SALMOS 84:1-10

¹TOTECO, ta tiDios Tlen Tijpiya Nochi Chicahualistli, tlahuel yejyectzi motiopa.

²Nelía tlahuel nijnequi nicalaquis ipan icalixpa nopa tiopamitl, para nimonechcahuis huan nihuicas ica nochi noyolo para ta, Toteco Dios, tlen tiitztoc.

³TOTECO, ta tiDios Tlen Tijpiya Nochi Chicahualistli. Ta tinotlanahuatijca huan tinoTeco. Campa motlaixpa ipan mochaj nochi quipantíaj ininchaj, hasta nopa cochome huan tototzitzi tlen nopano motepasoltíaj, para nopano quintlacatiltíaj ininconehua.

⁴¡Nelía paquij nopa tlacame tlen itztoque ipan motiopa huan quisenhuiquilíaj mitzpaquilismacaj!

⁵Cuali ininpanti nopa tlacame tlen itztoque momaco, Toteco, huan quitoquilíaj moojhui huan yahuij Jerusalén para mitzhueyimatise.

⁶Quema panose campa ohui huan ipan nopa tlamayamitl tlen Choquistli, quicuepase para elis queja se yejyectzi ameli tlen temitos ica atl quema tlaahuetzi, pampa nopano quipantise miyac tlatiochihualistli,

⁷Huan queja nopa nejnentiyase mojmostla ica más fuerza, huan ajsise ipan Jerusalén para nopano monextise moixpa, Toteco.

⁸TOTECO Dios, ta tiDios Tlen Tijpiya Nochi Chicahualistli, xinechtlacaquili quema nimomaijtohua. Quena, xinechtlacaquili ta tiiTeco Israel.

⁹Toteco, ta tlen tinechmanahuía. Xinechcualita huan xinechtiochihua na ninopa tlanahuatijquetl tlen tinechaltijtoc para nitlanahuatis ipan Israel.

¹⁰Achi más cuali ma niyolto se tonal huan ma niitzto ipan motiopa, noTeco, huan ax niyoltos se mil tonali huan san ninentinemis campa hueli. Quena, achi más cuali nimoquetzasquía campa ipuerta motiopa, noTeco, huan ax niitztos ipan se hueyi cali campa onca tlajtlacoli.