2 Baṉara 13:1-23

¹Pa vina hiokona ṉeta vuahenina sa binaṉara te Zoasi sa tuna koreo e Ahazaea sapu baṉara pa Ziuda, si tava baṉara pa Izireli se Zehoehazi sa tuna koreo e Zehu, meke ka manege zuapa vuaheni si koa si asa pa Sameria meke tuturaṉa pa Izireli.

²Tavete va kaleana pa kenuna e Zihova si asa, gugua tugo e Zeroboami sa tuna Nebati pu turaṉa lani sari na tie Izireli pa sinea; lopu boka luara pani Zehoehazi sari nana hahanana kaleadi.

³Ke bugoro ni e Zihova sari na tie Izireli, meke va malumia Sa se Hazaelo sa baṉara pa Siria meke se Beni Hadadi sa tuna koreo pude va kilasa pilipule i.

⁴Meke tiqe varavara la koe Zihova se Zehoehazi, meke olaṉia e Zihova sa nana vinaravara na dogoria Sa sapu guana kaleana hola saripu tavete lani sa baṉara pa Siria koari na tie Izireli.

⁵Garunu la nia e Zihova si keke koimata pa Izireli, pu vata rupahi koari na tie Siria, meke koa va bulebulei sari na tie Izireli, gugua tatasana.

⁶Ba lopu hite luara pani tugo arini sari na tinavete kaleadi te Zeroboami sa baṉara pu turaṉa la nia sa butubutu Izireli pa sinea; ba tavete nono la i mo rini. Sa beku kinehana sa tamasa barikaleqe se Asera d ba koa eko nana mo pa Sameria.

⁷Se Zehoehazi si loke nana qeto minate si asa sapu koa hola, ba ari ka lima ṉavulu puta tie koi hose mo, manege puta totopili varipera meke ka manege puta tina tie varipera ene hokara, sina va mate betoi sa baṉara pa Siria sari doduru, neti gore ni sa guana kavuru.

⁸Doduru ginugua saripu taveti e Zehoehazi meke sari doduru nana vinarane si ta kubere koasa Buka Tinozi tadi na Baṉara Izireli.

⁹Mate meke ta pomunae pa vasileana Sameria si asa, meke baṉara hobea e Zehoasi sa tuna koreo si asa.

¹⁰Pa vina toloṉavulu zuapa vuahenina sa binaṉara te Zoasi baṉara pa Ziuda, si tava baṉara pa Izireli se Zehoasi sa tuna koreo e Zehoehazi, meke koa tuturaṉa pa Sameria si asa ka manege onomo vuaheni.

¹¹Tavete va kaleana pa kenuna e Zihova meke luli sa sari na tinavete kaleadi tanisa baṉara Zeroboami, sapu turaṉa lani sa sari na tie Izireli pa vinahesi beku.

¹²Doduru ginugua pule saripu taveti e Zehoasi, turaṉae la tugo sari nana vinaripera la koe Amazaea sa baṉara pa Ziuda, si ta kubere pa Buka Tinozi tadi na Baṉara Izireli.

¹³Mate meke ta pomunae se Zehoasi koasa popomunuana baṉara pa Sameria, meke baṉara hobea sa tuna koreo e Zeroboami vina rua si asa.

¹⁴Meke kamoa minoho nomana se Ilaisa, sa minoho sapu mate nia tugo sa. Sipu korapa moho sa si ene la hopiki nia sa baṉara Zehoasi pa Izireli si asa. Meke kabokaboa si asa, “Ke tamaqu! Ke tamaqu! Sari na totopili vinaripera na tie koi hose pa Izireli!” gua si asa.

¹⁵Meke zama se Ilaisa, “La vagia si keke bokala meke kaiqa tupi,” meke la vagi sa.

¹⁶Meke tozi nia Ilaisa si asa pude va namanama gona, ke va namanama sa baṉara meke va hake lani e Ilaisa sari na limana pa limana sa.

¹⁷Zama se Ilaisa, “Mu tukelia sa vuida,” meke tukelia sa baṉara sa vuida sapu doṉo la gua pa popoa Siria. Meke garunia Ilaisa si asa, “Gona nia sa tupi,” Meke sipu gona nia tugo sa baṉara sa tupi, si zama va ululae sa poropita, “Na tupi te Zihova si agoi sapu kaqu va kilasi sari na kana pa popoa Siria. Kaqu razai goi sari na tinoni Siria pa Apeka osolae kaqu va kilasi goi si arini.”

¹⁸Beto asa si tozi nia Ilaisa sa baṉara pude vagi sari tupi koa holadi meke seke ni pa pepeso. Meke seke ni sa baṉara pa pepeso ka ṉeta totoso, meke beto.

¹⁹Bugoro sa poropita te Tamasa meke zama la koasa baṉara, “Na vegua ke lopu seke ni agoi pa pepeso ka lima babe ka onomo totoso, be gua be kote va hokotia agoi sa vina kilasana sa popoa Siria; ba kamahire kote ka ṉeta totoso mo va kilasia goi si asa,” gua se Ilaisa.

²⁰Meke mate se Ilaisa meke ta pomunae. Doduru vuaheni si hoke nuquru mae raparapata kumana sari na tie pa Moabi pa popoa Izireli meke vagi likakalae.

²¹Keke totoso sipu korapa namanama vari pomunae gua sari na tinoni Izireli si ta dogoro va hodaka si keke puku tie Moabi, ke ipa veko nia mo rini koasa lovuna Ilaisa sa tie matena meke govete taloa dia. Sipu hoqa kamo la sa tinina sa tie matena koari na susurina e Ilaisa, si toa pule hokara nana sa tie meke turu sage nana.

²²Koasa doduruna sa tinuraṉa te Zehoehazi, si koa ta nono gore eko mo sari na tie Izireli koe Hazaelo sa baṉara pa Siria,

²³ba qetu ni na tataru ni e Zihova si arini. Lopu va malumi Sa pude ta huara taloa hokara ba toka ni sa, koa gua koasa nana vina tatara koe Ebarahami, Aisake, meke e Zekopi. Lopu hite muliṉi hokara ni Sa sari nana tie.