1Paľis dikhľom štare aňjelen, sar ačhenas pro štar agora la phuvakere a chudenas la phuvakere balvaja, hoj te na phurdel e balvaj pre phuv, aňi pro moros, aňi pre ňisavo stromos.
2A dikhľom avre aňjelos, savo avelas upre pal o vichodos a saveste sas e pečať le džide Devleskeri. Ov vriskinelas zorale hangoha pro štar aňjela, savenge sas dino, hoj te dukhaven e phuv the o moros,
3a phenďa lenge: “Ma dukhaven e phuv, aňi o moros, aňi o stromi, medik amen na daha e pečať pro čekata ole dženen, save služinen amare Devleske.”
4Šunďom, keci džene sas zapečaťimen: 144 000 džene andral savore kmeňi andral o Izrael.
5Avke sas zapečaťimen 12 000 manuša andral dojekh kmeňos: andral o Juda, Ruben, Gad, Ašer, Naftali, Menašše, Šimeon, Levi, Jissachar, Zebulun, Jozef the Benjamin.
9Paľis dikhľom a sas ode pherdo manuša, saven ňiko našťi zrachinelas, andral savore narodi, kmeňi, nipi the čhiba. Ola manuša ačhenas anglo tronos the anglo Bakroro, urde andro džinďarde parne gada a sas len andro vasta o palmi.
10Vriskinenas zorale hangoha a phenenas: “Amaro spaseňje hin le Devlestar, savo bešel pro tronos, the le Bakrorestar!”
11Savore aňjela ačhenas pašal o tronos the pašal o phureder the pašal o štar džide bitosťi. Pele pro muj anglo tronos a lašarenas le Devles
12a phenenas: “Amen! O lašariben, e slava, e goďi, o paľikeriben, e pačiv, e zor the o rajipen amare Devleske pro furt! Amen!”
13Jekh le phurederendar mandar phučľa: “Ko hine kala džene, save hine urde andro džinďarde parne gada? A khatar avle?”
14Me leske odphenďom: “Rajeja, tu džanes.” A phenďa mange: “Kala hine ola džene, save aven andral oda baro pharipen a rajbinde peskere gada a parňarde len andro rat le Bakroreskero.
15Vašoda hine anglo Devleskero tronos a služinen leske rat-džives andre leskero chramos. A Oda, ko bešel pro tronos, dživela maškar lende a chraňinela len.
16Imar na ena buter bokhale, aňi smedne. O kham len imar buter na labarela aňi ňisavo aver tačipen.
17Bo o Bakroro, savo hino maškar o tronos, ela lengero pasťjeris a ľidžala len paš o prameňis, khatar džal o džido paňi a o Del lenge khosela savore apsa pal o jakha.”
