Psalms 7:1-15

¹(David nu Benjamin ko kari Cush munan beteram wore ko iki se wur imi iluwam) O Yawe, aninga Kaem, ni aninga yumura kuwim; kari aga momonko aga karowasan, se aga sangaru ale aga bataguru toko.

²Mena mu, nuna lion iwita aga batutumumon se katir katir kaparikko, se kariimet bo aga sangukko mena.

³O Yawe, aninga Kaem, ani memek i bo bitirik se ko ikup angimik te aniruk,

⁴agi aga tiran yawara ikup te bitirik, agi aga kager kari duap mena nunga bita maguwurik mu asele,

⁵am agarkiwer se, aga kager kari aga ilumon ale aga momon maguwumon ale ali te aga sapamon se kua namarikko. Bare ani memek bo me beterem.

⁶Buta se Yawe, gemang memek te bares ale kari agarak bita karowasan mu nunga maguwurko! Aninga Kaem, munan diram mu ko sokel ago baluko.

⁷Se mu ko, ni kariimet suen la kimik duap te nunga bolala awur ale nika daiga kuwim kualala mu te baga se

⁸suen la nunga tutia saparko. Ale Yawe, aninga munan diram mu ko aga wetang saparko, O Kaem Kalel Biya.

⁹Kariimet memek alo imi nunga munan memek mu menawur se kariimet ningo mu terong bagamonko, mu awuk, ni munan diram ko Kaem; ni kariimet nunga ikia nunga nongomang motam ko iki sapasam.

¹⁰Kaem Kalel Biya mu aninga karem; nu kariimet nongomang diram mu nunga sangaru taso.

¹¹Nu tutera ura diram la beteso; nu pempem ko gomang magara wetang saposo.

¹²Se kariimet bo me giris palaguk mu sinar taukko: Kaem ko batir kore iluwam, ale ko daga wol tagiram ale sinar ago bagoso.

¹³Nu kager ko mel nungam burangaram, ale gatu kore tamatama mu gi awuram se aniso.

¹⁴Ikialko! Kari memek alo ikia memek betemonko ko ikia tasan, kawel betemonko ko den nungursan,

¹⁵ale kari saki te ningi dagulamonko mutim isan, bare mu nongota aking ningi dagulasan.