ZABURA 7:1-15

¹Lɛ̀ kũ Dauda sì Dikirinɛ Biliaminu buri Kusu yã musu. Dikiri ma Luda, ma nanyĩ, ǹ ma mì sí ǹ ma sura ba gbɛ̃ kũ ò pɛ̀tɛmainↄ ↄĩ.

²Tó lɛnlo, oni ma kɛ yákiyaki lán músuu dì kɛńnɛ nàmɛ, oni ma kɛ̃kɛ̃kↄ̃rɛ, gbɛ̃ke ni ma mì síro.

³Dikiri ma Luda, tó ma taari ke kɛ̀, tó ma ↄ kú yã vãnin,

⁴tó ma a vãni kɛ̀ ma gbɛ̃dakenɛ, ke tó ma gbãna mↄ̀ ma ibɛrɛɛnɛ pã,

⁵ǹ tó ma ibɛrɛ pì pɛ́tɛmai à ma kũ, à gɛ̀sɛ pɛ́tɛpɛtɛma zĩtɛ, à ma vĩ bùsu'atɛ̃n.

⁶Ǹ futɛ ǹ zɛ kũ pↄfɛ̃o, Dikiri, ǹ futɛ ma ibɛrɛnↄi ń nɛ̀sɛ kpã̀kpã yãi. Ǹ vu, ma Luda, ǹ yã gↄ̃gↄ̃ a zɛ́a.

⁷Ǹ tó gbɛ̃nↄ kakaranyĩ, ǹ kí bleḿma zaa musu.

⁸Dikiri, ndì yãkpatɛ kɛ kũ gbɛ̃nↄ. Dikiri, ǹ tó yã bo kũmao nna ma yãzɛdekɛ lɛ́n. Luda Musude, ǹ yã kɛmɛnɛ ma nɛ̀sɛpura lɛ́n.

⁹Luda, mↄkↄ̃mmɛ mana, ndì nɛ̀sɛ kũ laasunnwo kpátɛ kɛ. Ǹ gbɛ̃ vãninↄ pãsĩkɛnaa mì dɛ, ǹ gbɛ̃ mananↄ gba zɛki.

¹⁰Luda Musudemɛ ma sɛ̃gbako ũ, àdi gbɛ̃ kũ ń nɛ̀sɛ mananↄ sura ba.

¹¹Luda dì yãkpatɛ kɛ a zɛ́a, àdi tó yã gↄ̃ vutɛḿma gↄrↄ sĩnda pínki.

¹²Tó gbɛ̃ dí a nɛ̀sɛ litɛro, Luda dì a fɛ̃nɛda lɛ́ kɛkɛ àdi a sá kú à kã.

¹³Àdi a gↄ̃kɛbↄ kũ àdi ga ińnɛnↄ kɛkɛ, àdi a kà tɛ́denↄ kpá sála.

¹⁴Ǹ gwa, yã vãni dì nↄ̀ dↄ gbɛ̃n, akũ àdi wari nↄ̀ sí à nɛ́ i ɛ́kɛ ũ.

¹⁵Àdi wɛ̀ɛ yↄ̃ gbɛ̃nↄnɛ zã̀zã tankutɛ ũ, akũ àdi zu wɛ̀ɛ kũ à yↄ̃̀ↄ pìi gũn.