Yabura 84:1-10

¹Kora xa die xa bɛɛti bɛɛtibae xa mangɛ bɛ. A xa ba maxase luuti daaxi xui ra.

²Mangɛ Alatala, i xa lingira tofan!

³N wama sofe i xa tɛtɛ kui n bɔɲɛ birin na. Na waxɔnyi minima n dɛ i i tan Ala nan bɛ, i tan naxan ɲiɲɛ a ra.

⁴Hali xɔni xunxurie alɔ turunna nun debelinyi e tɛɛ sama i xa sɛrɛxɛbade sɛɛti ma e xa die luma dɛnnaxɛ. I tan Alatala Sɛnbɛma, n ma Mangɛ nun n Marigi,

⁵sɛɛwɛ na mixie bɛ, naxee sabatixi i xa banxi kui. E luma i matɔxɔ ra dɛnnaxɛ abadan. Ɲɛngi rate.

⁶Sɛɛwɛ na mixie bɛ naxee sɛnbɛ lanxi i tan Ala ma, naxee kira suxuxi sigafe ra salide xungbe.

⁷E Baka gulunba igirima tɛmui naxɛ, e ye dulonyie to nɛ, tunɛ ye gbegbe bara naa rafe.

⁸E keli yire fanyi nde, e siga yire fanyi gbɛtɛ. E na birin to nɛ kira xɔn sigafe ra Ala yire e e yɛtɛ masen a bɛ dɛnnaxɛ.

⁹N Marigi Alatala Sɛnbɛma, n ma dubɛ suxu! Yaxuba Marigi Ala, i n ma maxandi ramɛ. Ɲɛngi rate.

¹⁰Ala, hinnɛ i xa mixi sugandixi ra naxan findixi muxu xa wure lefa ra.