Jehu ŋokâ‐ticne Joahaʒizi Samaria haeo juhuc fuŋkerâ Israe ŋic jaŋere ŋicwofuŋ erâ jara 17 juwec.

²Ehuc Wofuŋte ʒâŋe faio wiac mamakâcne ehuc Nebate ŋokâ‐ticne Jeroboamzi Israe ŋic ejareme hehesic bâfuambiŋ, hata i mi râpeckewec.

³Irec Wofuŋ e kimbeŋ‐ticnezi Israe ŋic bâruŋke‐jareha Siria ŋicwofuŋ Haʒaele â ŋokâ‐ticne, ʒâŋene Beŋhada, jahere meo ʒuʒuhuc jaha râec‐jopahuc juwec.

⁴Iŋuc eme Joahaʒi e Wofuŋ kio wâwâsic ecneme Wofuŋzi kio wâwâsic‐ticne manawec. Wofuŋ e Siria ŋicwofuŋzi fific guguriŋ ejarewec i honewec hâcne.

⁵Ehuc bâbâfirie ŋic moc âkendâŋne‐jareme eki Siria ŋic jaŋere meonec batarac‐jopawec. Iŋuc ejareme Israe ŋic jaŋe juwicnao jumbiŋ irec sâc hae‐jeŋickoa jumbiŋ.

⁶Erâ Jeroboam kikefuŋfâcne jaŋe Israe ŋic ejarepie hehesic bâfuambiŋ i mi râpeckehuc hata ijaha âtembiŋ. Erâ Asera nemure ɋâŋ qâqâtâczi Samaria haeo ʒuhuckerâ ŋewec.

⁷Eme Joahaʒire momori bocjaha mocwâc mi jumbiŋ. Momori ʒiŋuc sawazi jumbiŋ: Becâsicko rara ŋic 50 â keretac 10 â kikezi rara ŋic 10 tauseŋ! Israe ŋic jaŋe Siria ŋicwofuŋzi jopahuc âtenʒaŋ‐jopakume rufe iŋucne embiŋ hâcne.

⁸Eme Joahaʒizi wiac sasawa ebac ewec â tâpiri‐ticnere fuŋne i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.

⁹Eme Joahaʒi e hâmome apa ŋosafâcne jaŋerao ʒuhuckehuc Samaria haeo duckembiŋ. Ehame ŋokâ‐ticne ʒâŋene Jehoasi eki tucticne qarâ ŋicwofuŋ juwec.

¹⁰Joasi e Juda ŋicwofuŋ jume jara 37 eha Joahaʒi ŋokâ‐ticne Jehoasizi fuŋkerâ Samaria haeo juhuc Israe ŋic jaŋe ŋicwofuŋ ejarewec. Erâ ŋicwofuŋ juhame jara 16 tarawec.

¹¹Erâ e wâc Wofuŋte ʒâŋe faio wiac mamakâcne ewec jaha. Ehuc Nebate ŋokâ‐ticne Jeroboamzi Israe ŋic ejareme hehesic bâfuambiŋ hehesic i mi râpeckehuc ijaha ehuc juwec.

¹²Erâ Jehoasizi wiac sasawa ebac ewec â tâpiri‐ticnere fuŋne bataniŋkehuc Juda ŋicwofuŋ Amaziahec qaqac epic i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.

¹³Eme Jehoasi e hâmome apa ŋosafâcne jaŋerao ʒuhuckehuc Israe ŋicwofuŋ jaŋe fombiŋkoa Samaria haeo duckembiŋ. Eme Jeroboamzi eri ŋeŋe‐ticnao ŋewec.

¹⁴Elisa e huc bame hâmozo ehuc fohame Israe ŋicwofuŋ Jehoasizi erao hurâ ʒiŋuc muhuc kiowec: “Mamac‐nane, mamac‐nane! Israere keretac â becâsicko rara ŋic!”

¹⁵Iŋuc mume Elisazi ʒiŋuc âzâcnewec: “Tepe neŋgocne â motecne roc.” Âzâcneme tepe neŋgocne â motecne rowec.

¹⁶Rome Elisazi Israe ŋicwofuŋ ʒiŋuc âzâcnewec: “Tepe âpârec.” Iŋuc âzâcneme tepe âpârewec. Âpâreme Elisazi meticne ŋicwofuŋte me faio râewec.

¹⁷Ehuc muwec, “Ʒoaŋ wewefunaopec qâqâtâc kataŋ i motâc roc.” Mume e iŋuc ewec. Eme Elisazi ʒiŋuc âzâcnewec: “Ajoc, qâtâcnec.” Âzâcneme iŋuc ewec. Eme Elisazi muwec, “Wofuŋzi bafic‐nâpoocmu irec tepe motec, Siria mâreŋ bawahahuc bafic‐nâpoocmu irec tepe motec! Go Siria ŋic Afeke haeo jopaku jopa miziecmu hâcne.”

¹⁸Iŋuc murâ ʒuhuckerâ muwec, “Tepe motec roc.” Iŋuc mume rowec. Rome Israe ŋicwofuŋ ʒiŋuc âzâcnewec: “Tepe motec izi mâreŋ qac.” Âzâcneme arec jahec â moc sawa qarâ behewec.

¹⁹Iŋuc eme Anuture ŋic e Israe ŋicwofuŋ ere aarickeme muwec, “Go mâreŋ arec 5 me 6 qanʒaŋ. Go iŋuc etec muzac ine Siria ŋic jopaku jopa mizienʒaŋ. Ʒi ine go Siria ŋic arec jahec â moc sawa jopacmu.”

²⁰Eme Elisa hâmome duckembiŋ. Ehame jara mocte maŋnao ʒoaŋ dameŋ fuŋkehame Moabi ŋic jaŋe Israe mâreŋko râsi fisimbiŋ.

²¹Juku dameŋ mocko ŋic gâcne jaŋe ŋic moc hâmome duckezo ehuc juhapie râsi guru fisipie honec‐jopambiŋ. Ehuc ŋic hâmocnere qâŋɋâŋ i Elisare nombâŋko behepie huwec. Eme qâŋɋâŋzi hu Elisare siec heuwarâ izia ɋârerâ fahare domawec.

²²Siria ŋicwofuŋ Haʒaele e Joahaʒire dameŋko Israe ŋic fific guguriŋ mâretec ejarewec.

²³Ehame Wofuŋ e honec‐joparâ busâqoc mana‐jarehuc buuruc qajarewec. E Abraham, Isaka â Jakobo jaŋehec ʒâʒâfic ewec irec erâ moc mi bâsirowec‐jopahuc jaŋehec juwec. Me bebehec‐jopa sanaŋ i moc mi ewec hâcne.