Yɛbəc 24:5-20

⁵Səŋkɔkcɛ a fum wəkawɛ wəbɛrəs afum dacɔ ɔyɔnɛ, nkɔn ɔŋsɔŋɛ aSuyif fəp kəgbɛkəlɛnɛ doru mofo fəp. Wəkiriŋ wəka kəgba ka afum a Nasarɛt ɔyɔnɛ.

⁶Ɛnafaŋ yati kəyik-yikəs kəlɔ kəpɔŋ ka Kanu, itɔ sənasumpərɛ kɔ.

⁸Məna Wəbɛ məntam kəyifət kɔ, mətɛn kəcərɛ kɔ pəyɔnɛ fɔ a tɔkɔ səmboŋcɛ kɔ mɔ kaŋce kɔ-ɛ.»

⁹Kɔ Asuyif aŋɛ ŋanayi di mɔ, ŋambaŋɛ Tɛrtulu, kəc-loku: «Itɔ teyi yati!»

¹⁰Ntɛ wəbɛ ka dɔtɔf ɛfɛk Pol kəca a pəlok-loku mɔ, kɔ Pol oloku ntɛ: «Wəbɛ, iŋcərɛ a meren mɛlarəm mɔ məyi atɔf ŋaŋɛ məc-kiti. Kəlaŋ kaŋkɔ disrɛ k’indelokɛn’ am kəyac kem.

¹¹Tɛntacepər fɛ mata wəco kɔ mɛrəŋ ntɛ impɛ dare da Yerusalɛm kəkɔ-kor-koru Kanu, məntam ti kəyifət.

¹²Ambəp f’em kəlɔ kəpɔŋ ka Kanu, ambəp f’em dəkəlɔ ka dəkətola Kanu da aSuyif, ambəp f’em dare disrɛ səc-gbɛkəlɛnɛ kɔ fum, kɔ pəyɔnɛ fɛ ti-ɛ, ic-gbiŋər afum kəyɛfərɛnɛ.

¹³Ŋafɔtam sɔ kəc-mentər əm kaŋce ka tes tɔkɔ ŋamboŋc em mɔ.

¹⁴Kaŋce intam kəwosɛ nnɔ fɔr yam kiriŋ a Kanu ka atem em k’iŋkor-koru, k’iŋcəmɛ dɔpɔ da Wəbɛ darəŋ ndɛ ŋa ŋaŋcɛm-cɛmnɛ a yem yɔ mɔ. Mba ina ilaŋ ntɛ o ntɛ aŋcic dəkitabu Tawureta Musa kɔ Sayibɛ-e mɔ.

¹⁵Iŋgbɛkər teta Kanu tɔlɔma amera, ntɛ ŋa aboŋc’ em mes ŋa sɔ ŋaŋgbɛkər mera mɔ: It’ ɔyɔnɛ a Kanu kəndeyekti afi, alompu kɔ atɔlomp.

¹⁶It’ ɔsɔŋɛ ntɛ ina sɔ iŋsɛp tɛm fəp kəkɔtɛnɛ amera ŋɔtɔt fɔr ya Kanu kɔ afum kiriŋ.

¹⁷Ntɛ meren mɛlarəm meŋcepər mɔ, k’inder nnɔ Yerusalɛm kədemar afum em, k’iloŋɛnɛ sɔ domun.

¹⁸Kɔ ŋaŋkɔ ŋabəp im ic-sɔkəsnɛ kəlɔ kəpɔŋ ka Kanu disrɛ, bafɔ afum ŋaloŋkanɛ di, bafɔ pac-gbɛkəlɛnɛ.

¹⁹Mɛnɛ aSuyif a atɔf ŋa Asi alɔma akɔ ŋanayi di mɔ, ŋa ŋɔ pəmar kəder nnɔ məyi mɔ ŋac-boŋc’ em mes, kɔ pəyɔnɛ fɔ a ŋantɔmpər em mi-ɛ.

²⁰Kɔ pəyɔnɛ fɛ ti-ɛ, afum akaŋɛ ŋaloku tes tɛlɛc ntɛ aboc kiti a kəlɔ kəpɔŋ ka Kanu ŋananəŋk im ntɛ ŋanakit’ im mɔ.