SALMOS 84:1-10

¹Nží'iḻe'ela' yodo' chio' Le', Dios. Le' napkzo' dot yeḻa' wak.

²Ẕdan ḻaža'a soa' ḻo yodo' chio', X̱ana' Dios, na' žak ḻáže'ḻi'a soa' ga na'. Ḻen dot da' naka', na' dot ḻaža'a žoḻa' chio' Le', Dios ban.

³Ba bengak byinne ka' x̱ó'ngakba', na' gogoldo' ka' zej de latje gan žẕíagakba' bia že'ndo' chégakba' ka', dan' naken gan zoa žoa'a bkog la'y chio' Le', Dios. Le' napkzo' dot yeḻa' wak. Ẕnna bia'kzo' Le' neda', na' nako' Dios chia'.

⁴Ba nez ẕen naken chegak benne' ka' nníta'gake' ḻo yodo' chio'. To chi'ize wká'n ẕéngake' Le'.

⁵Ba nez ẕen naken chegak benne' ka', Le' ẕzoa chocho' ḻégake', benne' ka' ẕdan ḻáže'gake' chjake' ḻo ya'a la'y chio', Ya'a Sión.

⁶Kate' ẕdágake' lache' biž dan' nzin' Lache' Nis Ẕbéžežo, žóngake' ga žeyaken to latje gan žaḻ nis zil, na' yeschá' nis yejw latje nisen'.

⁷Žákgakže' benne' waḻe x̱ak zej yoe'e nez ga na' dan' ḻé'egekle' Dios ḻaw ya'a la'y chie', Ya'a Sión.

⁸Benle, X̱ana' Dios, da' ẕnnabla' ḻawo' Le'. Le' napkzo' dot yeḻa' wak. Benle cheto', Dios. Nako' Dios che Jakob.

⁹Ben chawe' benne' wnná bia' cheto', Dios, benne' wnná bian' wžío' Le'.

¹⁰Gakže chawe' soa' to žaze ḻo yodo' chio' ka soa' to mil yiz ga yoble. Žak ḻáže'ža' soa' gan žó'ogake' yodo' che Dios chia' ka to benne' ndo'w, ka soakza' to liža' da' zaka' gan bi zoa Dios.