Text copied!
CopyCompare
Le Devleskero Lav Andre Romaňi Čhib 2019 - ZJAVEŇJE

ZJAVEŇJE 11

Help us?
Click on verse(s) to share them!
1Sas mange dino kaštoro, ajso sar paca, a sas mange phendo: “Ušťi a merin o chramos le Devleskero the o oltaris a rachin olen, save andre lašaren.
2Ale e avruňi chramoskeri dvora muk avri, ma merin la, bo hiňi diňi Nažidenge a on uštarena pro sentno foros saranda the duj (42) čhon.
3A me dava mire duje švedkenge te prorokinel 1 260 džives a ena urde andro gone.”
4Kada hin ola duj olivi the o duj momeľara, so ačhen anglo Del, anglo Raj la phuvake.
5Te len kamel vareko te dukhavel, avel lenge avri andral o muj e jag a chal olen, save pre lende džan. Avke, te len kamľahas vareko te dukhavel, mušinel te merel.
6Len hin zor te phandel andre o ňebos, hoj te na del o brišind andre ola dživesa, sar on prorokinen. A hin len zor te čerinel o paňi pro rat a te marel e phuv savore dukhenca, kana ča on kamena.
7Sar dovakerena peskero sveďectvo, e šelma, so avel avri andral odi bari chev, pes lenca marela, ňerinela (zviťazinela) upral lende a murdarela len.
8Lengere mule ťela pašľona pre uľica andre oda baro foros, kaj sas ukrižimen lengero Raj, o foros, so duchovne hin sar e Sodoma the Egipt.
9But manuša andral savore kmeňi, nipi, čhiba the narodi dikhena lengere mule ťela trin the jepaš džives, ale na domukena te parunel lengere mule ťela andro hrobos.
10Ola, save bešen pre phuv, radisaľona upral lende, thovena baripen a jekh avreske bičhavena o dari, bo kala duj proroka trapinenas le manušen pre phuv.
11Ale pal ola trin the jepaš dživesa o dživipnaskero dichos le Devleskero avľa andre lende a ušťile. A pre ola džene, save len dikhle, avľa bari dar.
12Andral o ňebos šunde zoralo hangos, so lenge phenďa: “Aven kade upre!” Avke gele upre andro ňebos andre chmara a lengere ňeprijaťeľa oda dikhenas.
13Andre odi ora chudľa e phuv igen te razisaľol. Jekh ďesaťina le forostar peľa tele a efta ezera (7 000) manuša mule. Okla džene predaranďile a dine e slava le Devleske pro ňebos.
14Dujto vigos pregeľa. Dikh, trito vigos avela maj!
15Eftato aňjelos zatrubinďa a pro ňebos šunďile zorale hangi, so phenenas: “O kraľišagos le svetoskero ačhiľa o kraľišagos le Rajeskero the leskere Kristoskero a ela kraľis furt pro furt.”
16O bišuštar (24) phureder, save bešen anglo Del pre peskere troni, pele sako pre peskero muj a lašarenas le Devles.
17Phenenas: “Paľikeras tuke, Rajeja, Devla, o Nekzoraleder, ko sal a ko salas! Bo preiľal tiri bari zor a chudľal te kraľinel!
18O narodi pes choľarde, ale avľa tiri choľi the o časos te sudzinel le mulen a te počinel tire sluhenge, le prorokenge, le sentnenge the olenge, save pes daran tire navestar – le ciknenge the le barenge – o časos, hoj te zňičines olen, save ňičinen e phuv.”

19Pal ada pes phundraďa o chramos le Devleskero andro ňebos a dičholas e Zmluvakeri Archa. Avle o bleski, šunďile o hlasi, demade o perumi, e phuv razisaľolas a delas baro brišind le krupenca.