2 Kings 13:1-23

¹U lan e re duw ni rliw’ nge dalip ko gagiyeg rok Joash ni Pilung nu Judah nib mo’on ni fak Ahaziah, me mang Jehoahaz nib mo’on ni fak Jehu e pilung nu Israel, me yog e thin u Samaria ni ragag nge medlip e duw.

²Ma ku bod Jeroboam ni Pilung nib m’on rok, i denen nib togopluw ngak SOMOL i waliy yu Israel nga fithik’ e denen; mar de pag ngongolen nib kireb.

³Ere me damumuw SOMOL ngak yu Israel, me pag Hazael ni Pilung nu Syria nge Benhadad nib mo’on ni fak nge gel ngak yu Israel u bayay ngu bayay.

⁴Ma aram me meybil Jehoahaz ngak SOMOL, me SOMOL e be guy gelngin ni be gafgownag fare pilung nu Syria piyu Israel, me fulweg taban e meybil rok.

⁵Me l’oeg SOMOL reb e tagagiyeg ngak yu Israel, ni ir e pithigrad u pa’ piyu Syria, ma aram me par piyu Israel u fithik’ e gapas, ni bod kafram.

⁶Machane ku dar paged fapi denen nike waliyrad Jeroboam ni Pilung nu Israel nga fithik’, ya ku ra pired ni aram ngongolrad’; ki par fare liyos ni ya’an Asherah u lan yu Samaria.

⁷Ma dakuriy e salthaw rok Jehoahaz ni magey, kemus wugem e girdi’en e yan u os, ragag e chariot, nge 10,000 e salthaw ni mayan u but’, ya fare pilung nu Syria e ke thirif u but’ e tin ki immoy, ke yotyotrad nga but’ ni bod e fiyath.

⁸Gubin e tin kabay ni rin’ Jehoahaz nge urngin e pi ngongol rok u fithik’ e m’uthan’ e go’ kani yoloy ngalan e babyor ni Chepin e Pilung nu Israel.

⁹Me yim’ min k’eyag u Samaria, me Jehoash nib mo’on ni fak e yan nga luwan nge mang pilung.

¹⁰U lan e duw guyey nge medlip ko gagiyeg rok Joash ni Pilung nu Judah, me mang Jehoash e pilung nu Israel nib mo’on ni fak Jehoahaz, me yog e thin u Samaria ni ragag nge nel’ e duw.

¹¹Ma ku errogon ir niki denen nib togopluw ngak SOMOL ki yan u kanawo’en Jeroboam ni Pilung nib kireb, ni waliy yu Israel nga fithik’ e denen.

¹²Gubin e tin kabay ni rin’ Jehoash, nib mu’un murung’agen feni m’uthan’ ko mael ni tay nib togopluw ngak Amaziah ni Pilung nu Judah, e go’ kani yoloy ngalan Chepin e Pilung nu Israel.

¹³Me yim’ Jehoash min k’eyag u lan fapi low ko yam’ rok e pilung u lan yu Samaria, me Jeroboam nib mo’on ni fak e yan nga luwan nge mang pilung.

¹⁴Elisa ni profet e yib e m’ar ngak nge ubchiya’ riy ndabki gol, ma nap’an ni kari ubchiya’ me yan Jehoash ni Pilung nu Israel i guy. Me yor ni be ga’ar, “Chitamag, chitamag, i gur e um par ni ga bod fapi chariot nu Israel nge pi’in yad be yannag ni matanagen e binaw!”

¹⁵Me ga’ar Elisa ngak, “Mfek ba gat’ing nge boch e gan e gat’ing.” Me yan i fek Jehoash,

¹⁶me ga’ar Elisa ngak, “Mu fal’eg rogom ni ngam mon’ gan e gat’ing.” Me fal’eg rogon, me tay Elisa pa’ nga daken pa’ fare pilung.

¹⁷Me ga’ar Elisa, “Mbing e bin ngek e winda nib sap nga Syria.” Me bing, me ga’ar Elisa ngak, “Mon’ gan e gat’ing rom!” Ma fa’ani yon’ me ga’ar Elisa ni profet ngak, “I gur gan e gat’ing rok SOMOL ni bayi maruwel ngay nge gel ngak yu Syria. Bay mu mael ngak yu Syria u lan yu Afek ngam gel ngorad.”

¹⁸Me yog Elisa ngak fare pilung ni nge fek fa tinem e gan e gat’ing nike magey nge toy nga but’. Me toy nga but’ ni dalip yay me tal.

¹⁹Me puwan’ Elisa me ga’ar ngak fare pilung, “Susun e ngam toy nlal fa nel’ yay, ma aram e ra um par ni gab gel ngak yu Syria, machane chiney e kemus ni dalip yay e ga ra gel ngorad.”

²⁰Me yim’ Elisa min k’eyag. Gubin e duw nma yib yu raba’ i girdi’ nu Moab ni cham nga Israel.

²¹Me bangiyal’ ni ka ni yan ni ngan k’eyag ba yam’ min guy boch fapi girdi’ ni yad ma yib ko cham nga Israel, min garpey fare yam’ ngalan e low ko yam’ ni ginni chubgiliy Elisa ngay, min mil. Ma nap’an ni yigi math fare yam’ ko yil rok Elisa, me fos nge sak’iy ngalang.

²²I Hazael ni Pilung nu Syria e i gafgownag yu Israel ni n’umngin nap’an e gagiyeg rok Jehoahaz,

²³machane SOMOL e ba gol mma runguyrad. Ma de pagrad nge math owcharad, machane ayuwegrad ni bochan e m’ag rok u thilrad Abraham, Isaak, nge Jakob. Dariy bangiyal’ nike pagtalin e girdi’ rok.