Pesalem 84:1-10

¹O lausiŋ undambêŋa nêŋ Apômtau, nêm andu e têtac kêsa laŋgwageŋgoc.

²Ŋoc katuc gêjam awa su Apômtaunê lôm ŋamalacluŋ e taê gêjac tau kêsi-kêsi. Ôlic to katuc kêpi-kêpigeŋ ma gêjam wê kêtu Anôtô mata jaliŋa.

³O lausiŋ undambêŋa nêŋ Apômtau, o ŋoc kiŋ to ŋoc Anôtô, kêclêwam kêtap nê andu sa ma mocbibi gêjam nê ic gebe êsu ŋalatuŋa gêc nêm altar ŋagala.

⁴Aoc gêôc lau, taŋ sêŋgôŋ nêm andu ŋalêlôm ma sêlambiŋ aôm gedeŋ tôŋgeŋ naŋ.

⁵Aê aoc gêôc lau, taŋ laŋôŋ gêlac nêm gamêŋgeŋ sêja ma nêŋ ŋaclai ŋam kêsêp aôm naŋ.

⁶Embe nasêsa gaboaŋ ŋakeleŋŋa, oc sêŋgôm gaboaŋ tau êtu gamêŋ bumataŋa ma komô sauŋ êkêŋ bu ênam gamêŋ tau auc.

⁷Êsêac sêwê taêŋ andaŋgeŋ e sêlic Anôtô aŋga Sion.

⁸O lausiŋ undambêŋa nêŋ Apômtau Anôtô, ôŋô ŋoc mec. O Jakobnê Anôtô, ôkêŋ taŋam.

⁹O Anôtô, matam ê aêacma kiŋ ma matamanô ôlic nêm ŋac, taŋ seŋ oso eŋ naŋ laŋôanô.

¹⁰Amoa nêm-malacluŋ bêc tageŋgeŋ ŋajam kêlêlêc amoa aêacma malac bêc tausen su. Jajop ŋoc Anôtônê andu ŋakatam oc êmoasiŋ aê êlêlêc jaŋgôŋ lau kesowaga nêŋ bec su ŋêŋgeŋ.