ᤛᤣ᤺ᤰᤕᤢᤰᤔᤡᤒᤠᤜᤠ᤹ 24:5-20

⁵ᤁᤴ ᤔᤏᤠ᤺ᤴ ᤀᤠᤏᤡᤃᤧ ᤁᤢ᤹ᤀᤡ ᤁᤧᤓᤧ᤹ᤒᤠ ᤏᤡ᤺ᤛᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤁᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤛᤠᤱ ᤕᤜᤢᤍᤡ ᤗᤢᤶᤔᤥ ᤒᤡᤑᤩᤢᤱ ᤆᤥᤃᤢᤖᤥ॥ ᤁᤴ ᤔᤏᤠ᤺ᤴ ᤏᤠᤛᤖᤡ ᤛᤠᤶᤕᤥ ᤏᤛᤠ᤺ᤴᤒᤠ ᤗᤠᤶᤗᤥ᤺ᤒᤠᤀᤠᤱᤗᤥ॥

⁶ᤁᤴ ᤔᤏᤠ᤺ᤸᤗᤧ ᤔᤠᤱᤜᤡᤶᤔᤡᤴ ᤆᤡ᤺ᤶᤔᤠ ᤁᤥ᤺ᤳᤋᤢᤸᤗᤧ ᤀᤠᤏᤡᤃᤧ ᤋᤧᤶᤛᤢᤶᤒᤧᤒᤠᤖᤥ॥ ((ᤜᤧᤰᤁᤩᤠᤱ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤂᤠᤛᤧᤴ ᤗᤥ᤺ᤴᤍᤢᤶᤒᤧᤔᤧᤴ

⁷ᤁᤖ ᤌᤰᤋᤢᤶᤒᤠ ᤗᤢᤛᤡᤕᤛᤖᤧ ᤛᤠᤰᤁᤧᤸᤗᤧᤰ ᤀᤠᤏᤡᤃᤧ ᤜᤢᤰᤁᤥᤗᤠᤶ ᤁᤴ ᤔᤏᤠ᤺ᤴ ᤏᤠᤵᤋᤡᤃᤧᤀᤠᤱ ᤋᤣ᤹ᤖᤢᤖᤥ॥

⁸ᤜᤧᤰᤁᤩᤠᤱ ᤌᤰᤋᤢᤶᤒᤠ ᤗᤢᤛᤡᤕᤛᤖᤧ ᤀᤠᤵᤋᤡᤰ ᤁᤧᤃᤢ᤺ᤵᤐᤠ ᤔᤏᤠᤜᤠ᤹ ᤀᤠᤍᤠᤱᤒᤠ ᤛᤢᤜᤠᤱᤃᤧᤶᤒᤠᤸᤗᤥ ᤔᤧᤍᤠᤏᤡ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥)) ᤀᤠᤍᤠᤱᤒᤠᤖᤧ ᤀᤠᤒᤠᤅᤣ ᤁᤴ ᤔᤏᤠ᤺ᤴ ᤛᤣ᤺ᤴᤃᤧᤍᤥ᤺ᤛᤢᤏᤧ ᤑᤠ᤹ᤃᤪ ᤀᤠᤏᤡᤃᤧ ᤁᤢᤍᤰᤗᤧᤱᤘᤠᤀᤥ ᤁᤢ᤺ᤳᤋᤢᤶᤒᤧᤒᤠ ᤀᤠᤵᤋᤡᤰᤁᤡᤴ ᤛᤧᤰᤂᤠᤖᤥ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥ᤺ᤛᤢ᤹ᤖᤥ॥”

⁹ᤂᤧᤵᤔᤥ ᤘᤣ᤹ ᤕᤜᤢᤍᤡᤜᤠ᤹ᤖᤧᤀᤠᤱ ᤂᤧᤴ ᤀᤠᤵᤋᤡᤰᤁᤡᤴ ᤛᤧᤰᤂᤠᤀᤣᤖᤥ ᤑᤠ᤹ᤀᤠᤱ ᤔᤢᤖᤠ ᤔᤧᤍᤱᤄᤢᤖᤥ॥

¹⁰ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠᤸᤗᤧ ᤐᤠᤘᤗᤧᤴ ᤐᤠᤖᤧ᤹ ᤑᤠ᤹ᤀᤠᤱ ᤜᤢᤰᤆᤠ᤺ᤸᤁᤡ ᤐᤡᤖᤢᤀᤠᤱ ᤐᤠᤘᤗᤧᤴ ᤀᤰᤂᤣᤗ᤹ᤖᤡᤰ ᤐᤠᤖᤧ. “ᤀᤠᤍᤠᤱᤒᤠ ᤛᤢᤜᤠᤱᤃᤧᤶᤒᤠᤀᤣ. ᤁᤴ ᤗᤠᤈᤣ᤹ᤀᤥ ᤂᤠᤛᤧᤴᤗᤥ᤺ᤶᤒᤠ ᤁᤧᤒᤥ᤺ᤰᤂᤧᤒᤠ ᤕᤖᤡᤰ ᤋᤱᤒᤣ ᤁᤧᤖᤧ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤁᤳᤋᤢᤱᤗᤥ॥ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤀᤠᤏᤠᤱᤛᤡᤱᤔᤠ ᤀᤠᤒᤠ᤺ᤴᤏᤡᤴ ᤕᤢᤱᤔᤠ ᤀᤠᤛᤡᤖᤠ᤹ ᤌᤠᤱᤗᤥ॥

¹¹ᤕᤖᤢᤛᤗᤧᤶᤔᤥ ᤔᤠᤱᤛᤣᤘᤠ ᤆᤥ᤺ᤰᤛᤧ ᤀᤡᤱᤃᤠ᤹ ᤐᤣᤃᤠᤱᤒᤠ ᤌᤡᤰ-ᤏᤧᤳ ᤕᤧᤴᤏᤠᤱ ᤔᤧᤱᤃᤧᤳᤋᤣ ᤘᤠ᤹ ᤁᤧᤗ᤹ᤒᤠᤱᤃ ᤀᤠᤍᤠᤱᤒᤠᤖᤧ ᤀᤢᤛᤢᤖᤢ ᤏᤡᤱᤘᤠ᤹ ᤁᤧᤄᤥ᤺ᤛᤢ᤹ᤖᤥ॥

¹²ᤕᤠᤵᤔᤡ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ᤖᤧ ᤔᤧᤍᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤔᤠᤱᤜᤡᤶᤔᤥ ᤐᤠ᤺ᤴ ᤌᤰᤁᤡ ᤕᤠᤃᤠᤱᤒᤠ. ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤕᤧᤰᤕᤰᤁᤥ ᤀᤠᤳᤋᤡᤛᤠᤱ ᤔᤏᤠᤜᤠ᤹ ᤜᤢᤛᤢᤱᤛᤡᤱᤗ ᤘᤕᤠᤱᤒᤠ ᤜᤥ᤺ᤵᤋᤧᤖᤥ॥

¹³ᤂᤧᤱᤜᤠ᤹ᤖᤧ ᤔᤧᤃᤢ᤺ᤳᤋᤠᤱᤒᤠ ᤀᤠᤵᤋᤡᤰᤗᤧ ᤋᤥ᤺ᤴᤍᤡᤀᤠᤱ ᤋᤠ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥

¹⁴ᤁᤖᤛᤠᤱ. ᤀᤡᤱᤃᤠ᤹ᤃ ᤀᤠᤏᤡᤃᤧ ᤌᤠ᤺ᤰᤌᤧᤒᤠᤜᤠ᤹ᤖᤧ ᤛᤣᤘᤠ ᤔᤧᤈᤥᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥᤃᤢᤱᤒᤠ ᤐᤠ᤺ᤴᤏᤡᤴ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤋᤧᤴᤍᤡᤱ ᤆᤥᤃᤢᤱᤗᤥ॥ ᤂᤧᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤒᤠ ᤕᤧᤛᤢᤖᤧ ᤁᤢᤗᤠᤶᤔᤡᤴ. ᤂᤧᤱᤜᤠ᤹ᤖᤧ ᤑᤥᤋᤩᤠᤒᤠ ᤔᤧᤔᤧᤳᤋᤢᤖᤥ॥ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤠᤰ ᤐᤠ᤺ᤴᤜᤠ᤹ ᤏᤛᤠ᤺ᤴ ᤆᤥᤃᤢᤱᤗᤥ॥

¹⁵ᤀᤡᤱᤃᤠ᤹ ᤂᤢᤏᤡ᤹ ᤜᤧᤰᤁᤣᤀᤣ ᤛᤠᤶᤕᤥᤏᤡᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤡᤱᤛᤠᤱ ᤆᤥᤃᤢᤱᤗᤥ॥

¹⁶ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ᤃ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤂᤢᤏᤡ᤹ ᤋᤃᤡ ᤛᤣᤛᤣ ᤂᤠᤛᤡᤱ ᤁᤵᤔᤠ ᤋᤶᤛᤡᤴ ᤆᤥ᤺ᤰᤁᤠᤖᤥ॥

¹⁷ᤕᤖᤢᤛᤗᤧᤶᤔᤥᤏᤢ ᤗᤠ᤺ᤰᤁᤠᤳ ᤘᤕᤠᤱᤒᤠ ᤕᤖᤡᤰ ᤋᤱᤒᤣ ᤐᤥ᤺ᤰᤂᤧᤀᤠᤱ ᤂᤠᤖᤰ ᤀᤡᤱᤃᤠ᤹ ᤕᤠᤱᤃᤧᤛᤠ᤹ᤒᤠ ᤕᤜᤢᤍᤡᤕᤠᤛ᤻ᤔᤠ ᤀᤠᤔᤏᤠᤜᤠ᤹ ᤀᤣᤴᤋᤡᤀᤥᤰᤗᤠᤶ ᤛᤢᤶᤔᤏᤠᤒᤠ ᤜᤢᤰᤛᤥ ᤕᤠᤱ ᤜᤢ᤹ᤔᤠᤛᤡ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤵᤔᤥ ᤋᤩᤠᤱᤗᤥ॥

¹⁸ᤀᤡᤱᤃᤠ᤹ ᤂᤠᤖᤰ ᤔᤠᤱᤜᤡᤶᤔᤥ ᤛᤣᤛᤣ ᤐᤥ᤺ᤱᤔᤠ ᤌᤡᤶ ᤆᤥᤃᤢᤱ ᤛᤢᤖᤢᤱᤅᤠᤱ ᤘᤕᤠᤱᤅᤡᤸᤗᤧ ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤀᤡᤱᤃᤠ᤹ ᤔᤧᤏᤡ᤺ᤛᤠᤱ॥ ᤀᤡᤱᤃᤠ᤹ᤏᤢ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤜᤥ᤺ᤵᤋᤧ. ᤜᤕᤱᤁᤡᤸᤗᤡᤱᤅᤠᤱ ᤜᤥ᤺ᤵᤋᤧ॥

¹⁹ᤁᤖ ᤂᤧᤵᤔᤥ ᤀᤣᤛᤡᤕᤠ ᤋᤧᤱᤃᤵᤗᤠᤶ ᤁᤧᤍᤠ᤺ᤒᤠ ᤁᤢᤓᤠ ᤕᤜᤢᤍᤡᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤀᤠᤍᤰᤗᤧᤱᤘᤠᤀᤥ ᤀᤠᤵᤋᤡᤰ ᤔᤧᤃᤢ᤺ᤳᤋᤠᤏᤧ ᤑᤠ᤹ᤃᤪ ᤜᤠᤖᤠ᤹ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤀᤠᤵᤋᤡᤰ ᤋᤥ᤺ᤴᤇᤧ ᤔᤧᤍᤠᤖᤖᤥ॥

²⁰ᤔᤧ᤺ᤴᤏᤧ ᤑᤠ᤹ᤃᤪ ᤜᤠᤖᤠ᤹ ᤁᤵᤔᤥ ᤁᤧᤘᤠ᤹ᤒᤠᤜᤠ᤹ᤖᤧᤀᤠᤱ ᤕᤧᤈᤢᤶᤓᤥᤀᤥ ᤏᤠᤱᤛᤡᤱᤛᤧ ᤕᤧᤒᤠᤱᤅᤡᤸᤗᤧ ᤀᤠᤍᤰᤗᤧᤱᤘᤠᤀᤥ ᤀᤠᤵᤋᤡᤰ ᤔᤧᤄᤥ᤺ᤛᤢᤒᤠ ᤐᤠ᤺ᤴᤏᤡᤴ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤔᤧᤍᤠᤖᤢᤸᤗᤧ ᤐᤥ᤺ᤱᤗᤥ.