Salmos 7:1-15

¹Xrana' Dios, dxuxrén lazra' Lue'. Gúcale̱ neda' ne bselá neda' lu na' benne' ca' dxulusaca zi'e̱ neda',

²chee̱ quebe xele̱l-le̱' neda' ca dxun be̱zre xixre', na' xuluzúzruje̱' neda' naga quebe nu chilá' nu guselá neda'.

³Xrana' Dios, che be̱na' neda' caní: Che bi da zrinnaj be̱n ni'a na'a.

⁴Che bi da cale̱la be̱na' chee̱ benne' zue̱' chawe' nen neda'. (Bselá' bénnea' dxedábague̱' neda' lácala quebe bi nuna' chee̱'.)

⁵Che caní be̱na', be̱ lataj benne' dxedábague̱' neda' gau zi' ne xezrúnene̱' neda'. Be̱ lataj bénnea' guchuchu guléaje̱' neda' lu xu, ne xusunitie̱' xel-la' ba lá'ana chia'.

⁶Xran, dute̱ xel-la' dxezrá'a chiu', guzé̱. Bexechaj benne' ca' dxulusaca zi'e̱ neda' lu xel-la' dxelezrá'a chee̱'. Gusel-la da gácale̱ na neda' gate guchi'u da dxaca chia' ca da gunná be'u.

⁷Xúgute̱ benne' zaj zre̱'e̱ xe̱zr la xu xelezrague̱' lau'. Gunná be'e benne' ca' dute̱ xel-la' szren chiu'.

⁸Lue', Xran, guchi'u chee̱ benne' xúgute̱ xe̱zre. Bchi'a ca da nuna' lu da naca xrlátaje, ne lu da naca du lazre' chia'.

⁹Be̱n cheajsé̱ naze da zrinnaj da dxelún benne' we̱n da cale̱la ca', san bzua chawe' benne' xrlátaje, lawe' da nacu' xrlátaje, Dios, ne dxenná'u da xu'u xichaj lázrdau bénneache.

¹⁰Diósqueze dxucu'uje̱' neda'. Dxuselé̱' benne' zaj naque̱' du lazre'.

¹¹Xlátaje̱ dxuchi'a Dios chee̱ da dxelún bénneache. Tu dxezrá'azqueze Dios da dxelún benne' we̱n da zrinnaj ca'.

¹²Che quebe xelexíaje lazre̱' Dios gulé̱' xia chee̱'. Ba nuzúa cuásate̱' xaga nalá xéche'ze chee̱'.

¹³Ba naxrúa cuásate̱' xia chee̱' ca' chee̱ wedil-la. Ba nuzúa cuásate̱' xaga nalá xéche'ze da dxelala.

¹⁴Benne' we̱n da zrinnaj dxugú'u lazre̱' ca da cale̱la gune̱'. Xu'u lázrdawe̱' da zrinnaj da gune̱', na' dxebéajé̱' da we̱n lazre'.

¹⁵Ba gude̱ne̱' tu xe̱dxu situj naga cheajlechaze bénneache, na' lé̱zqueze̱' xeajcházie̱' lu xe̱dxu na'.