1Dikhľom te avel avri andral o moros la šelma. Sas la efta šere the deš rohi a pro rohi la sas deš koruni a pre dojekh šero la sas o nav, so džungľarelas le Devles.
2E šelma, sava dikhľom, dičholas sar leopardos. Lakere pindre sas sar le medveďiskere a lakero piskos dičholas sar le ľevoskero. O drakos lake diňa peskeri zor, the tronos, the autorita.
3A dikhľom, hoj jekh lakere šerendar sas pro meriben mardo, ale lakeri meribnaskeri rana sasťiľa avri. Caľi phuv pes čudaľinelas a džalas pal e šelma.
4Banďonas anglal o drakos, savo diňa la šelma ajsi autorita, a banďonas the anglal e šelma a phenenas: “Ko hin ajso sar e šelma a ko pes laha šaj marel?”
5La šelmake sas dino muj, hoj te vakerel bare the nalačhe veci pro Del a chudľa autorita pro saranda the duj (42) čhona.
6Phundraďa peskero muj, hoj te vakerel namištes pro Del, pre leskero nav the pro than, kaj o Del bešel, the pre ola, save bešen andro ňebos.
7Sas lake diňi e zor, hoj pes te marel le sentnenca a te ňerinel (te zviťazinel), a chudľa e autorita upral savore kmeňi, nipi, čhiba the narodi.
8A savore, save bešen pre phuv, banďona anglal e šelma – ola, kaskere nava nane pisimen andro zvitkos le dživipnaskero, so hin o zvitkos le Bakroreskero, savo sas murdardo, kanastar sas kerdo o svetos.
9Kas hin kana, mi šunel!
10Te mušinel vareko te el phandlo andre bertena, ela phandlo andre bertena. Te mušinel vareko te el murdardo la šabľaha, ela murdardo la šabľaha. Andre oda kampel le sentnenge te ľikerel avri a te pačal.
11A dikhľom avra šelma, sar avelas avri andral e phuv. Sas la duj rohi, sar le Bakroreskere, ale vakerelas sar o drakos.
12Oj sa kerelas vaš e ešebno šelma a andre lakeri autorita. Ispidelas zoraha pro manuša, save bešen pre phuv, hoj savore te banďon anglal e ešebno šelma, savake sasťiľa e meribnaskeri rana.
13Kerelas bare zazraki avke, hoj the e jag andral o ňebos avelas tele pre phuv anglo jakha le manušenge.
14A cirdelas pal peste le manušen pre phuv le zazrakenca, so lake sas dine, hoj te kerel anglal e šelma. Rozkazinďa le manušenge pre phuv, hoj te keren obrazis la šelmake, savi sas dukhaďi la šabľaha a obdžiďiľa.
15Sas lake diňi e zor, hoj te del duchos andro obrazis la šelmakero, hoj oda obrazis te vakerel a te kerel, hoj te en murdarde savore, save na banďona anglal šelmakero obrazis.
16Kerelas oda, hoj savore – o cikne the o bare, o barvale the o čore, o slobodne the o sluhi – te chuden o znakos pre peskero čačo vast abo pre lengero čekat,
17hoj ňiko aňi te na cinel, aňi te na bikenel, ča oda, kas hin o znakos, abo o nav la šelmakero, vaj o čislos lakere naveskero.
18Andre kada hin o goďaveripen: Kas hin goďi, mi zrachinel o čislos la šelmakero, bo oda hin o čislos le manušeskero. A leskero čislos hin 666.
